兄弟 bow 一 bow

之前一直諗住稍後時間會買 d 呔比班兄弟，咁樣影相時可以統一 d！但係話說上次兄弟姊妹 gathering 時，歐陽生隨便講咗句話會買煲呔比佢哋（諗住講笑），原本以為佢哋會抗拒，點知個個兄弟都好受落，仲好似好期待帶上煲呔嗰一刻！就係咁，我哋宜家會提供煲呔比兄弟們，大家 1121 都煲煲佢啦～～～

因為呢個原因，我又啟動我嘅 shopping mode，先喺 Yahoo! 拍賣網 shop around，好快就有 target 啦！

HK$15 / 個，好抵！同買直呔差唔多，見班兄弟好似好期待好過癮咁，就成全一下佢哋啦！

本來想買香檳金色，諗住可以同姊妹嘅香檳金裙襯埋一 set，不過男朋友話黑色西裝襯香檳金煲呔唔好睇。好！買第二行右手邊隻寶藍色又點呢？男朋友再 ban，話呢隻藍係「死人藍」喎！OK OK，最後好快就有定案，決定買第三行左手邊嘅棗紅色。不過女人永遠都係有憂慮症嘅動物，驚死棗紅色 bow 襯黑色西裝唔好睇，所以請原諒我嘅無聊...... 我自己 key 咗落去試效果......

key 完都覺得自己真係幾無聊！你、你、同埋你，唔准笑！

事實證明襯棗紅色煲呔其實係 OK 嘅！由於個賣家喺旺角有格仔舖，遲 d 出旺角睇吓現貨先買！

至於歐陽生...... 其實佢有丁點兒唔憤氣，兄弟們就四四正正煲呔上陣，可憐嘅佢只得一套豬腸呔，一套蝴蝶 bow...... 真係估唔到屎忽痕心思思想轉款嗰個係佢唔係我囉！呵呵！