2010 年 2 月 13 日（星期六）
牛 --- 年 --- 尾
今年過年比較特別，除咗因為第一次以人哋老婆身份過年外，今年年三十晚多咗個節目，就係買咗飛去睇「張敬軒。軒動心弦演唱會」。由於我只係開 show 前約 2 星期先去買飛，加上認為睇得軒仔都係聽 live 多，所以毫不猶疑買咗 2 張最平嘅 $180，坐尾二行。
由於 showtime 係 9:30，所以同老公去紅磡都會廣場醫肚先入場。見呢排食得太多油膩嘢，都係清清地食下日本菜啦，所以就揀咗「梁山泊」。哈，幾好彩喎，入去一坐低，老公就同我講：「余廸偉呀！」
商業電台 903 DJ 之一，我自己都幾鐘意佢，覺得佢幾有料到，幾有急才。
原來佢坐正我哋張枱後面，可惜同佢背對背，冇機會同佢打招呼。我哋開始點菜時佢都差不多食完埋單，估計佢應該都係去睇演唱會，因為聽佢喺節目中提過。後來趁佢去完洗手間返出嚟路經我張枱時，我牛咁眼望住佢，死都唔眨眼... 佢可能覺得有人認得佢啦，就開始同我微笑，同講咗聲 hello。返埋位後繼續嗲咗 2 句，佢問我哋係咪睇軒仔，我又問佢係咪做嘉賓，etc... 太開心，竟然見到余廸偉... 其實應該見過唔止一次，不過開聲傾計就真係 1st time！
入到場 settle down，座位尚算 ok，軒仔走埋嚟都算多，可惜身處山頂位置...
有時買平飛，真係可以見識到好多奇人奇事：
(1) 開 show 前，大會總會免費派發 pong pong 棒，前面一 pair 情侶 A 唔知係咪第一次出城睇 show，竟然唔用飲管就咁用口吹，見佢出盡九牛二虎之力都吹唔起，老公已經問我好唔好教佢哋用飲管，我就叫佢唔好出聲，後來坐佢哋隔離另一 pair 情侶 B 先開聲，叫佢哋用飲管吹先吹到！勁～
(2) show time 係 9:30，正常應該食飽飽先入場睇 show，不過大約 10:XX 時，前面嗰對情侶 B 唔知喺邊度變咗一隻糯米雞出嚟，熱辣辣咁食得好滋味，仲傳嚟陣陣飄香...
(3) 當晚其中一位嘉賓係吳浩康，佢同軒仔 jam 完歌後有一 part 獨唱，佢揀咗一首比較多人熟悉嘅歌。與此同時，其實我後面坐咗 2 位疑似 90 後嘅女仔，或者佢唔係咁識阿 Deep d 歌啦（咁我自己都唔係好識），阿 Deep 唱唱下佢冇啦啦向佢朋友大叫：「哦，我知呢隻係咩歌啦，叫『洗。。。剪。。。恤』！」嘩，我真係立即噴飯...... 到今時今日我仲笑緊...
* 正名為「洗剪吹」
*************************************************************************
虎 --- 年 --- 頭
2010 年 2 月 14 日（星期日）
踏入虎年第一日兼情人節，當然要出動去拜見老爺奶奶啦。雖然之前嗰晚好夜先訓，不過撞正大年初一，點偷雞都唔可以唔出現。
一直都幻想邊個咁有幸可以逗到我人生中第一封利是呢？
結果...... 係自己屋企樓下嘅管理員....... 幻想真係幻想，諗漏咗自己當日出門口會派利是比管理員，結果佢咁就逗咗我第一封利是啦... 有 dd 唔甘心～
見到老爺奶奶後，諗住睇下邊個又咁 lucky 逗到我第二封利是，結果... 原來有人帶咗女朋友出嚟逗利是，而呢個女朋友暫時未被歐陽家接受...
而我，因為要分清楚利是入面 d 餡嘅大細，驚自己派錯，唯有派咗比呢個女仔先派比老公 d 細佬，咁..... 呢個女仔就成為第二個收我利是嘅人... 真係失失失策...
沒有留言:
張貼留言