一個特別的容祖兒演唱會2010

2010 年 11 月 23 日（星期二）

喺沙巴過完第一個結婚週年紀念後，一落機就收到跳舞同學嘅電話。其實因為我嘅跳舞老師繼上次 Star Light 後再次被選中為容祖兒做演唱會 dancer，show 前已托老師撲飛，可惜一路都冇音訊，以為佢都冇計。後來因為某同學認識英皇娛樂工作人員嘅關係，可以有飛坐第一行（即 A 行），票價仍然係 $480，我即刻話預埋我睇。本身並非 Joey 嘅 super fans，但佢嘅歌都算識唔少，加上今次有 80% 都係想捧下老師場，$480 就 $480 啦！（A 行喎！）

成世女都未試過坐咁前，諗諗... 最近嗰次都係睇 Aaron 演唱會，但係嗰次都只係第二行！

↑ 前面就係欄杆，"long" 腳好梳乎...

梗係要同同學仔影返張相啦！其實唔講根本唔發現佢哋個 look 咁斯文，原來係咁熱愛跳舞，哈哈～～

演唱會例必遲開，今次唔算過份，只係比公佈時間遲咗 15 mins。

其實點解我會話 "特別的演唱會" 呢？自從學咗跳舞後，每次睇表演時我嘅注意力已經唔會只集中於表演者身上。

有時候，舞者未必會咁受人注意，甚至被視為廁所位。但係越嚟越發覺，一個 show 如果冇伴舞者的話，又點會好睇呢？佢哋嘅付出唔應該被忽視。

除衫呀，嘻嘻... 好 sexy 呢，之後就進行一 part 意識十分大膽，甚至可評為三級嘅舞蹈。

今次嘅 concert Joey d 衫好好好靚，以下呢件係另一係我覺得最靚嘅歌衫！

Joey 除咗賣唱亦會賣舞，呢 part 就係快歌 medley 啦，全場已經自動自覺企起身（我呢 D，一早已經想企好耐啦！）

握手部份...

由於係第一行，真係超超超近！

睇咗咁耐，都未出現過老師嘅真樣... 其實我影咗佢好多相。開 show 前已經 send sms 話佢知我哋坐邊，所以佢好快已經搵到我哋啦！

Medley 嗰 part 佢其實唔係企喺我哋面前，不過佢見到我向佢舉機，佢就唔望自己嘅觀眾，只係識得望鏡頭... 果然係一位表演慾強烈嘅人兄！（唔知大家睇唔睇到啦，始終同佢嘅距離有返咁上下，加上部相機...）

encore 時突然收到老師電話，原來 encore 全部都會係慢歌，佢已經可以收工啦！佢問我哋出唔出去紅館門口影相，我哋當然 OK 啦！（紅帽者 = 老師）

影下影下，又吹下水，越嚟越多 dancers 慢慢離開，其實我全部都認識，因為全部來自同一間 dance school，不過我只係跟某一個跳咁解。咁齊人，再影張啦！

Well ~ 其實係咪好容易認得邊 d 係 dancers？係咪 style 問題呢？點解逢親做 dancer 嘅一定要... 咁潮同咁 sharp 同埋咁扮鬼扮馬呢？

《補充》

有冇發覺點解只有男 dancers 唔見女 dancers？老師話因為女 dancers 比較 "all 嗰"，要落咗妝再化妝先肯走喎，嘻嘻，唔好咁話 d 女仔啦！

其實我仲認識 show 中另一位女 dancer，識佢係因為之前佢幫 Aaron 做 concert（大家都知我嗰陣好狼死啦）。好耐之前同老師傾計時提及過呢位女 dancer，原來就係呢位女 dancer 帶佢入行架，呢個世界真係細，緣分真係奇妙！

 

《後記》

仍然... 仍然後悔點解唔早 D 學跳舞。自小嘅志願係非常極端：(1) Dancer；(2) 賢妻良母 <--- 有笑死嗎？但確實係千真萬確！

成日發白日夢時會諗，如果我做咗 dancer，我宜家嘅生活會係點呢？老公話佢唔會比我做，因為做 dancer 好蝕底，尤其係女 dancer。因為：有時 D 舞衣太少布；有時 D 動作會比人摸身摸勢。Um... 佢不無道理，但我認為當你熱愛嗰件事時，已經唔會介意呢 D 嘢，只會識得全情投入去 enjoy。但話說回來，如果真係做 dancer，我未必會好似宜家咁幸福，更未必會認識到正在睇我 blog 嘅你！白日夢，都係耐唔耐發下就算啦！n_<