98 日的自由...

時間真係唔覺唔覺咁過去，話咁快就輪到我倒數 98 日啦！

本來諗住早兩日倒數 100 日時同男朋友慶祝，不過因為有要事在身（陪 blogger 做大事及製造驚喜比另一位 blogger），就改為慶祝 99 日啦！

利用之前嗰張 1121 agnes b. coupon 換咗排朱古力返嚟

不過唔知邊到嚟嘅力量，由 8 月開始都好忍得口，暫時將排朱古力放咗入冷宮（= 雪櫃），等我完咗大 project 先慢慢嘆。

由於呢幾日病咗...

全因自己身體小器！有時真係唔到你唔信邪... 事緣我本身患有輕微鼻敏感，要每日啪兩粒維他命 C，如果連續幾日唔啪丸，鼻敏感就會演變成傷風... 但由於呢排我食多咗奇異果，諗住都含有豐富嘅維 C 就順便戒甩埋啪丸呢個習慣，幾個星期以嚟都好地地，前晚先懶醒咁讚自己：咦，呢排好似唔食維 C 都冇事喎，誰不知...... 尋日一訓醒已經不停打乞嚏，鼻水係咁流...，到咗夜晚食嘢已經開始冇味覺（因為啪咗好幾粒成藥），個鼻塞到喺銅鑼灣行街竟然一 d 煙味都聞唔到，係好事嗎？

男朋友見我唔係太妥，都冇乜特別慶祝，放工後都只係普普通通食餐飯就打道回府。本來今日豁出去打算食件 cake，但由於失去味覺關係，食乜都唔會有味道，所以求其喺 Mc Cafe 食件滿足腦裡面嘅食慾就算，真係冇晒癮！

今日就係倒數 98 日啦！引用返 1121 戰友阿闊嘅形容，大家好似一班同學仔咁，由初入學搞結婚，到大家陸陸續續咁畢業，過程真係好有趣！以前我只係一張白紙做個小師妹偷師，宜家就快輪到我畢業啦，真係悲喜交雜。希望大家繼續努力，向住你哋嘅畢業路進發！

順帶送比歐陽生一句：好好享受你餘下的 98 日自由單身生活吧！