佈置 + 上頭花絮 @ 20-11-2009

2009 年 11 月 20 日（星期五）

終於我都唔洗再孤軍作戰啦，因為呢一日有歐陽生、伴郎同伴娘同我九龍新界一日遊。

出發之前，先作最後努力佈置新屋。奶奶話過，如果四大長老健在，新屋係完全唔洗佈置，不過我真係好 pat pat 痕，好想加 d 囍慶氣氛，結果我唔理佢嘅說話，拉埋歐陽生佈置新屋（其實都只係貼一副對聯啫，唔過份吖）。

除此之外，我哋仲換埋新床單，唔知咁算唔算自己安床呢？hahahaha～

搞完新屋之後就渣渣臨出門口拎衫啦。先去旺角永隆拎褂。去到褂店，嘩，都幾多人喎，個個都迫晒呢個時候拎衫，又排隊又 check 衫都搞咗好耐。之後再搭地鐵去法國婚紗拎多兩箱禮服。雖然 serve 開我嘅阿 Mi 撞啱放咗假，不過其他 Sales 都好 nice，仲問我要唔要試多次，我呢 d 唔執輸嘅當然再試啦，check 埋其他配件 ok 晒就閃人。伴娘小姐好盡責，好留心咁聽個 sales 講解所有配件數目，幾多個衣架，d 嘢點跟點跟，我就扮晒嘢喺側邊聽下就算，因為我知到時我一定會好亂，都係交比伴娘啦。

下一站就係拎花球，由於距離個花球 ready 尚有一個鐘，所以我哋四條友就坐低 high 個 tea 先，當比對腳抖下，期間再吹下水，諗下聽日所有嘅濕碎嘢，一個鐘頭話咁快就過咗。

攞埋花球之後趕快返屋企，一入屋已經見到婆婆嫲嫲都到咗啦，媽咪亦都幫我買好頭花（雖然唔係好啱心水）。分好部份禮服比歐陽生同伴郎拎走，伴娘再幫我 double check 多次 d 嘢，大家都散水啦。

食完飯，老豆就成日問我幾時開始佈置，睇嚟佢好似好 hyper 咁喎！問佢做咩咁心急，佢又話怕兩個老人家眼訓，唓... 一陣我半夜一點幾上頭，就算宜家佈置完都係要等架啦！好啦好啦，見佢咁開心，就即刻佈置屋企。細佬負責幫我貼透明囍字貼（佢最拿手），老豆幫我貼門口對聯及囍字，媽咪幫我手入利是、洗茶具，換 cushion 套等等濕碎嘢。見到全家都為我出力奔波，心底其實覺得好 warm！尤其是我老豆.... 點講呢... 佢平時都有少少大男人，不過我知佢其實好錫屋企人，可能礙於身份問題佢都收收埋埋。老實講，其實我最錫我阿爸，或者嚴重 d 咁講，我有戀父情意結！見佢咁開心咁落力幫我呢樣嗰樣，真係好感動！

我最鐘意貼喺門牌邊呢個 Q 版囍字，好卡娃兒呢！

淨係佈置屋企都玩到好夜，係時候排隊沖涼等上頭啦！媽咪已經煲好碌柚葉比我沖涼。1120 天氣好凍，著住件新睡衣走出沖涼房時，我不禁破口大罵：「點解冇人設計一件睡衣係 for 冬天出嫁嘅新娘子呢？凍死人咩！」

大家再閒談多一陣，上頭吉時差不多到啦，長輩們出動幫我打點上頭用品，我就繼續 si si sir sir，因為真係好凍呀！

來啦來啦，夠鐘啦！坐低影返張相先！

儀式開始...

媽咪都好緊張，我見到佢成晚一得閒就背下嗰四句上頭句子，頭三句當然冇問題啦，第四句叫做「四梳梳到四條銀筍盡標齊」。其實，我媽咪一向都係心口不一架（我覺得係一個病），好搞笑，第四句佢讀咗：「四梳梳到四條辮子...」我：「四條辮子？」結果要 NG 再嚟過第四句，我仲出埋聲帶住佢讀先冇讀錯。

上完頭當然要影相留念啦！未來弟婦今晚都過嚟訓呀！

幾時都話我老豆好錫我，佢唔洗我等埋對龍鳳燭燒晒先訓，佢自己一條友喺度等。不過試問我又點會咁快訓得著呢？結果我望住佢，佢望住對龍鳳燭，大概半小時之後先燒完，佢唔洗三分鐘就訓著。而我... 一來有 d 緊張，二來天氣真係太凍，對豬腳久久都唔暖，又點訓得著？碌咗一輪之後都係唔得，最後我好衰，伸咗對腳去媽咪度取暖先訓到咋，當時已經係三點半～ (冇錯，呢一晚我同老豆 & 媽咪訓呀！）

************************************************************************************

至於歐陽生都算醒目，識得叫佢細佬幫佢影上頭花絮！

奶奶好潮呀，上頭係食酒釀丸子，唔食湯丸，老公有口福啦，yummy！

本來講好由奶奶同佢上頭，到最後唔知點解變咗老爺出手（歐陽生件新睡衣都好潮啫！）

上完頭，佢話要學下人哋 d 女仔咁，夾塊扁柏上頭喎，冇嘢好玩！細細佬又肯同佢癲先吹漲！