影相日 @ 美麗佳人

2008 年 8 月 26 日（星期二）

呢一篇 blog 會比較長，有心機、有時間先好睇......

今年被我視為全年最大嘅其中一項 project --- 美麗佳人外景婚紗相，終於都順利完成啦！

其實點解我會覺得係最大嘅 project 之一呢..... 係因為我自從 join 咗之後，本來都冇咩大問題，點知忽然間喺 esdlife 有網友劣評呢間公司，之後陸陸續續有人和應...... 不過 touchwood，so far 我自 join 咗之後到我影完外景返嚟，我完全 feel 唔到佢哋有咩問題，所以呢樣嘢我覺得好值得高興！另外嘅原因就因為要節食減肥啦，又扮靚靚啦...... 搞咗我好耐，洗咗我好多錢...... 而且呢輯係我嘅主打之一，宜家終於完成咗，即時鬆咗口氣呀！

先講返影相當日，幫我影相嘅攝影師係台灣攝影師，叫「阿信」，佢有一個助手跟佢，叫「阿峰」，主要負責幫阿信執頭執尾及打燈，化妝師都係台灣薇薇嗰邊，叫「佳萍」，佳萍唔會跟我出外景，我有另外一個造型師跟我，全日會幫我及男朋友補妝，換衫，轉造型等等，佢叫「Niki」。

先講講佢哋每個人，阿信 --- 一個我覺得佢好有藝術家性格嘅攝影師！esdlife 嘅姊妹話佢好搞笑，講真，我唔覺...... 佢成日都冇表情，佢只係好專心幫我哋影相。其實開頭我有少少不滿佢...... 佢叫我哋擺 pose 嘅指示非常含糊，佢就咁講一句：「個身轉少少，個頭擰少少」，喂，大佬，你冇講邊個轉，轉邊邊，轉幾多...... 有時我同男朋友一齊轉，又錯...... 加上出到外景，人聲車聲好嘈，有時都聽唔到佢講乜，做唔到佢想要嘅 pose，佢就好似有少少無奈兼忟憎，喂，大佬，我唔係職業 model 呀！仲有一樣嘢真係搞笑，好多時一落車，佢只會喺某個位置影你 7-8 張相，當然會換 pose 啦，之後又喺另一個位置影你 7-8 張相，如是者一個地點只係影兩至三個位置就可以上車走得...... 喂，咁我山長水遠走出嚟影外景，唔係淨係影嗰兩至三個位置架嘛...... 我當時仲心諗：「嘩，咁快又話影完可以走人，咁我呢輯相都唔慌會買得多啦，連佢 package 包嗰 40 張相都唔知揀唔揀到！」不過我當時冇出聲，因為我覺得咁樣反而幾好，還掂之前喺緣美傳說都揀咗咁多張相，呢輯買少 d 相咪仲好！後來，當阿信幫我影單人相時，男朋友八卦走去阿信身邊偷望吓佢部相機，男朋友同我講返，其實佢對阿信幾有信心，因為阿信比佢嘅感覺係：「我雖然只影你數少張，但你睇相時一定會滿意，一定會買！」而且男朋友都望到佢影出嚟嘅相其實都啱我哋嘅 style...... 聽完男朋友咁講之後，我有 d 打個突...... 吓，咁我咪又要加錢買相囉？

阿峰 --- 佢個樣好細個，主要幫我哋做翻譯，不過其實都唔洗佢翻譯我哋都聽得明。佢份人都 ok，男朋友換衫時佢都有幫手整理一吓，都算盡責，而且服務態度都唔錯。

Niki --- 佢真係 super nice！基本上呢一日佢充當我嘅近身妹仔咁滯！幫我換衫轉造型不特止，而且我事先張揚我係極度怕太陽，佢竟然帶埋把遮出外景，沿途幫我擔遮......，最後因為趕住走，仲累到佢漏低咗把遮喺街，真係又辛苦佢，又唔好意思啦！仲有，每次我換完衫之後，佢都會由頭到腳幫我望一次有冇問題先比我行出個更衣室，真係抵讚！有時我同男朋友影緊相時，佢發覺我或者男朋友無論妝容或者服裝上面一有 d 咩風吹草動，佢都會即刻飛撲埋嚟幫我哋整理返，所以 Niki 的確抵讚！

最後就係佳萍，佳萍係台灣人，主要喺台灣薇薇嗰邊做化妝師，後來公司批咗佢嚟香港嘅工作簽證，所以呢一年主要都會幫美麗佳人嘅新人化妝，不過佢係唔跟出外景架，如果要佢跟出去的話，要加 $1,500，我當然唔洗佢跟啦，反正 Niki 都已經會幫我轉造型及補妝！

介紹完咁多位工作人員，我就講講當日嘅流程。我哋約好咗 10:00 要去到美麗佳人換衫化妝，當然我哋好準時咁到達啦。講起化妝，其實我都用咗好多錢，因為要喺佢哋度買安瓶...... 唉，我之前都已經帶咗兩支私伙安瓶去，諗住用我自己嗰 d 搽身，用美麗佳人嘅安瓶搽面，話晒大熱天時 3x 度出外景，用返佢哋 d 安瓶會好 d，所以我一開始好順攤咁要咗兩支用嚟搽面。後來我提議話用我自己帶去嘅安瓶搽身，佳萍話唔好，因為如果咁做的話會浪費咗我自己帶去嘅安瓶，結果...... 我個心口，背脊連埋兩隻手要用 5 支安瓶，再計埋男朋友塊面又用咗兩支，我一共用咗佢 9 支安瓶...... 計返條數，$125/支，埋單用咗 $1,125...... 真係貴啦...... 不過冇計啦，不得不承認佢 d 安瓶真係幾好，喺咁熱嘅天氣底下我全日都冇溶過妝，連男朋友咁大汗都完全冇問題！最衰佢 d 安瓶喺香港冇得買，否則我一早帶定去就唔洗比成千幾蚊佢哋袋！

裝完身之後，12:00 就開始影相，先影 studio，影完一輪準時 12:45 就出車啦！第一站先去咗中環嘅蘭桂坊及石板街，一落車...... 咦，竟然冇我同男朋友想像中咁熱喎...... 不過，可能因為中環有好多高樓大廈，係有少少焗囉，不過都出得唔多汗！當時仲已經係最烈日當空嘅時間添，所以都算 good！正值當時係食 lunch 時間，沿途有好多好多人望住我哋影相，當中不乏有外國人，我仲記得有個媽媽指住我同自己個囡囡講：Hey girl, see, a beautiful bride！除此之外，仲有個攝友喺石板街喺咁影我添...... 真係有 d 唔係好慣！

影完中環就去咗石澳，嘩...... 石澳好好好好好好多人呀，連車位都冇呀，不過我哋唔理三七廿一，梗係叫個司機自己搵位泊車啦，我哋就爭取時間去影相。不過個海灘就因為太多人嘅關係冇影到，改咗去石澳石灘影，嗰度只有一個人晒緊太陽，所以我哋簡直可以為所欲為咁滯呀！可惜，太陽伯伯太眷顧我哋，搞到男朋友隻眼都打唔開，阿信見男朋友變咗矇豬眼，影咗幾張又話上車走 lu。（你話係咪有 d 過份呢？）

下一站就去大潭，正！！！因為嗰個瀑布有水流落嚟呀，Good！場面好莊觀，啱啱又遮到蔭，所以我哋不斷影不斷影，呢度影出嚟嘅相應該唔錯！跟住就去咗唔知邊度，總之就有 d 類似木伐嘅嘢，又有好多郵艇，我哋又影踢水，又影水花，連男朋友都忍唔住要除鞋踢埋一份呀！之後就去咗聖士提反...... 其實我都唔知即係邊度，不過阿峰話去嗰度影，咁咪去囉！不過原來嗰度都唔錯喎，我哋去到仲啱啱日落添，影咗好多好多張咸蛋黃相呀！我一定會要好多張咸蛋黃相啫！

再下一站就係赤柱啦！其實去到赤柱都接近 7:00 啦，趁個天仲未黑晒，去咗嗰條酒吧街影少少相，之後又去美利樓嗰邊影，其實都冇咩特別！影吓影吓先發覺原來 8:00 啦！所以我哋都開始收拾行裝，各人都去埋 toilet 就上車返美麗佳人 lu，最後仲好準時咁 8:45 就返到，啱啱好無多無少出咗 8 小時外景！Fit！

返到美麗佳人換衫落妝，約埋睇相，搞 lee 搞 lou 大約 8:30 就正式走人啦！咁就結束一日嘅行程啦！原本約咗今個星期日去睇相架，不過可惜我唔得閒，所以改咗下星期三，希望到時唔好大出血啦！

最後，其實我幫自己影咗少少造型相架，所以都係時候睇相啦，希望唔會嚇親大家啦！

呢一位就係我嘅台灣攝影師 --- 阿信，佢話自己醜樣喎，所以堅持唔肯入鏡！

呢一位就係我嘅造型師 Niki，負責幫我換衫，轉妝，仲做埋我貼身妹仔添！

以下就係我第一套婚紗加造型，亦係唯一一套有頭紗嘅婚紗，個人嚟講幾鐘意戴頭紗，感覺真係好似出嫁咁！呢一個造型就去咗中環蘭桂坊及石板街影相！

（被男朋友偷影中......）

整個造型好有台式味道，因為係我個台灣化妝師佳萍幫我整架，所以帶有少少台式 feel~

（又被偷影中......）

終於發覺有人偷影我，所以索性正正經經影返張相先~

近鏡少少，可以睇清楚 d 個妝容！無嚇親你哋吖嘛？

而男朋友就著咗一套白色禮服襯我，感覺上 grand 少少！你睇佢幾咁滿意自己一手一腳做嘅花球？連影相都要攬住個花球影！

影完呢件婚紗之後，我就換咗一件粉黃色嘅晚裝去石澳影相。由於我係去到石澳先轉造型及換衫，而影完之後又轉咗下一個造型先離開石澳，所以我冇機會影低黃色晚裝嘅造型 lu！因為我嘅下一站係大潭，而大潭基本上係冇更衣室換衫，所以唯有轉埋造型先走啦！

轉好啦，上車出發去大潭 lu！大潭嘅造型都係婚紗，不過就 casual 返少少！

個頭都算 set 得唔錯啦！

喺大潭影完相要走啦，因為趕住入赤柱影黃昏景呀！亦輪到最後一套衫登場啦，就係好多網友都讚嘅火紅色晚裝！

不過我轉完妝之後，男朋友見到我即時講咗一句：「咦，你變咗胡定欣喎！」我答：「吓？似咩？」

同場加映我為自己做嘅指甲呀！今次好滿意，好靚呀！襯咩衫都一流，因為閃銀色就最百搭啦！

我又要再讚一次我天才橫溢嘅老公...... 我喺影相前一晚突然間同佢講：「人哋話出外景影相，好多時攝影師都唔建議成日拎住個花球架，如果有朵手花咁就好啦，不過最衰唔夠時間整吖，都係由得佢啦！」

之後我就繼續執拾影相用嘅行裝，點知過咗一陣，男朋友就拎咗呢朵手花出嚟比我試戴上手！Woo~ very nice！又有多一個道具影相啦！而且其實綁住我隻手嗰條絲帶都係 agnes b. 架，不過呢幅相影唔到出嚟！Anyway，我宜家先至知道完來我男朋友係一個萬能俠！佢可以盡量幫我完成晒所有願望，仲犀利過 Kinda 出奇蛋呀！老公，多謝你！

呢朵手花喺人哋眼中未必係好靚，不過我就好滿意啦！因為我真係冇諗過趕得切有手花用架！

DIY 花球 @ 完成篇

2008 年 8 月 24 日（星期日）補打

我日等夜等嘅花球男朋友終於都完成咗啦！我自己就好滿意啦！不過我知道男朋友對個花球仲有少少唔順眼，之不過見所有花都紮起晒，已經冇可能從頭再紮過啦，所以佢隻眼開隻眼閉！算啦，唔好咁介懷，用嚟影相啫，足夠架啦！

今次最開心係整好咗個拖尾，其實相比起人哋嗰 d 專業嘅花球，我呢個可能 50 分都唔值，不過見男朋友星期日放假特登乜都唔做，好集中、好認真、又流晒汗咁坐喺度幫我左襯右襯個花球，我都覺得呢個花球好有意義！個花球我影完相之後唔會拋架啦，當然會留返喺屋企留念啦！況且我都未決定拋唔拋花球，到時真係決定拋的話，咪最多上深圳買個平平地算數囉，反正喺結婚前都會上去一趟。

男朋友好抵讚呀，拖尾花球都比佢搞得掂，而且佢仲好有腦，個花球可以轉款架！除咗個拖尾出嚟就變成普通嘅手紮式，咁就唔洗咁單調啦！老公抵讚！！！

先嚟一個普通款嘅手紮式花球先

之前都講過，我係 anges b. fans，當然要整返個 agnes b. 花球扮晒嘢啦！所以就比我搞成咁啦.......... 都 ok 似呀呵？

之後就到拖尾啦，宜家大家所見嘅.......只係一堆雜草......

大家諗唔諗到點樣可以將個拖尾放喺個花球度呢？呢一個 point 真係要激讚男朋友...... 咁都比佢諗到！

睇真 d，個花球其實紮咗個圓圈架......

男朋友喺嗰堆雜草度整咗個勾

之後將佢哋兩個勾埋一齊......

咁就大功告成啦！

唔係賣花讚花香，但係我真係覺得個花球唔錯喎！呢一輯相影出嚟一定好有意義......（又為自己鋪定後路買相，哈哈）

DIY 花球 (半完成篇)

2008 年 8 月 22 日（星期五）

自從男朋友擺低咗個水滴型花球之後，佢呢幾日又拎返出嚟搞搞佢喎，梗係啦，就快要影相啦，佢仲唔 K.O. 個花球的話，一定會比我日哦夜哦......嘻！

佢又買多咗 d 長藤同埋買多一札紫玫瑰打算做拖尾，其實我覺得個拖尾好難整架！整得到當然好啦，不過整唔到都唔緊要，因為我之前已經收埋咗兩條 agnes b. 嘅粗絲帶，打算綁落個花球度扮係 agnes b. 花球（不過明眼人一睇就知 agnes b. 冇出呢個花款嘅花球啦！）

長藤係咁嘅樣，好似話買咗 $1x 咋

之後佢就成晚對住個花球左整右整，搞咗成晚，見到成身都出晒汗，好似好懊惱唔知點整個拖尾好..... 幾個小時之後，佢終於整咗個拖尾花球出嚟啦！

不過呢個花球仲未合格，我哋望住個拖尾...... 硬係覺得唔知點咁！我就認為個拖尾好似太長，而且太多花！我見人哋 d 花店做嘅拖尾好似得 1-2 朵花，一係就唔會有花只有葉，而且個尾都唔洗做到咁長架噃...... 所以我好殘忍咁又 ban 咗個花球一輪...... 一臉無奈嘅男朋友只好接受我嘅批評（好在...... 佢自己都覺得唔 OK，唔洗做晒衰人）。

既然大家一致認為個拖尾唔 ok，咁就拆走 d 紫玫瑰兼整得短 d 啦！搞搞搞...... 又整咗另一款出嚟啦！

呢個我覺得比上一個好，又夠圓喎，其實我覺得合格架啦！不過今次輪到男朋友自己覺得唔得，佢話太多紫色喎，打算買 d 白色花平衡返...... 其實我覺得 ok 吖，咁我咁鐘意紫色，梗係以紫色為主架啦！不過男朋友不嬲都好藝術家型，既然佢覺得有進步空間，我就全權交晒比佢同我設計啦！不過我已經提醒佢，個花球務必要喺影外景之前做好，希望可以快 d 整好啦，我好心急想見到個完成品！

要快 d 趕工、趕工、再趕工！

MUST Bring Items Checklist @ 美麗佳人

拍攝日期：26-8-2008（星期二）

拍攝路線：Studioà中環à石澳à大潭à赤柱©©©©©©©©©©©©©©©©©©©©©©©©©©©©©©©©©©©

a 新娘必備 b

(1) Nu Bra 及 Girdle

(2) 束褲或打底褲 (以防有 d pose 要坐地下等等)

(3) 安瓶

(4) 白色高踭鞋

(5) 晚裝鞋

(6) 白波鞋／涼鞋／拖鞋

(7) 護膚品（落妝後用）

a 新郎必備 b

(1) 白恤衫 x 2

(2) 白色底衫 x 2

(3) 白襪及黑襪各一對（所有男人係咪都冇白襪嘅呢？）

(4) 白鞋及黑鞋各一對（條友仔仲未去買白鞋）

(5) 便服一套（不如叫男朋友著住去啦...不過天氣咁熱 ...會唔會已經臭晒呢？）

(6) 白波鞋／涼鞋／拖鞋

(7) PSP 或者書本（比男朋友消磨時間用，我喺度化妝 set 頭時一定悶死佢）

a 拍攝道具及其他雜項 b

(1) package 正單

(2) 花球及襟花

(3) 大量清水或保礦力及體積細小嘅乾糧

(4) 飲管

(5) 牙簽（條友仔有個壞習慣，食完嘢一定要 "new" 牙）

(6) 蚊怕水

(7) 止痕藥膏

(8) 手巾仔 (比男朋友抹汗用)

(9) 防曬 (搽身用)

(10) 結婚介子

(11) Snoopy 結婚公仔一對（係喎，仲未去攞添！）

(12) 香檳杯一對 + 香檳

(13) 吹泡泡機（唔知有冇呢？）

(14) 鑽戒型鎖匙扣

(15) 已 saved／hardcopy 相辦（有需要時 save 入電話方便喺戶外同攝影師溝通）

(16) 雨傘（遮太陽，因為 8 月實在會曬死人）

(17) 電風扇（諗起就覺得熱）

Wow，好似走難咁 ~ 喺香港影都要帶咁多嘢去，如果去外地影嗰 d 朋友咪仲慘？？？

天氣預報 @ 美麗佳人

2008 年 8 月 20 日（星期三）

今日放工去咗美麗佳人 final fitting，為下星期二影外景作最後準備。我仲懶醒咁帶咗對婚紗鞋同埋晚裝鞋去襯...... 襯鬼襯馬咩，條裙腳長到死，睇到對鞋已經算好好啦！不過算啦，企定定時當然睇唔到對靚鞋啦，不過可能有 d pose 見到架嘛，既然帶咗去襯，死都要著上腳試吓效果，哈！最後仲留低晒兩對鞋，nu bra 及 Girdle 喺美麗佳人，當日影相就可以帶少 d 嘢出發啦！

試完晒 d 衫，又再傾返條路線（最終都係揀咗去赤柱，唔去中環影 lu），夾吓影相時間等等，喺美麗佳人留咗一個鐘頭就閃得 lu。本來心情都大好架...... 點知返到屋企開著收音機，唉，掛咗一號風球...... 咁點算呀！當初仲以為 8 月應該打風嘅機會唔大，個天夠清徹我先冒住會中暑嘅危險同男朋友一齊 book 8 月影外景，到時真係打得成個風的話，試想像一吓......

我等咗成年嘅婚紗相...... 唔會影得靚；

我等咗成年去影婚紗相嘅心情...... 灰晒；

我同男朋友熱切期待嘅晚霞／日落相...... 可能影唔到。

唉...... 我要藍天白雲呀！

呢一刻心情實在太忐忑不安啦，上天文台個網頁 check 吓下星期二嘅天氣先......

咦...... 好似又 OK 咁喎！啱啱嗰日會變返晴天？？？如果係真就好啦！不過颱風呢家嘢都好難預測，點知佢條路線會點吹喎！宜家仲掛緊一號風球，頭先天文台個網頁仲話今日下晝好大機會改發三號風球添！

嗱！「鸚鵡」呀「鸚鵡」，既然係咁，一係你就合作 d，今個星期快 d 打得成，咁我就可以「一個唔該」多多一日假期抖足精神，到我下星期二影相應該一天都光晒啦！最好快 d 落晒 d 雨添呀！

God Bless Me！！！！！

終於買咗金器啦

2008 年 8 月 16 日（星期六）

今日要返半日工。

呢幾日繼續留意飾金價嘅走勢。尋日嘅牌價係 7,950，今日跌多 50，即係 7,900，其實我仲掙扎緊好唔好入貨架。因為尋晚睇財經新聞時，有經濟學師預測金價有可能跌到 7,400 就會見底，但另一方面喺 esdlife 有網友引述報紙新聞話 9 月金價會升返，因為印度嗰邊喺每年嘅 9 月開始對黃金嘅需求增加，到時金價一定會被扯高。咁即係點呢？會跌到 7,400？定係會升返？當我仲諗緊點算嘅時候收到媽咪電話約我去買金器，我當然唔想佢買貴金啦，不過媽咪嘅心態好好，佢話既然定咗目標價係 7 字頭，就唔好再貪，因為永遠冇人知最低價係幾多，要追求最低價係要講彩數。我作為佢個女聽到佢咁講都覺得媽咪呢種心態真係好，如果佢識投資或者買股票，我諗佢一定唔會係損手爛腳嗰隻...... 既然媽咪覺得係時候入貨，咁我放工就返入元朗同佢一齊買金器。

入到元朗先周圍望一望 d 金價，其實我都知冇得格價，因為飾金價幾多係統一嘅，所以就睇款式囉...... 經過大福、六福、周大福、金至尊及周生生，都喺櫥窗望一望 d 款，發覺周生生好似多款少少，所以就入咗去坐低慢慢睇。喺店入面由揀金器到比錢，總共坐咗 2 個鐘，買咗 4 樣金器，分別有龍鳳鈪、頸鍊、耳環及一對龍鳳戒指，咁就用咗媽咪好多錢 lu，不過唔緊要啦，金有升值潛力嘅，到時實有錢賺啫！

龍鳳鈪 --- 個款係好傳統嗰 d，不過我鐘意喎！

龍鳳鈪 --- 睇真 d 個款係咁嘅，有少少金沙，加埋燈光幾閃架！對鈪都算粗，連個 sales 都話幾大體！

頸鍊 --- 呢條頸鍊係我最鐘意嘅金器嚟架！

頸鍊 --- 睇真 d，d 花花都閃閃地架，好靚呀！

耳環 --- 特登揀個款盡量同條頸鍊襯返一 set，雖然唔係太似樣，不過都算襯得到！

其實仲有一對龍鳳戒指架，不過因為 size 唔啱，要落單訂造，所以未可以即時攞到，訂造要等 12 個工作天，即係 9 月 2 號先攞得。

不得不提...... 尋日啱啱出咗段新聞：有 d 商戶訂下規矩用信用咭比錢要收附加費，所以我去買金器時就順便問一問周生生碌咭得唔得，原來佢哋一向都冇收附加費架，Good！提醒各位網友，如果你哋呢排去買金（或者買其他嘢都好啦），商戶收你附加費的話，你可以向銀行舉報同埋要求銀行退返手續費比你，不過記得要商戶喺張單度寫明收咗你幾多附加費，否則唔夠證據的話，銀行好難退返 d 錢比你架！

另外，由於之前我知道自己即將去買金器，所以我做晒準備功課，喺 esdlife 問晒 d 網友攞不同金舖嘅 VIP No.，暫時我有六福、金至尊、周大福、ctf 2、周生生及點睛品，如果你哋有需要，可以同我一樣上 esdlife 問網友們攞架！而我因為喺周生生買咗金器，我都入咗 VIP，所以如果你哋要周生生之友 No.，我可以比我嗰個你哋嘅！我問過金舖職員，其實 d 網友們咁樣比 d VIP No. 我哋，網友們係冇 jetso 架，所以都好感激佢哋咁好人！不過其實......我覺得嗰 d VIP no. 都冇乜大作用，只係手工有 5-6 折不等，有時如果個 sales 識做，或者你有某某銀行嘅信用咭，金舖都會自動比呢 d 折頭你，不過 anyway，無咗各位網友嘅幫忙，衰起上嚟可能一 d 折都冇，所以都要多謝佢哋無私嘅奉獻嘅！

揀相日 @ 緣美傳說 (真實版)

2008 年 8 月 13 日 （星期三）

網上世界咁四通八達，有時真係唔知係好事定壞事。發生咗 d 事唔可以講真話，睇住自己要講大話，又要諗個大話要點講，其實都覺得幾辛苦，不過好彩呢件係一件好事。

話說約咗緣美傳說呢晚 7:00 上去揀相。其實影完相當日已經諗住睇相時一定要買 d 嘢食慰勞嗰班人，所以諗住 5:30 即鬆人，先去尖沙咀間惠康買嘢食。點知大約 5:25 時，胡律師隊咗份 announcement 出嚟要人改嘢，仲要補多句：「你要開始翻譯啦，個 announcement 今晚有可能會 clear。」我香蕉佢個士多啤梨橙吖，5:25 啦大佬，我點閃呀....... 之但係都冇計架，鬼叫公司得我一個做 co. sec.？唯有打去緣美傳說搵 Zita 改時間，不過佢哋又冇期，下一個期竟然要等多一個禮拜....... 咁頂硬上先啦！好在，最後個 announcement clear 唔切，我可以大安旨意走人，不過都比想像中遲咗一個鐘先閃，落到樓即刻跑去搭地鐵啦，結果左迫又迫，又要搵嗰本雜誌 Wedding Magazine，最終都係買唔到比佢哋簽名之餘，仲遲到咗 15 分鐘，7:15 先上到去添！

上到去入咗白玫瑰禮堂用佢哋本 notebook 揀相，講真，我鐘意睇 hardcopies more than softcopies，用 pc 睇相好唔方便，比較唔到 d 相，好在豬 B 頭腦夠清醒，好多 pose 相似嘅相佢哋記得晒，仲提我要 2 揀 1，豬 B 抵讚！！！

一睇我哋 d 相，原來影咗 308 張，其實應該唔只呢個數，我記得有 d pose 嘅相佢都冇 show 比我睇，maybe 個 picture 唔夠靚，覺得我哋唔會揀。我哋先將所有相睇一次，其實我自己喺呢一次睇相時已經有大概嘅 concept 每張相要唔要。問心嗰句，其實著咗有 7 成嘅相我都滿意嘅！睇完第一次 all photos slideshow 後就開始 out 相！逐張逐張咁睇，大約 1.5 鐘頭左右，已經 out 淨 109 張，但係計一計條數，雖則係 $70 連 file，但係 109 張都好甘，結果再 out！最後 out 淨 91 張...... 最衰 Zita、Joe、Sam 成日喺我哋身邊行嚟行去，同佢哋咁熟，都唔好意思 out 相！況且身為當日 in-charge 嘅攝影師，見你係咁 out 自己影嘅相，我都驚佢哋會 hurt（但我諗佢哋應該唔會嘅，都慣晒啦）！而且佢哋又專登為我哋兩個整咗盞大光燈，燈下影出嚟嘅相雖然唔係好好好鐘意，只係可有可無嗰隻，唉，見佢哋一番誠意，又要咗嗰張相...... 所以其實如果唔係因為同佢哋熟，我諗我哋可以再 out 得多 d！

見當時都九點幾，d 相開始 out 唔落手（其實睇清楚 d 的話，應該可以再 out 多 d），就開始問 Joe & Zita 做相簿嘅價錢。佢哋有 4 款相簿，細相簿 4x6、兩本中相簿 12x？（唔記得），當中一本係電腦相簿，即係本相簿會加電腦效果，最大嗰本係 16x？（又唔記得，因為由頭到尾冇諗住要咁大本相簿），價錢：細相簿 $xxx（唔記得，唔知係咪 $1,990），中相簿 $2,990，電腦相簿貴多 $1,000（即 $3,990），大相簿冇問價錢，每本相簿最多可以放 20 張相！

由於我哋揀咗 91 張相入晒相簿，所以要做 4 本相簿，結果決定要兩細兩中（其中一本中相簿要電腦相簿），見 Zita 係咁篤計數機，總數要 $10,xxx，豬 B 見佢再篤咗個 8 折，不過都係唔出聲講我哋知究竟幾多錢，之後佢就走去打比 James。最後有結果啦，就係唔開單住，因為 James 會再打比我哋傾，Joe 話到時可能會有 surprise 咁話喎！好，咁就走啦，落去諾士佛台食飯睇奧運女排...... 睇到最緊張時 James 打嚟同我跟進...... 果然如阿 Joe 所料有意外驚喜！佢會將我今日揀咗嘅相加做相簿價錢除 2，即係收我半價！嘩，呢 d 服務喺邊度搵！其實我哋都當咗大家係朋友！佢真係對我哋好好，成日想我哋用最平嘅價錢去享用佢哋嘅服務，Good！佢話可以同佢嘅 partner 傾掂佢，仲話可以叫相簿公司收平 d 佢，所以就有空間計我半價！James  仲叫我記得唔好話比其他人知添，見佢對我咁好，保守秘密當然冇問題啦！

不過，今朝就知自己瀨咗嘢！！！

話說今日返到公司例牌上 esdlife，當時已經有網友叫我 share 吓尋晚睇相睇成點，我醒呀，無講我哋有 308 張相咁多，亦無講用咗幾多錢，只係講咗我揀咗 92 張相！之後...... 悲劇發生啦，James 大約喺兩個鐘頭後打比我，問我做咩咁快話比 d 網友知我揀咗 92 張相...... 佢話尋晚已經通知咗我叫我同人講我只買咗十幾二十張相...... 吓？我聽唔到呢句喎，哎吔，可能尋晚諾士佛台太嘈啦...... James 話宜家咁樣通咗天，佢嘅 partner 見到我個留言，搞到 James 要幫我講大話啃咗佢，唉，真係抱歉啦！最後佢幫我諗咗個藉口，話我咁講其實係佢哋教我嘅，因為要幫佢哋做宣傳咁話喎，最後都傾得掂繼續以半價優待我！真係辛苦晒佢哋，我仲內疚到爆添呀，下次點可以唔請佢哋食嘢呢？

既然傾掂咗價錢，最後都同 James 傾傾幾時比錢佢哋同埋幾時上去揀咩相入邊本相簿，不過 James 話唔需要特登上去，可以約出嚟食飯，佢仲會叫 Zita 燒隻 CDR 比我等我慢慢揀...... 真係好啦！咁...... 唔知幾時先有相收呢？

上天對我真係好，比我識到呢一班咁易話為，又咁 nice 嘅人！多謝！

揀相日 @ 緣美傳說

2008 年 8 月 13 日（星期三）

等咗好耐好耐，終於騰到時間去緣美傳說睇相啦！之前約好咗 7:00 上去，我本身放 5:30，仲諗住先去超級市場買 d 零食慰勞吓佢哋，一路都覺得自己實趕得切啦！點知到咗 5:25，上司比咗份嘢要我即刻做，仲同我講話好有可能今晚要加班.......... #!%&@$^* ，人哋諗住 5:30 即閃架嘛...... 唯有打去緣美傳說睇吓可唔可以改時間，不過佢哋個 schedule 又冇期，如果真係改，又要等多一個禮拜！好在後來同上司傾過之後覺得真係趕唔切做晒嗰份嘢，結果都走得甩，不過就足足遲咗一個鐘先由公司離開，零食都唔夠時間買就要衝上去，最後上到緣美傳說已經 7:15 左右，遲咗 15 分鐘添。

上到緣美傳說後，佢哋就拎部 notebook 比我睇相，其實我一直都想睇 hardcopies 多過用電腦睇...... 用電腦睇有一個弊處，就係當你 out 晒 d 相之後，好難將 d 相若嘅相再做比較...... click 嚟 click 去咁，有 d 麻煩，又怕會走漏眼，所以揀相時最緊要頭腦清醒，記住有 d 咩 pose 已經揀咗，如果遇到有 d 相嘅 pose 相似，就只可以二揀一等等嘅策略。

之不過當我一見到 d 相，我就真係開心晒！佢哋影得好靚，整輯相比到我有一種好 sweet 嘅感覺，我 exactly 就係想要呢種 feel，佢哋完全做得到！而且...... 我仲發覺原來我嘅笑容都幾甜（請各位勿嘔），不過我覺得係佢哋影得好啫，而唔係我笑得甜囉！初時佢哋叫我哋有邊 d 相係決定要嘅，就 save 落另一個 file 度，但由於真係覺得張張相都好靚，我同男朋友決定調返轉，將唔鐘意嗰 d out 走，咁會比較容易。睇咗兩個鐘左右，終於 out 晒相，淨返嗰 d 其實都有 d 相係可要可唔要，咁我就開始問吓做相簿嘅價錢...... 佢哋有 4 款相簿，講真唔算係好靚嘅款，但勝在簡單唔花巧，結果，我當然照單全收做晒相簿啦！

其實我都唔知一共用咗幾多錢買相及做相簿，但係我認為唔會太貴啩，$70 連 file 真係平過出面好多。而且真係影到我想要嘅嘢，最緊要係大家都鐘意 d 相嘛！不過就同男朋友夾好，下次影美麗佳人及法國時唔會買太多 lu。

本來我哋仲可以留低揀邊 d 相入大相簿，邊 d 相入細相簿，但由於揀相都揀到太夜，唔想阻佢哋收工，唯有另約時間再上去啦！今次真係失策，見到 d 相之後失晒魂，帶咗相機去都唔記得偷影，走咗之後先諗起其實揀相期間有好幾次機會可以偷影，不過真係對住 d 相開心到忘晒形，連影相都唔記得，等我下次去揀相入相簿時再影，希望到時記得啦！

正呀, 今日飾金價 $8,140

好緊張好緊張！

呢幾日不斷留意飾金價，聽聞因為油價下跌，連同金價一齊跌！

早幾日我上 esdlife 睇住個飾金價一日比一日低，仲要每日平幾百蚊嗰隻喎！

其實由準備結婚開始，每次上 esdlife 都見到每日嘅金價，起初真係高得好緊要，過萬蚊都見過，到呢排終於下跌啦...... 繼前日 8,6xx、尋日跌到 8,350，今日跌到 8,140 啦！

我即刻打比媽咪講個金價比佢聽，因為我之前都定咗目標價係 8,300（媽咪貪心 d，目標價係 7 字頭）。之前媽咪仲話想出年先買，佢成日都覺得出年會跌（純粹佢自己覺得），我反而驚金價不斷升，到咗下年要過萬，我都唔想媽咪買貴金！經我一輪游說後，我哋決定等多 1-2 日，因為財經新聞入面 d 專家好似話仲有得跌多少少...... 萬一咁唔好彩升返，我諗都唔會升得太過份啩~

希望金價快 d 跌到 7 字頭，咁就係入貨好時機啦！Yeah！

P.S. 真係愛死 esdlife 咁體貼有埋每日飾金價，否則我諗我要到籌備婚禮嘅後段先記得要買金器！

DIY 襟花@完成篇

早幾日終於搞掂咗個紫玫瑰襟花啦

，咁去美麗佳人及法國婚紗影婚紗相時就有得用 lu ~~~

睇睇個製成品先....

（影得唔係好清楚）

其實.........我覺得個襟花係勁有進步空間囉.........硬係覺得 d 襯花同朵紫玫瑰距離得太遠，不過我已經好努力咁令佢兩個融洽相處架啦..........唉，算啦，都係影 1-2 輯婚紗相要用到佢啫，況且都冇人咁仔細睇個襟花啦，只要個樣唔失禮就比佢過關啦！

*************************************************************************

同場加映，男朋友終於動手整個花球啦！不過我哋都仲未收貨，因為：

(1) 唔夠圓

(2) 仲有大量嘅後期制作及加工，例如要駁枝等等

下面呢個角度都還可以，不過都係嗰句 ------- 唔夠圓，而且白色嘅花好似多咗 d

呢個角度仲勁

，唔夠圓之餘竟然可以紮咗水滴型出嚟，我想問

，未婚夫先生：乜原來你有紮水滴型花球嘅潛能？？？失敬，失敬.....

試問咁又點樣可以收貨呢？個花球經我狠批一論之後，結果男朋友又將個花球放埋一邊，或者 ....... 佢好氣餒

，需要擇個好時辰及好吉日先再動手 ....... 唔知幾時先等到呢？

外景路線篇 @ 美麗佳人

美麗佳人個 package 有 8 小時比我哋影外景，所以去揀衫嗰日其實都同佢哋傾咗初步嘅路線安排架啦。

聽返影咗相嘅朋友仔講，一般都會喺早上 9:00 左右到美麗佳人換衫化妝 set 頭，之後就喺佢哋個 studio 影少少相當熱身一吓，大約 12:00（最遲 12:30 喎）就開始出外景啦。由於我第一站就想去大潭影相，而由美麗佳人去大潭必定會經過中環，美麗佳人嘅職員建議我哋可以落車影少少中環日景。其實我同男朋友都冇乜所謂，所以暫定條路線會咁：

Plan A

Studio à 中環日景（例如擺花街，1914，石板街，煤氣燈）à 大潭 à 石澳 à 中環夜景（SOHO 區或蘭桂坊等等）à 美麗佳人

由於我好唔鐘意影名店區，而男朋友又好唔鐘意影立法局，所以夜晚其實繼續留喺中環的話都冇咩地方好影。加上宜家又日長夜短，保守估計夜景只可以去到一個景點，所以呢一個景點絕對唔可以揀錯架！

當我哋同美麗佳人嘅 staff 提出我哋想去 SOHO／蘭桂坊影夜景時，其實佢哋都唔係太贊成。雖然我影相嗰日係閒日星期二，但根據佢哋嘅過往經驗話比佢哋知喺蘭桂坊好難影到靚相，一到夜晚嗰度好多人，角度一定攞得唔好，而且要預咗幅相入面隨時會有好多路人甲乙丙丁...... 而且...... 我又唔係好慣有咁多人望住我影相，仲要著住嗰件隨時會爆線嘅紅色晚裝，咁點算好呢？？？所以同男朋友商量一輪之後，我哋作出少少修改，得出第二個選擇：

Plan B

Studio à 中環日景（例如擺花街，1914，石板街，煤氣燈，蘭桂坊）à 大潭 à 石澳 à 赤柱 à 美麗佳人

將中環夜景改做赤柱黃昏景（正呀，赤柱可以睇到日落，一定影到咸蛋黃）；將蘭桂坊改喺日頭影，咁就唔怕到時太多人唔慣啦...... 不過又冇咗夜晚嗰種味道 lu~ 之但係咁喎，我同男朋友都係瘋狂地鐘意呢 d style 嘅相（唔知係咪叫剪影）：

最好就連個樣都睇唔到添，唔知點解覺得好有 mood，即係類似咁：

聽聞呢個時間叫做 magic hour，所以我改影赤柱應該可以影得到！既然係咁...... 我係咪應該更加要改路線，捨棄中環 SOHO 而改去赤柱呢？不過諗返轉頭，保守估計由 12:00 開始出外景影到 8:00，喺赤柱影呢 d 效果嘅相頂龍影到 7:00-7:30，個天點都黑齊晒啦，咁淨返嗰少少時間又可以點算好呢？根本唔夠時間去其他地方，但係又唔想蝕咗比美麗佳人，咁即係要喺赤柱繼續影到 8:00 先收隊啦，但係赤柱夜晚有咩好影呀？？？唉，諗呢 d 都諗到好煩，如果真係要改行程，最遲要喺 final fitting 之前要提出架啦！

趁住尋日又係星期二，我同男朋友就打算落去蘭桂坊實地視察一吓環境，睇吓同樣嘅星期二，同樣嘅 7:00-8:00，蘭桂坊係咪真係有咁多人先！點知，颱風北冕吹咗嚟香港探我哋，就算真係落去蘭桂坊視察，準繩度一定唔高，既然係咁，惟有等下星期二先再去過啦！

亦因為北冕嘅訪港，我要改期去緣美傳說睇相添......

揀衫篇 @ 美麗佳人

2008 年 8 月 3 日（星期日）

今日約咗美麗佳人 6:00 落去揀婚紗及晚裝，準備今個月 26 號去影婚紗相。我哋好準時 6:00 就到啦，去到由 Catherine 全程幫我揀衫，估唔到原來佢咁後生，仲好好傾添！

落到去佢哋揀衫嘅地方，都有幾排婚紗晚裝比人揀，款式叫做 ok 多啦！因為我知道佢外租衫仲多款。其實我都有落單 join 外租衫，不過佢哋都偏貴（好似 4 件衫 $4,xxx ），所以最終喺法國婚紗 join 咗外租（6 件衫 $4,188），而美麗佳人呢張外租單就可以改為影相用，咁都好 d，唔洗白白比咗錢冇得用返！我今次影外景有 4 個造型，即係可以揀 4 件衫啦，所以我決定揀兩件婚紗兩件晚裝。

其實我都醒架啦，見有 blog 友 join 咗美麗佳人，佢試衫時有得影相，所以我咪帶埋部相機去囉，點知 Catherine 唔比我影相！不過算啦，我可以喺佢哋個網站度搵 d 影咗相嘅新人，cap 佢哋件衫出嚟！

一去到先揀婚紗，我表明我要揀拖尾婚紗，嗰度大約有 2x 件拖尾婚紗比我揀。不過佢哋冇相簿，要睇衫就要成件拎出嚟睇，都睇得有 d 辛苦。其實我想揀件釘工重 d，因為我一向都偏愛釘工重嘅婚紗，不過考慮到釘得幾咁天花龍鳳都好，影相出嚟其實都睇唔到 d 咩，層次先係最緊要。但係玩層次的話，美麗佳人 d 衫又麻麻地，結果試咗大約接近 10 件婚紗左右，我就 hold 咗以下呢兩件啦！

（P.S.：由於我係 cap 人哋 d 衫出嚟，所以可能冇咁清楚，尤其是 d detail 位，大家將就吓啦！）

第一件：掛頸婚紗

Catherine 及男朋友都話呢款比較高貴，我本身幾鐘意呢件，不過一 d 都唔覺得自己變高貴咗。

掛頸婚紗嘅背面 --- 其實背面有長長嘅拖尾，可惜呢張相影唔到個拖尾，而且呢位朋友仔揀咗好少著住呢款婚紗嘅相，所以 show 唔到出嚟。

第二件：Low-cut 婚紗

呢件釘工比較重，我始終都揀咗一件釘工重嘅婚紗，不過影出嚟...... 其實真係見唔到 d 釘工。

呢件同上面嗰件一樣，不過呢張近少少，睇到 d 釘工嘛？

呢張會唔會再清楚 d？

件婚紗背面就係咁架啦，其實個拖尾都唔算大，不過都係攝影師嘅功勞啦，影到件婚紗個拖尾好似好大咁。

揀完婚紗就揀晚裝啦！身為一個紫色 fans 嘅我，我當然希望揀一件紫色晚裝影相啦！可惜美麗佳人嘅紫色晚裝唔多，就算有...... 都唔係我心目中嗰隻紫色，所以我唯有揀其他顏色啦！考慮到有可能落中環影夜景，梗係有咁艷得咁艷啦，所以我同男朋友一致揀咗一件紅色晚裝。呢件晚裝都著得我幾辛苦...... cutting 非常之貼身，由於我擁有一個豪華臀，呢件衫就偏偏將我個豪華腎表露無遺...... 男朋友就覺得好靚（男人嘅角度始終同女人唔同），至於我...... 有 d 覺得好似將自己嘅缺點 show 晒出嚟咁！不過無可否認呢件衫幾靚嘅......

有個小小嘅拖尾仔~~~

至於另一件晚裝，我想搵返件啱日頭著，所以揀返 d 柔和少少嘅顏色，但係柔和得嚟又唔想太淺色，經過一輪篩選之後，就揀咗黃色啦！呢件仲係新返添，我搵咗咁多相，得最新一輯嘅呢位朋友仔著過，所以我估我係頭五個著呢件黃色晚裝嘅人，好嘢！

其實呢件晚裝喺中間位有粉紅色 lace 架？大家有冇見到？下面嗰張相會唔會清楚少少？

結果，我就係揀咗呢 4 件衫到時出外景影相啦，成個過程只係用咗 2 個鐘頭左右！之不過，由於件掛頸婚紗個背開得太低，加上黃色晚裝係 deep V，所以我要買 nu bra 呀...... 仲諗住次次都可以著住 girdle 添！宜家冇咗 girdle 幫我收肚腩，我就要靠自己啦！所以今日開始又要進行減肥計劃，而且仲要不容有失嗰隻，如果唔係到時 d 相就會有豬腩肉啦！不過唔著 girdle 都好嘅，因為唔著 girdle，我真係瘦 d 喎！

其實試衫嗰陣 Catherine 都有 sell 我買佢哋嘅 nu bra，佢聲稱佢哋嘅 nu bra 可以著到 80 次以上，又話係日本造，又話台灣薇薇都係用呢隻牌子等等...... 不過承惠 $500，咁貴...... 其實我知道質素好少少嘅 nu bra 的確要五六百蚊一個，不過講真，除咗結婚會著之外，我諗我平時都好少著，既然係咁，不如買坊間嗰 d 幾廿蚊或者百零蚊嗰 d 算數啦。

至於男朋友...... 其實佢都有 3 件衫 + 1 件 casual wear 去沙灘著，所以佢都有 4 件衫啦，拍得住我！佢嗰 3 件揀咗黑、白（可參考第 5 幅相）、銀灰（可參考第 3 幅相），而其中黑色仲係燕尾服添（可參考第 7 / 8 / 9 / 10 幅相）。

***********************************************************************

仲有另一個好開心嘅消息，尋日收到緣美傳說嘅電話，我哋嘅相已經初步搞掂咗，約咗星期三去揀相...... 好嘢！！！

不過...... 呢一日亦係我比人放血嘅日子......