評一評、諗一諗 @ 花車篇

當大家睇到呢篇 blog 時，我同老公已經身在香港機場，準備出發去北海道 honeymoon 啦，為期 9 日 8 夜嘅旅程正式展開。希望可以影多 d 靚相，買多 d anges b. 同埋食多 d 朱古力，wakakakakaka！我哋帶咗 notebook 去架，所以我會繼續 blogging～

 

 

由於有 blogger 關心花車公司服務態度，促使我正式寫一寫各個 service provider 嘅用後感啦！今次就先講 3 間花車公司先～（5 個  為滿分）

(1) 英國古董車 MG（聯絡人：阿達 + 司機：豪師父）

　HK$3,888 / 8 小時

經 blogger 介紹取得阿達聯絡資料，佢好好人，問佢咩都會盡佢所能答你。初接觸佢時距離婚期仲有一年有多，有好多嘢我哋都唔識點安排，佢都好好心機教我 d 時間應該點預先好，而且佢好 nice，好鐘意同客人溝通，所以服務好好！婚前一星期已經 send email 通知我司機名及手機號碼，係最快向我交待嘅一間公司！

司機豪師父好好人，雖然年紀老咗 d，但仍然好有禮貌。佢手車揸得好定，而且佢係安全第一嗰種人，每次轉線一定會打燈，車速 keep 住 60 左右。不過由於我哋去註冊時遲咗出門口（唔關司機事），我一上車同豪師父講：「唔該盡快，註冊唔遲得！」結果佢喺尖沙咀同我左穿右插，又爬頭，又衝紅燈，cut 晒線咁同我有咁快得咁快去到緣美傳說，我估... 我同歐陽生今次打爛咗佢個齋缽... 真係唔好意思！

1121 當日冇遲到、亦冇早退。都 OK 熟路，最後負責 keep petty cash 嘅姊妹都比咗少少 tips 佢。車當然靚，仲係靚絕嗰隻，當日好多路人甲乙丙都同我影相，呢個價錢租到 MG 用，真係好抵！

(2) 生記 - 28 座（聯絡人：Alan Wong）

　HK$1,380 / 8 小時

其實我比 5 個豬頭係咪慷慨咗 d 呢？服務當日係點講真我唔係好清楚，不過之前一路同我聯絡嘅 Alan Wong 都 OK，我係憑住呢一個 point 比佢滿分。由於佢嘅收費定價係視乎我當日去咩地方，book 佢時我只得 4 個 locations，直至婚前 3 星期我加多一個 location，佢都 free 埋比我，而且做嘢都有交帶。落訂時仲搞笑，佢話可以用完車先一次過比錢，但我本身唔係太放心，結果我叫佢收我 $500 訂金，好似求人收我錢咁，hahahaha！

時間方面... 我估計應該冇遲到啩，總之我哋玩完接新娘遊戲但敬茶前已經知佢到咗我樓下，因為當時我見 d 兄弟姊妹已經盤算緊要搬 d 咩落樓。至於車牌號碼及司機聯絡電話就喺婚前 2 日先比我，都 OK 啦！

(3) 寰宇 - 60 座（聯絡人：Isa Chan）

　HK$650 / 一程

呢間公司又係零 concept，係 3 架花車裡面接觸得最少嘅一間。我連架車係咩樣都冇見過，唔敢比 5 個  咁多啦。不過暫時都收唔到任何 bad comments feedback，所以 4 個  都應該受得起嘅。

聯絡人 Isa 好盡責，佢好犀利，每次打去問嘢，佢一知我個姓氏，就知我係 1121 嘅單，我估計佢每日都會背佢公司 d 單 number 囉 (勁) ～ 收費方面，由於我只係停一個站，屬於點到點嗰種，佢 quote 我 HK$650，係問咗咁多間最平嘅一間！而且唔記得邊間酒店同佢哋有長期 contract，估計應該唔會太差，所以最後都 book 咗。但要留意，如果最後一個落客站過咗 00:15，司機要收取 HK$100 凌晨附加費。其實我當晚應該冇 over 00:15，不過見辦喜事，無謂同佢計咁多，而且又冇兄弟姊妹跟車，萬一真係 over 咗又唔知叫司機向邊個收錢，結果我都比咗 HK$100 個司機，仲加咗一封利是比佢，佢應該賺晒啦！唯一稍嫌負責人 Isa 比較遲先覆到我車牌號碼及司機聯絡資料，因為佢喺婚前一日 5:00 後先打比我，不過都趕得切嘅。