瘋狂の夜 ~ 《Lady GaGa - The Born This Way Ball》

2012 年 5 月 3 日 (星期四)



期待已久嘅 Lady Gaga 演唱會終於來臨啦！諗返起撲飛時真係頭都大埋，連續幾日準時 10:00 呆坐電腦及電話面前，但係偏偏買唔到飛。本想放棄，好在皇天不負有心人，真正嘅闊太 M 透過某 d 關係成功幫大家攞到飛（闊太真係唔同 d），好嘢！有人攞到飛，成班跳舞嘅朋友仔當然個個都想去朝聖啦，7 個人全部都 say yes！不過吸收過教訓，知道企位只會攞苦嚟辛，所以大家一致決定買第二貴嘅坐位飛，$1,280 + 195 手續費，其實你問我，我係覺得貴嘅，不過話晒係國際天后級 Lady Gaga，而且我又未睇過外國歌手嘅演唱會，再再加上今次 Lady Gaga 嘅歌我都識得算多，應該唔會悶。

我哋睇嘅係第二場，門票上寫 7:30 開 show，有朋友睇咗第一場，話咗我哋知 8:30 先開 show，所以大家一於 8:20 先入到場。其實之前我已經嚟過 Asia Expo 睇 Aaron，所以我都知場地一定冇紅館咁好。



館外有演唱會紀念品賣，不過因為我哋到達時已經差不多夠鐘開 show，所以排隊嘅人唔多。本來大家都想買 d 紀念品，不過自己知自己遲，都係坐低咗先，最多完 show 後先再買。



8:20 左右坐低，對面看台嘅觀眾已經開始自製人浪，大家都好 high。玩咗好幾轉，準時 8:30 Lady Gaga 就出現大家眼前啦！佢一唱歌，個個都企晒起身，所以我真係企足咁耐。從來都冇試過睇一個演唱會嘅氣氛係咁 hyper，Gaga 成日都叫人 put your hands up，所以我隻手好痺，不時要換手，要減 byebye 肉就啱晒  -_-"



整個演唱會其實真係有好多香港歌手值得學習嘅地方。Gaga 換衫係奇快，唔知點解嗰頭入去，十多秒後佢可以喺另一邊以新 look（包括新歌衫及新髮型）見大家。而且我鐘意佢一路換衫一路仲唱住歌，感覺上好似冇等得太耐。

另外服裝舞台設計其實都好值得睇。可能因為場地空間有限，佢個演唱會只得一個城堡做背景，但係一個城堡其實已經可以玩到好多嘢，呢樣係值得佩服。服裝方面，接受到嘅就會接受，接受唔到就會覺得好似過份咗，不過我又明白外國歌手嘅思想始終同中國人唔同，我又接受到喎。

 

演唱會裡面，其實快歌慢歌都有唱。當然大家耳熟能詳嘅快歌如 Telephone, Love Game, Bad Romance, Born This Way, Judas, Just Dance, Poker Face, Alejandro 等等全部都有唱。一直都欣賞唔到 Gaga 嘅歌喉，以為佢只係造型出位先有咁多人識，不過當佢唱慢歌時，佢嘅歌喉就表露無遺啦，十個讚！至於跳舞方面，老實講，我哋 7 個人入去全部除咗想睇 Gaga 之外，最想睇到就係舞蹈上嘅驚喜，可惜當日嘅 dancers 令大家好失望，去到呢 d 大 show 竟然仲有跳唔齊嘅情況出現。應爆嘅冇爆，又好似冇乜大驚喜。

大約廿幾三十首歌後，演唱會於 10:30 左右完結。或者大家都知道根本冇可能賴死唔走嗌 encore 可以嗌得返 Gaga 出嚟，所以當散場時所有觀眾都好乖，一個一個排隊離開。當晚其實非常盡慶，氣氛 hyper，人亦 hyper，好多時唱歌唱到喉到沙埋，好彩第二日返工把聲冇出事。

完 show 後，7 位老友當然要影返張自拍照。不過技術始終未到家，連續影咗幾張都總有人得半邊面，一係就手震...... 睇嚟要多多練習。



《後記 --- 我前世係好人？》

有時，我真係會諗係咪我上一世做咗 d 咩好事？今世遇到嘅所有人全部都係好人（包括伴侶、朋友及同事）。我好想多謝生命中有每一個你嘅出現。有咗你哋，我就覺得我一生人多咗 d 歡笑。

就好似我哋呢 7 個人咁。大家分別於 2010-2011 兩年間認識，或者可能因為大家有共同興趣 --- 跳舞，將大家連繫埋一齊。有朋友將以上呢張相 upload 咗上 Facebook，竟然有人問我哋 7 個係咪識咗好耐。其實唔係，當中最長嗰個應該只係識咗兩年，最短嗰個一年都未夠，不過唔知點解我哋 7 個當中嘅友情就好識相識咗 20 年咁。或者因為大家都係成年人，做所有嘢都已經唔再計較，一切以朋友行先，所以同佢哋一齊去玩去食係完全冇壓力。

當初去學跳舞純粹打算做下運動，同埋做一 d 自己想做好耐嘅事，識到呢班朋友真係我嘅 bonus。我衷心講一句，真係覺得好開心，我生命當中有你哋 7 位嘅存在 ^^。