《囍字 cushion 套》
呢個 cushion 套其實 N 個月前已經買咗，本來諗住上次上廣州時一次過買埋芯，不過某一日返到屋企，發覺媽咪無端端買咗三個新 cushion 返嚟，咁我又無謂再買多兩個芯啦，所以索性只係買 cushion 套就算數。
至於呢個 cushion 套嘅價錢，真係平到笑，只係 $10，無錯，係 $10，一對喎！係一次我上網睇嘢時誤打誤撞見到有個賣家放出嚟，嗰位朋友啱啱結完婚，不過佢當日用咗第二對跪墊，100% 全新，所以我就諗都唔諗 bid 咗佢返嚟啦！
本來媽咪話唔洗買，因為佢同老豆都唔洗我哋跪佢，我呢個媽咪真係半個潮媽，好多嘢都由得我發揮，或者因為佢係第一次辦囍事乜都唔識啦（男家嗰邊都係），制肘及規矩都唔多！當初向四大長老講結婚時，佢哋都叫我哋唔洗擺酒，旅行結婚算數架，不過我同男朋友都想開心 d 熱鬧 d，所以就決定擺酒，我初時聽到佢四個咁嘅反應都好愕然...... 真係估唔到原來我思想仲守舊過佢四個。
講返跪先...... 老豆媽咪話唔洗我哋跪佢，但係我覺得佢始終係我父母，跪吓都冇乜所謂，而且仲有其他長輩要斟茶，所以我都係認為買埋好 d，如果到時真係唔洗我跪...... 都係 $10 啫！
********************************************************************************************
《閃爆手鍊》
相信各位 bloggers 對呢條鍊一 d 都唔會陌生！
本來唔諗住買，因為化妝師及法國婚紗都有包埋首飾，不過某日喺元朗 shopping 時途經一間格仔舖，7 行石都只係賣 $5x，唔買好似有 d 走寶 feel，所以好快就決定買咗佢！10 行都好似只係 $7x，不過男朋友話唔好去到咁盡，買 10 行的話會太誇張，遲 d 冇機會帶得返喎！
*******************************************************************************************
《嫲嫲買貴金》
上星期嫲嫲打比我話佢供滿咗個金會，要買 d 金比我做嫁妝。嘩，宜家 d 金咁鬼貴，好似買唔過！所以全家上上下下都說服嫲嫲諗住叫佢遲 d 先買，不過可能老人家思想就係咁，佢覺得金會既然供滿咗喺度就要去拎金，「廢事拖得太耐」、「今日唔知聽日事」、「下個星期可能會繼續升」等等...... 好多個理由。算啦，既然係咁都冇辦法，結果尋日出咗去九龍買貴金。
我呢個不孝孫女都唔想佢洗太多錢，叫佢買一隻算數。
我鐘意佢有「百年好合」四個字！Sales 猛話呢個係新款...... 唔好昆我啦！
是日金價：9510，癲架......
其實嫲嫲一共有 14 個孫（可想而知我屋企家族幾咁龐大），嫲嫲由細到大都特別錫我，我係知道嘅！不過 9510 真係好 X 貴！
下個目標：豬牌
目標人物：我老爹
哈哈，老豆成日問我想要咩結婚禮物／個婚禮仲有咩未買，話想送一份／贊助吓我。諗起媽咪已經買咗 3 對龍鳳鈪 + 花花鍊 + 龍鳳戒指 + 花花耳環比我，我仲以為老豆有份夾錢所以先咁重皮買咁多，原來冇...... 估唔到我娘親竟然咁大手筆...... 本來我叫老豆買紅酒，不過佢話想買 d 可以留念嘅嘢，所以佢已經口頭答應會買豬牌比我，只係等金價靚仔少少就可以行動！
至於我細佬...... 由細到大同佢感情都只係屬於一般，不過佢又竟然主動問我有冇嘢想要..... 呵呵，係時候要報答家姐啦，不過由於佢啱啱出嚟做嘢，費事掠佢太多，所以叫佢認購四大長老 + 兄弟姊妹 d 襟花手花就算啦！
9510真係好貴! 不過而家d價都好似唔會落得幾多ga la
回覆刪除[版主回覆08/11/2009 11:47:00]9510 真係超貴, 話唔想買住, 老人家又唔高興, 唯有焗買!
條手鍊… 的確好熟面口… 因為周圍都賣呢個款…
回覆刪除點解唔搵d 特別d 既款呀, 呢個款真係太…… 多喇…
同埋以我經驗, if 你要搵水晶類既新娘手飾,
一定要搵鋯石 or 日本水晶 先夠閃
唔係影相出黎, 會變成一條灰色既"野"… For your reference 啦
[版主回覆08/11/2009 12:55:00]唔止熟口面, 簡直係每個新娘必備嘅款式咁! 嗰間格仔舖冇其他款, 所以照買呢個囉~
嘩...你媽咪送3 對龍鳳鈪俾你 , 真係好錫你啊!
回覆刪除[版主回覆08/11/2009 15:22:00]所以我話當初以為我阿爸有份夾錢
D金真係超貴呀 , 我都仲係唔捨得出手 , 可能真係要留到最後一個半個月先豁出去.......
回覆刪除你買呢條閃手鐲又真係幾抵喎 , 我成日都覺得元朗買野係抵D架.......
[版主回覆08/12/2009 11:08:00]係呀, 宜家日日等佢回落咁都幾辛苦, 佢個價只升唔跌嘅... 激氣!
係呀, 某程度上都可能因為位於元朗所以平 d ^^
嘩~~~真係好勁呀~~單單你媽咪已經買左"3 對龍鳳鈪 + 花花鍊 + 龍鳳戒指 + 花花耳環" =.="咁多金la....個日一定殺晒la~~~~
回覆刪除[版主回覆08/13/2009 10:58:00]唔係呀, 我哋唔係富豪, 嗰 d 金只係好薄.... 冇乜嘢睇架咋!
9510好貴呀... 好在之前買龍鳳鈪o個時係8900咋... 我都要等佢平再去買鍊呢..
回覆刪除[版主回覆08/13/2009 11:01:00]haha.... 我媽咪買比我時金價係 7590 添呀~ 只係 2008 年 10 月左右嘅事之嘛~ 宜家真係升得好利害!
D金真係好貴啊~~~
回覆刪除[版主回覆08/13/2009 11:01:00]係啦, 貴到嘔!
9510............真係好好好貴..................唔想老人家破費.....點解金價可以咁高企？
回覆刪除[版主回覆08/15/2009 19:01:00]係啦, 我哋一家用晒口水話想唔買住, 但係老人家真係想安全 d, 貴少少都想照買喎~
嘩~~3對龍鳳鐲~~!!! 真係好錫你呀~~
回覆刪除[版主回覆08/16/2009 18:53:00]當我知道全部係媽咪出錢都打咗個突!
"3 對龍鳳鈪 + 花花鍊 + 龍鳳戒指 + 花花耳環" 嘩~~~好勁呀!~~
回覆刪除[版主回覆08/17/2009 11:29:00]只係好幼架咋, 唔好比個量嚇親!
9510 嘩.....好貴呀.....不過老人家心意, 同埋怕遲d唔止呢個價.....
回覆刪除[版主回覆08/17/2009 18:24:00]係呀, 佢就係咁諗, 佢驚再等的話會衝過萬呀, 所以叫我快 d 買囉!
你呢對金鈪同我媽比我個對一樣架,呢對戴出黎真係好SHARP好搶呢!
回覆刪除[版主回覆08/17/2009 18:25:00]係? 咁就好啦, 最緊要靚! 個 sales 猛話呢款係新....
你好呀, 我遲你一個星期結婚, 所以想大家交流下.....
回覆刪除你啲屋企人真係好錫你呀.....我阿媽都係買一對比我咋....我仲期待緊佢會跌番八字頭, 唔知有冇呢個可能呢???? 我奶奶唔知買咩比我, 佢又唔問我要乜, 又冇問要幾錢禮金....好驚到時無呀....
[版主回覆08/31/2009 11:54:00]nice to meet you! 好呀, 大家多 d 交流下吖!
我都等緊跌去 8 字頭呀, 但我都驚到我哋結婚前都唔會有呢一日! 我奶奶都冇問我要咩架, 所以我都唔知當日會收到 d 咩, 唔敢抱太大期望呀!