2010 年 2 月 28 日（星期日）
2 月 28 日係中國情人節，唔好以為已為人妻嘅我會有好浪漫嘅慶祝節目。是日嘅活動包你估都估唔到 --- 搬屋！！！
當然唔係我哋搬啦！只係我一個叔叔搬屋，而我娘家又打算更換大量傢俬，難得宜家可以明正言順老點歐陽生幫手，呢 pair 岳父岳母早於半個月前已經同我哋 make appointment 啦！結果當然係做到成隻 "積" 咁啦，估唔到婚後第一個中國情人節喺咁嘅情況下度過... 雖然全日做搬運工人，不過仍然係開心，因為同埋屋企人一齊，突然覺得好應該要珍惜同佢哋相處嘅時間！（唉，老啦～）
除咗日頭 (幫人) 搬屋外，夜晚就喺屋企拆利是。家中個衰佬好執著... 一定要過咗正月十五先可以拆得... 我今次搭正正月十五拆，都只係搏大霧咋～
婚後第一個新年，唔知點解歐陽氏夫婦今年嘅戰績突然好彪炳... 承蒙各位長輩嘅厚愛，今年嘅 $100 及 $50 數量大幅增加，分別有 21 封及 19 封，已經遠遠超出往年嘅成績啦！仲有數十封 $20 呀... 至於最唔得人喜愛嘅 $10，今年只係收到 3 封咋，哇哈哈哈！
再比較返今年派利是出去嘅金額，嘻嘻嘻嘻嘻嘻嘻嘻嘻嘻...... (容許我咁開心啦)
估唔到竟然可以 cover 到喎，仲有數百蚊袋添... 嘩，真係估佢唔到！
歐陽氏夫婦在此衷心希望各位善長人翁，喺往後嘅日子繼續發揮你哋嘅善心，眷顧下我哋，等我哋嘅子女教育基金可以有增無減，咁我先可以快 d 做人媽媽嘛...
嘩咁勁~~~ 年年係咁都幾荀喎！
回覆刪除查實我都無諗過原來結左婚都有利是收架，我就無你收得咁多，我未拆呀，不過我相信無你咁荀有大銀碼收。嗰日同我老公講開過幾個月去旅行，佢同我講不如我哋攞d利是錢嚟去旅行囉，我覺得好好笑，我話你估你有好多利是錢呀？我諗佢忘記左佢已經結左婚，利是已經縮水。
[版主回覆03/02/2010 11:07:00]做咩仲唔拆利是呀?
本來以為今年利是必定有蝕無賺, 點知咁好彩... 我 d 大銀碼都係喺公司逗返嚟架咋, 佢哋叫做開工利是, 已婚未婚都有得逗, 算叫做穩陣收入, haha~
我都同你差唔多, 今年的 $100 & $50 的數量上升了好多, 我哋仲有千幾蚊袋添呀~ hehe.....
回覆刪除[版主回覆03/02/2010 11:08:00]你叻過我呀... 我袋得幾百蚊咋~ 派利是都派咗 3 千幾, 但兩公婆收到嘅利是有 4 千幾, 算叫做執返身彩, haha
嘩哈哈！估唔到係歐陽咁傳統，要過年十五至准折利是，不過唔好笑佢，我都同主任講要過年十五至批准折利是。
回覆刪除昨晚折，都估唔到比做女時逗得咁多，打開多數o係$100、$500，最有好幾封大嘢！$500都有......但做女反而無收過一封五百的利是喎，喜出望外，其實睇到都眼濕濕，無諗過親朋好友咁錫我吔！
heehee...我們都係留作小b基金！齊齊努力！^^
[版主回覆03/08/2010 11:03:00]哈~ 佢個樣唔似咁古板哩? 佢仲有好多奇怪嘢架, 遲 d 再講比你哋聽!
你就犀利啦, 連 $500 利是都逗到, 不過其實 cover 到成本已經好滿足啦!
我都係初十五先折利是, 估唔到我同你地一樣, 今年收利是的錢可以cover到派出去的利是錢. 呢種感覺真的很開心呢!
回覆刪除[版主回覆03/08/2010 11:01:00]good news!!! 如果年年都有得 cover 就好啦~ 嘻嘻~
點解嫁左仲有利是逗架~~~~~
回覆刪除[版主回覆03/08/2010 11:00:00]嘿... 咁仲有長輩 d 利是嘛, 佢哋覺得自己係長輩就要派比我... 嘻~ 仲有開工利是呢~
阿媽已經嗌定我出年要封返俾佢
回覆刪除[版主回覆03/09/2010 12:27:00]阿媽喎? 阿媽都要派? 乜唔係佢派比你至真咩?
我地鄉下唔係咁架 以前冇派利是呢樣野 每年團年飯就俾D壓歲錢老人家 之後跟隨香港習俗先有派利是呢樣野 而且我地出黎做野就冇利是逗架喇 我同阿媽講人地都係照派俾D已婚仔女, 佢話我封返大既俾佢, 佢俾返封細既我喎
回覆刪除[版主回覆03/10/2010 11:57:00]哦, 原來係鄉下習俗問題, 咁你咪會比平常人逗少好多利是囉?
哈哈~唔返鄉下就有多少, 仲有同學利是囉同埋開工利是
回覆刪除[版主回覆03/11/2010 11:05:00]咁都好 d, 叫做有得幫補下嘛~
你好, 其實我想問問你之前去北海道是否入住 Hotel Sunroute New Sapporo? 因我在網上搜尋時找到你的blog提及過... 不知你可否評論一下這間酒店? 如它的位置, 房間大小/裝修及乾淨程度以供參考?? 因我在努力準備中, 但酒店網頁本身的資料及照片都不足夠, 怕選擇錯了會掃興... 等待你的回覆, 謝謝你!
回覆刪除[版主回覆03/18/2010 11:41:00]無錯, 我係住呢間酒店架! 位置稍為遠咗少少, 離 JR 站要行 10 分鐘左右, 不過我同老公都認為可以接受, 而且天寒地凍, 散下步個人都會暖 d! 但當拖住大型行李時就狼狽咗少少... 呢個會扣少少分...
房間大小就一定唔好抱咁大期望, 日本 d 酒店房一般都好細, 基本上你放低兩個喼, 已經塞住條通道, 除非你住好貴好貴嗰 d 酒店啦, 否則呢間都係算正常大細。
乾淨程度算係中上! 我覺得唔錯喎~
其實佢嘅外觀真係一 d 都唔吸引, 而且裡面 d 裝修都唔係靚, 但算係正正常常嗰種, 加上我同老公成日都會流連喺街, 我哋只係要間房訓覺, 所以我認為住得過! 但如果你對住宿有一定要求, 呢間就未必啱你啦~