2009 年 8 月 22 日（星期六）
喪開心...... 期待咗呢一日好耐，因為約咗我哋班兄弟姊妹團出嚟見面啦！本來好齊腳，計埋我同男朋友 total 有 14 人，不過因為伴郎個爸爸突然中風入咗醫院，所以臨時甩底，否則就真係史無前例地齊人，希望佢爸爸快 d 康復啦！
由於人數太多關係，所以食飯地方鎖定「酒樓」，貪佢有圓枱方便大家溝通溝通；而且諗都冇諗就揀咗尖沙咀區，夠方便嘛...... 好快就決定咗去北京道一號嘅潮樓，因為男朋友話潮樓 d 食物一向都 OK，尤其是呢間分店添！
訂咗 7:00 鐘枱，我同另外兩位姊妹 6:50 就上咗去，我亦都知呢班兄弟團某 d 成員（包括新郎自己）嘅習慣 --- 例遲，結果...... 等到 7:50 先齊人吖，係咪唔識「守時」兩個字？新郎自己仲離譜吖...... 新郎：我宜家喺灣仔過嚟！（當時時間係 6:45）！兄弟 A：我宜家喺屋企過嚟？<-- 吓？有人話佢住沙田，有人話佢住太子！想點先？
之前同男朋友夾過究竟點樣介紹大家認識好呢？自我介紹？有點兒似 speed dating 喎！由新人幫口介紹？其實自己介紹都得啦吓話？最後都係決定自我介紹...... 唔知點解要講埋職業，haha～ 睇住佢哋咁樣好搞笑（覺得自己有 d 衰，有點兒置身事外）！
成餐飯都係吹水居多，潮樓起菜較慢，所以我趁有空檔時就派 rundown 比大家睇。收到後大家都好認真去睇，一見到自己要拍住唔識嘅人做嘢，大家都問 XXX 係邊個，因為要認下佢個樣。
各人都比咗唔少意見我，所以個 rundown 又要改過！姊妹們有見兄弟團係例遲一族，強烈建議我要將佢哋到達嘅時間提早，亦要將玩接新娘遊戲時間延長，我係舉腳贊成嘅，所以加到 45 分鐘！另外要多謝姊妹 Anita remind 我，老實講，唔係你提我，我竟然將「keep 新娘房及夾萬鎖匙」呢個重任忘記咗，我淨係記得搵人點金器及 keep 禮！亦多謝欣欣（兄弟喎）教咗我點樣安排客人喺席前影相嘅程序，睇嚟我要慢慢諗掂佢！可能我份人比較長氣，所以 rundown 都寫得比一般人 detail，好快就傾完。不過知道又要改 rundown，少不免有 d 灰......
傾完 rundown 後繼續嘻嘻哈哈，話咁快就食完餐飯，臨走仲影咗張大合照！（P.S. 各兄弟姊妹唔好意思，我好 open 地公開咗張相，如果你哋唔想上鏡就同我講，我會 private 返！）
後排企：兄弟團（唔知點解左一、二、五好似想打人咁） 前排坐：姊妹團
我班姊妹真係好正，永遠都係一呼百應嗰隻，上次揀姊妹裙，今次 gathering 都係超合作，唔洗我提，唔洗我就呢個嗰個，兩次都齊晒人，我哋仲即席約埋下次傾遊戲及 final fit 姊妹裙嘅日子，thank you 呀！我講過，搞完呢壇嘢之後會再搵你哋出嚟食飯慶功！！！
以上呢 7 個傻婆由 F.1 識到宜家，我估都有 15 年啦！真係好多謝你哋咁合作，一口就答應幫我做奴隸，錫晒你哋！亦因為大家一早已經係老朋友，所以呢餐飯我哋都幾...... 嘈囉！傾完 rundown 後仲回味返以前 d 學生妹生涯，好懷念呀！
未搞呢個 gathering 之前其實都有 d 擔心，驚選址唔夠好、驚 rundown 上分工唔勻、驚招呼不周、驚悶親大家、驚食物水準令到大家唔想食...... 等等幾百樣嘢都會擔心，到完咗個 gathering 返屋企途中我都不斷問男朋友覺得今晚搞成點，因為我真係好緊張大家嘅感受，搵得你哋幫手，就想對你哋好 d！
分工方面，我諗都不過不失吧？多謝 Angel 姐同我講咗句：「放心啦，到時我哋會執生架啦，邊個 OK 就邊個做，唔洗擔心，schedule 都只係 for reference 啫！」簡直向我派咗粒定心丸！反問兄弟團又係咪清楚自己崗位時，歐陽生就代答：「哦，唔洗怕，我哋出名一向都唔跟 schedule 做嘢架！」（P.S. 有三位兄弟係佢嘅同事，而佢哋真係唔跟 schedule 做嘢但又完成到囉，你又吹佢唔漲呀！）
