5 月 9 日.... 係我嘅生日~ 歐陽生一早下咗旨叫我請幾日假，藉口多多~
一時又話想同我去海洋公園 + 一齊上深圳幾日，一時又話接狗狗返嚟比我玩。不過真係點都估唔到今年會離開香港慶生，咁大個女都應該係第一次。等我放假前仲同 d 同事講我會喺香港，公司有嘢搵我就打比我添。
不過我係點發現嘅呢？
生日前幾日，一直都半信半疑應該唔只去海洋公園咁簡單，因為當電視機賣海洋公園廣告...
我：「吖，嗰日一定要玩乜乜乜乜呀！」
歐陽生：「咦，睇嚟你真係好想去海洋公園喎。」
我：「吓，乜唔係架咩？」
歐陽生（即刻提高聲線）：「係！係！」
雖然唔係好信，但又的確搵唔到其他蛛絲馬跡，就索性唔去諗，無謂破壞一場驚喜（如有的話）。
直至生日前一晚...
我：「聽日我哋幾點起身呀？」
歐陽生：「8:00 啦」
我：「吓？咁早？仲早過返工喎！去海洋公園啫，唔洗咁早呀？」
歐陽生：「你唔怕會同 d 自由行迫呀？」
我：「咁都唔洗 8:00 咁早呀？我唔理，我生日想訓多 15 分鐘！」
歐陽生：「唔得呀，咁要 7:45 起身架啦！」
心想一定有古怪，去海洋公園時間應該任由自己決定，點解一定要 8:00 起身？加上見佢為相機叉電，平時去海洋公園都唔會咁隆重其事，不過我嗰一刻真係冇去多想。仲有，我仲發現佢揭開過睡房嘅地台床，因為揭起過後，d 枕頭一定會移晒位。我嗰刻就諗：「唔，佢一定係放咗份生日禮物喺入面！」
生日當日，歐陽生好準時 8:00 起身，我就例牌賴一陣床，但見到歐陽生好精神奕奕立刻起身梳洗（平時佢會同我一齊賴床架嘛），佢仲係咁叫我起身，好驚我再訓落去。當大家梳洗完畢後，我仲心諗，都生日當日啦，點解佢仲唔拎份禮物出嚟架？嘻，不過好快，歐陽生就叫我由床下底拎個喼出嚟，入面放咗三腳架，佢話諗住帶埋去。我仲話：「唔洗帶埋腳架呀？」佢：「我鐘意帶呀！」我以為係一個叫我揭開地台床嘅藉口，一打開.... 咦？同平時一樣嘅？冇禮物喎，唔通收埋咗喺個喼入面？再打開個喼，真係得腳架咋喎，冇其他嘢。正打算閂埋個喼之際，點解有一個小公文袋嘅？封面印有「新華旅遊」 logo？？？？？？？
打開一看...... 印有我哋個名嘅 e-ticket + hotel voucher，目的地係三亞市，呵呵呵呵....... 好嘢，我飛啦~~~~ 原來係坐 11:45 機，唔怪得佢一定要我 8:00 起身啦。
最貼心嘅係歐陽生已經偷偷地幫我執好晒行李，連最緊要嘅防晒都幫我帶埋，的確好窩心。回想返生日前幾日，佢的確成日搵藉口問我 d 防晒放喺邊，one day con 放喺邊，我宜家就知道點解啦！問咗佢好幾樣我去旅行都必需帶嘅物件，佢都一一執好晒，連行程都編排好，老公你真係一級捧！
是次慶生之旅以 hea 為大前提，所以每一日都只係去一個景點。第一次去旅行連行程都唔洗我理，實在太爽啦！
《回想。。。。。》
話說某日收到朋友 A facebook message 約我 12/5（六）tea 一 tea。我一口答應。
原以為係普通朋友間嘅 tea gathering，點知原來都係歐陽生嘅安排。
佢真係好鬼馬，竟然託朋友 A 扮約我 12/5 tea（我哋行程係當日由三亞返香港），原來佢係驚我約咗其他人，所以夾埋朋友 A 約咗我先。我嗰朝日見到張機票，仲同歐陽生講：「咦，12 號返香港，咁我咪去唔到朋友 A 個 tea 囉？」歐陽生：「冇所謂吖！」我望一望佢個表情，即刻明解晒：「哦.... 原來你哋係夾埋嘅!!!!!」
Any 肥，老公多謝你一切咁貼心嘅安排。
我知道你日日要返工，仲要花心思時間去幫我執行李，編排行程。而且網上又冇 reference，最 update 都只係講緊 2009 年嘅遊記，唯一只可以信旅遊書。雖然旅程上有好多意料之外嘅事，不過我知道到你已經盡咗最大嘅努力，我 feel 到嘅！Thank you！
