評一評、諗一諗 @ 婚紗相篇

1) 緣美傳說

（Sales & 揀相：James Leung & Zita Chan　Camera Man：Sam & Joe　化妝：Doris）

呢輯係我同老公人生中第一次嘅婚紗相。其實當初都約得好急，因為根本冇諗過會影。事緣我當時 book 咗美麗佳人做主打影外影，點知收到 James 通知，凡係 book 咗佢哋註冊嘅客戶都可以 free 一輯 pre-wedding，起初都唔想影，因為歐陽生太忙，怕請唔到假，但後來諗諗下，當係一個練習都好，結果喺好倉猝嘅情況底下促成咗呢輯 pre-wedding。

當日化妝師 Doris 好盡責，幫我化咗一個好正嘅妝，髮型又係我心目中想要嗰 d！我同歐陽生兩個乜都唔識，Same & Joe 就好似 twins 咁幫我哋係咁影。雖然外景及造型唔多，不過佢哋嘅拍攝手法同其他公司好唔同，我都好慶幸有一輯咁特別嘅婚紗相。由於係 free 嘅關係，原本只可以影 2 小時，唔知係咪因為同佢哋太 friend 玩到唔知時間，結果我哋由 2:00 影到夜晚 7:xx，真係太開心啦！

大概 2 星期後收到電話可以揀相，當然放工就立即衝上去睇相。一見 d 相就兩眼發光，或者因為人生第一次咁靚女，加上佢哋 d 角度真係攞得幾特別，影咗 2 百幾張，我哋都買咗好多，最後當然要加錢買相啦！不得不提嘅係原來 d 相係由 James 一個人執晒。講開真係好對佢唔住，因為老公影相嗰日爛咀，James 好好心機逐張逐張同佢執，搞到 James 話嗰排連夜晚發夢都夢見老公個咀.... hahahahaha，真陰功！

　

2) 法國婚紗

（Sales：Sammie　Camera Man：阿 June　化妝：May　揀相：Christine）

法國婚紗 --- 又係另一間好好人嘅公司。

影相前口頭 request 咗阿 June 影，估唔到真係安排到比我，都已經好 thank god 了！（因為 esdlife 充斥住好多 bad comments 嘅 cam man）

個妝都唔錯，造型方面係我最滿意嘅一間公司，所以要多謝阿 May！阿 June 超 pro，佢都幾一絲不苟，好多嘢佢冇信心就唔會影，夜晚我同老公都有少少疲態，不過佢完全冇，而且佢仲努力過我同老公。助手阿飛又係好人一個，舖裙尾，拎花球完全唔洗我操心，嗰日佢好似做阿四咁 serve 我哋及阿 June，搞到老公都有 d 唔好意思。

揀相方面，如果有睇我揀相後返嚟匯報嘅情況都知道我係有一個超優惠價... 其實我都唔記得當時係點同 Christine 傾，不過總之大家好啱咀形啦，我還衫嗰日都仲走去同佢打招呼，而且每次 expo 都入去探班，又變咗 friend 底！

　

3) 美麗佳人

（Sales：Winnie　Camera Man：阿信　化妝：佳萍　揀相：阿 Mag）

美麗佳人係我第一間 join 嘅婚紗相公司。其實有少少懷疑係被人昆入局... esdlife 嘅評語有好有唔好，不過算啦，唔 join 都 join 咗，唯有接受。

講真，相比起其他 join 咗嘅網友，我諗我算係好彩嗰班。當然，美麗佳人仲有地方需要改善啦，e.g. 待客態度。好彩，我遇到嘅人唔算太差。至於攝影師嘅功架.... 點講好呢？之前 esdlife 大讚阿信影得好好，我當初都滿心期待去影相，但係睇相嗰日覺得只係不外如是，或者我哋同佢擦唔出火花啦。而且衰 d 講句，我覺得佢影得有 d hea，好多位只係影一兩張就話走，雖然...... 我知道大熱天時 (26/8) 叫人同我影外景係辛苦咗佢，不過呢 d 就叫專業嘛，嫌熱的話不如冬天先打開門做生意囉！

揀相方面真係一場耐力戰！6:30 開始傾傾傾，傾到夜晚 11:xx 先肯屈服，講真，佢哋已經收得唔算平，加 $360（定 $380?) 先加一張入相簿，不如我直情比個戶口 password 你明攞我 d 錢好過啦，何必大家都咁辛苦呢？好彩，我同歐陽生一向都係夜鬼，你趕收工，但係我哋唔趕，又唔眼訓，最終都以一個 OK 嘅價錢成交。

奉勸各位有心 join 嘅網友，呢間公司唔係 join 唔過，不過要同佢哋好好打一場心理戰及耐力戰先唔會比佢搶到錢。

　

評一評、諗一諗 @ 場地篇

1) 註冊場地 - 緣美傳說（負責人 - James Leung + Zita Chan）

我同歐陽生喺無任何溝通嘅情況底下，唔知點解大家都唔會選擇註冊處及即場證婚。由於我哋唔係教徒，但又好想可以感受一下行禮堂嘅感覺，所以一早就有共識搵呢類證婚公司。

當時呢類證婚公司都有好多選擇，包括已經摺埋咗嘅 2 in 1、伊甸園、世紀見證、奇妙恩典等等。我哋第一間係睇 2 in 1，貪佢位處尖沙咀區，而且去咗睇場後，個佈置都好靚，收費又合理，一切都好好，諗住落訂架啦。不過我突然醒起附近仲有一間新開嘅緣美傳說，本住睇下無死嘅心態下，睇埋緣美傳說先再作決定。

當時上到去，其實緣美傳說收咗工架啦，佢哋大家食緊飯盒，我同歐陽生都唔係幾好意思，不過佢哋照樣好熱情咁招呼我哋。一參觀佢哋個白玫瑰禮堂，我就一眼愛上。感覺好莊嚴，個禮堂裝修得好靚，似返一個真教堂，職員招呼又好，雖然價錢貴過 2 in 1 少少，不過始終 2 in 1 個感覺童話 d，而我同歐陽生一向又唔係呢 type，加上歐陽生同負責人 James 好啱傾，所以諗多兩諗就扑鎚 book 緣美傳說了。

可能因為我喺 esdlife 佢哋條 thread 過份活躍咗 d，搞到緣美傳說上上下下 d staff 對我都有好深印象，每次上去佢哋係嗌我 OJ （小妹喺 esdlife username）而唔係嗌我 Jenny！亦因為咁，我哋同佢哋變得越嚟越 friend，同佢哋已經成為好朋友。

自從 join 咗佢哋之後，有咩新嘢都會通知我，d staff 真係好好。到大約婚前 3 個月開始，同佢哋嘅聯絡多咗好多，做擬結婚通知書、綵排、揀 cocktail menu 等等全部都 ok。幫我主持婚禮嘅律師叫張翼雄（Jacky Wong），ok 啦，耐唔時搞一搞笑咁囉。當日我用個場時有少少 over run，佢哋都即刻 remind 我，因為下一 pair 嘅新人已經到咗，再用個場就要加錢，我都即刻通知 d 兄弟姊妹要撤退。Cocktail 方面，我就一啖都冇食過，歐陽生就食咗一舊餅咁大把，不過後來聽返 d comments 都讚佢哋 d 食物質素，所以總括嚟講我都會推薦緣美傳說比大家。

2) 設宴場地 - 麒麟閣（負責人 - 陳經理　當日 in charge manager -  Simon）

我同大部份嘅準新人一樣，喺整個婚禮入面第一樣 book 嘅 item 就係酒樓。22 個月前我真係好沮喪，自問喺 2008 年 2 月就去搵酒樓已經算好早，但因為 1121 真係太好日，有好多心水酒樓都已經被 booked。我同歐陽生即刻不敢怠慢，後來一位朋友推介麒麟閣酒樓比我哋，我哋就即管上去睇下。好在佢哋仲有期，立即 pencil mark 咗先，一星期後就帶埋四大長老上去睇場及試菜，好在，一 take ok！

負責人陳經理真係好人都爆，我唔想再讚佢，如果有睇開我個 blog 都知我已經讚過佢好多次，而且佢真係 free 咗好多嘢比我哋。

雖然佢哋新娘房入面冇獨立廁所，但係當晚我根本冇時間去廁所，成晚... 應該喺 5 點幾及送客換返 casual wear 後去過一次，所以個人意見... 冇獨立廁所都唔成問題！

新娘房 - 好大，我、化妝師、媽咪奶奶、整個姊妹團共 6 個人喺晒入面都冇問題，仲可以再塞多 d 人入嚟都仲得，地下仲要擺晒雜物喎。

音響 - 全晚大致都 ok，只係偏偏喺 march in 後我致辭時個無線咪兩度冇聲。酒樓有專人同我播碟，唔洗自己煩，始終佢哋 d 職員先識搞部機，所以都係交比佢哋做好 d，成晚都冇播錯嘢。新娘房入面亦有電視直播出面情況，所以都唔怕會 miss 咗嘢。

服務 - 我自己就覺得無問題，但可能因為主家席，一定唔會得失我哋啩？不過都聽唔到有親戚朋友話有問題。當晚 in charge manager Simon 都好好，提點我哋及兄弟團好多嘢，席前影相有兩個人專門搬 chairs 及倒茶，減輕咗伴娘嘅工作，仲會提我飲水、換衫、切蛋糕及送客時間等等。

食物及紅酒 - 呢樣一定要比好高分。歐陽生嘅二伯係做廚師，佢一路食一路向我老爺奶奶講 d 嘢食好好，媽咪嗰邊都收到好多 good comments。其中個合桃露糖水最多人讚，連我個潮舅母鐘意到打包晒 d 糖水走...（佢平時係唔會做呢 d 嘢，我都好 surprise）。另外，歐陽生嘅叔叔係做酒保，喺我敬酒時佢都有親口同我講支酒好靚好好飲，到我敬酒比我自己 d 親戚時，我有一位 auntie 好鐘意飲紅酒，佢向我大讚，仲叫我有剩的話送幾支比佢，好可惜，酒樓包嘅紅酒只限堂飲，哈哈。

利舞台有好多酒樓，1121 當晚間間酒樓都有婚宴，本來都擔心 d 賓客會爭 lift 用，點知又冇乜問題喎... 我一路送客一路留意住 lift 口嗰邊情況，一 d 事都冇，佢哋散得好快，冇塞車情況出現，連最後一樣擔心嘅事都解決埋，太太太幸運啦！

評一評、諗一諗 @ 服裝篇

1) 裙褂 - 永隆繡莊（負責人：劉小姐）

　中五福 - HK$580

有睇開我個 blog 嘅都知道，我本來唔係 join 永隆，我 join 嗰間叫溢昇，後來因為溢昇執咗笠，佢就 pass 咗 d 單比永隆繡莊。我冇咩損失，反而令我可以用一個好平嘅價錢租到一套中五福（因為永隆嘅租金普遍係貴過溢昇）。

服務態度方面係完全冇問題，跟單都跟得唔錯。好多褂都好新淨，保存得好好。最記得婚前一日去拎褂時，我完全唔知道要比按金，佢張單又冇講過，我見其他人都有比張 HK$1,000 支票佢，但我就乜都冇準備，佢哋冇黑面，冇比說話我聽，只係抄低咗我身份證號碼就比我拎套褂走。雖然張單寫明要 2:00 前還褂，但係佢都講明唔洗跟足，亦冇叫我入封利是喺褂箱，不過後來我唔知呢 D 係咪規矩，所以我照入咗一封，佢哋見到都有多謝我。check 褂時有少少嚴謹，幸好我冇整爛佢套褂啫！

 2) 婚紗晚裝 + 新郎禮服 - 法國婚紗 （負責人：阿 Mi）

　HK$4,188 / 6 件

本身我幾鐘意法國婚紗 d 衫，每次去親 wedding expo，第一件事都會去睇佢哋嘅新衫 fashion show，反而 monalisa / 新天地等等就唔係我杯茶。其實 join 之前都有睇過元朗及尖沙咀 d 舖頭，但係總係有晚裝或者婚紗係唔啱心水，出奇地喺法國婚紗就睇得中，而且鐘意佢成日都有新款，唯一唔好就係冇得轉款同埋要好快 final confirm 款式。當然，你有權臨結婚前先去 final confirm，但係一定冇得 hold 心水款，因為佢哋 d 衫都比人 hold 得好快。

由於冇得轉款，所以去 final confirm 時冇時間規定試幾耐，當日我就同埋兩位知心 bloggers 玩咗五個鐘，但係 d sales 都唔會黑面，而且仲會勁搵款比你試。明明有 d 款係麻麻地，自知唔洗試上身，但係佢哋都會勸你試下先，唔會側側膊唔想 serve 你。

跟開我張單嘅阿 Mi 我絕對對佢係有讚無彈。佢超好，試衫時會不斷比意見你，而且會教你點襯好，搵出自己優點。我哋去 fitting 時當然成日遲到啦，但係又係冇黑面。到我 final fit 嗰日，要揀埋所有配件，阿 Mi 摷晒成間舖 d 嘢比我揀咁，頭紗又係，我之前係勁鐘意拖地頭紗，估唔到法國婚紗都有一個，但係冇理由註冊用嘛，所以好貪心咁叫阿 Mi 借一個長一個短比我，點知佢都好好肯借出，叫我記得還返比佢就得啦，超開心！至於新淨程度我係絕對滿意，幾新淨，又冇甩線，改衫嘅手勢唔錯，只係後來自己唔爭氣，婚前幾日個胸再瘦平多少少，結果當晚成日跌裙...

男士禮服方面唔算太多款，有 d 靚款的確係要加錢 upgrade，不過有 d 唔 upgrade 嘅都好 ok 喎，而且歐陽生喺 final fitting 嗰日仲轉緊款，轉晒之前 hold 嗰 d～

張單寫明要 2:00 前還衫，不過阿 Mi 都話唔洗跟足，只要天黑前還到返嚟就 ok 啦！不過 check 衫真係三間公司之冠，幾嚴謹。當日仲忍唔住喺 reception call 埋阿 Mi 出嚟，醒咗封利是比佢，因為佢真係好幫得我手！我高度推薦佢！！！

3) 媽咪奶奶衫 + 伴郎伴娘衫 - 元朗雅麗

　HK$2,088 / 4 件

雅麗冇一個特定嘅負責人，基本上你入到去邊個得閒就邊個 serve 你，平均嚟講佢哋嘅服務態度都 ok 嘅，但當然唔夠上述嗰兩間咁好啦！

由於我只係租媽咪奶奶 + 伴郎伴娘衫，新娘衫係點情況就唔知道。我 join 佢嗰時距離婚期仲一段長時間，所以佢哋都自動自覺比咗三次轉款機會我。新款都返得 ok 快，但當然新娘衫返得快 d 啦！唯一唔好就係佢哋舖頭好迫，每次星期六、日、假期去試衫的話，就算你 make 咗 appointment 都要等。雖然佢哋迫，又只得兩個 fitting rooms，不過又唔會迫你快 d 做決定，佢會比時間你考慮，唔會因為舖面細叫你快 d 諗去疏道客流。

新淨程度就真係一 dd 啦，有 d 真係幾舊，但佢哋勝在多衫，舊的話最多揀過第二 d 款，唔會揀唔到。

1121 當日，伴娘比其中一個姊妹踩爛咗條裙，我已經預咗還衫時要賠錢，點知佢哋完全冇 check 衫，只 check 件數，我可以全數按金拎返走，真係好好彩。

4) 姊妹裙 - Plovee

　（買走價 - HK$198 / 條）

好慶幸喺揀姊妹裙時冇失手入咗黑店，Plovee 係一間值四粒星嘅公司。佢價錢 ok，不過唔知係咪佢哋太多客，雖然未至於甩單，但我每次帶班姊妹上去 fitting 時，佢哋都好似未 ready 好咁。而且又係唔多 fitting rooms，周不時要等試身，又冇位比人坐，要大家企住等，其實我都唔係幾好意思。

fitting 時有少少亂，姊妹 Fion 嗰條裙比起 1st trial 時短咗 4"，當時已經係婚前兩星期啦，佢又冇現貨可以比我即時換過條，結果要重新 order，一等就要等一星期左右。當時我同姊妹 Fion 都好驚趕唔切，幸好最後都準時交到條裙比我，新嗰條仲好 fit 身，完全唔洗改。仲有另一樣就係佢哋 d 辦本身有 pad，但係連 pad 試上身後，個個都擁有 40F 身形咁，訂款時已講明唔洗要 pad，但係最終又跟埋 pad 比我，不過還好，只係剪走個 pad 就可以解決問題。所以新娘子自己要跟得緊少少，但相比起其他姊妹裙舖頭，我覺得 Plovee 仍然值得推薦嘅！