6 小時的闊太生活

2012 年 4 月 25 日 (星期三)

是日，同咗三位跳舞好朋友一齊渡過咗 6 小時嘅闊太生活。

話說，朋友 A 及 朋友 J 公司要清假，而佢哋不約而同有 ??.5 日假（即半日假）。佢哋打算放假，但又唔想虛耗，所以約埋我 + 本身真係闊太嘅朋友 M 25/4 一齊放半日假。我不得不重申，我公司個 HR 係廢廢地，冇人理 d 假，亦冇人落 order 要清假，所以我做咗幾年，唔知點解 d 假可以儲到 3x 日（誇張）。見有大把假比我光明正大地去浪費，所以加入咗做「半日闊太」行列。

當日，其中三位上班一族嘅靚太（當然包括我啦，^^）一點鐘放工後一齊搭車出佐敦，目的係去按腳 + 做足浴。四位熱愛跳舞嘅婦人，平日最疏乎嘅莫過於為足部按摩。經朋友介紹後得知原來佐敦區有好多又平又正嘅足浴舖。但當然要小心選擇，嗰區同樣有好多「色情架步」。朋友曾經試過該區嘅「知足常樂」及「水雲間」，$99 有 45 分鐘按腳，裝修及技師亦不錯，一於就揀佢啦！

坦白講，今次係小女子第一次按腳（當然唔計之前喺泰國做 spa 嗰 d）。所以坐低後二話不說選擇女技師，貪佢力度冇男技師咁大，而且同佢講明我第一次按，唔好太大力。Um........ 但係按落又發覺自己原來係 OK 受力，朋友話係身體健康，所以唔覺痛喎 <--- 但願如此！另外由於我長期都有肩頸痛問題，或者因為平時孭單邊袋，加上長時間使用電腦，所以大家都同意加錢做 15 mins 肩頸。四個師奶又傾又講，連技師都笑埋我哋一份，按到 3:15 左右離開，因為 book 咗 3:30 去 Ritz Carlton 嘅 "The Lounge & Bar" high tea 呀！

The Lounge & Bar 位於 ICC Building 102 樓，景觀當然好啦。但因為當日冇刻意註明要坐窗邊，所以侍應亦冇特別為我哋安排。但係唔緊要啦，上星期仲係不斷咁落住雨，當日冇行雷閃電已經要感恩啦！

Ritz Carlton 為高尚酒店，氣派當然係非凡啦。樓底打通咗兩層，所以一 d 壓迫感都冇。

餐具亦特別精緻



酒店提供幾款 afternoon tea set，我哋 4 個人，勉強都可以叫做 "人多"，所以先 order 咗一個 afternoon set for 2，另外再散叫一個 club sandwiches + 一個 salad。



欣賞酒店夠貼心，每枱都有全新未開封嘅茄汁及沙律醬，如果你冇用，仲可以拎走自用添，細細支都幾方便架（不過我哋食 sandwiches 時拆開晒嚟用 lu）！

Club Sandwiches

Afternoon tea set for 2

我仲叫咗 Jasmine green tea，朋友就叫咗 Ginger tea 及 latte



好，要評論啦：

先講環境...

環境當然攞滿分啦，枱與枱之間唔迫，現場有 live band，係唔會令你覺得嘈嗰種感覺。

再講服務...

當然係 OK 嘅，酒店級水準點可以服務差呢？但唯一係漏單...... 我哋叫咗個 salad 不翼而飛。期間已經向侍應生查詢叫佢跟進，應就應咗我哋，但冇人向我哋講返究竟係漏單定係未出。直至埋單時我哋睇單先知道佢哋真係漏單..... 或者係因為侍應生落單時只係靠記性（冇任何紙筆／手帳 mark 低），難免有出錯情況。

最後講食物水準...

4 位靚太一致裁定。。。。。。。唔好食！最敗筆竟然係個 afternoon tea set，入面有好多甜品／茶點都只係好睇唔好食。大家都一致認為試過就算，唔會有下次。

總括嚟講，環境、服務等等都係冇大問題，但食物水準就真係有待改善，講緊係二百幾蚊一個人食個 afternoon tea，豪一次算數啦。

嘆完下午茶，又夠鐘一齊去尖沙咀會合其餘幾位靚太上跳舞堂。大家有講有笑咁上完 1.5 小時之後，難得的一次齊晒 7 個人，所以冇雷公咁遠行去翠華晚飯，貪佢可以好嘈，7 位 ladies 聚埋一齊，聲浪真係唔講得笑。