一個 Surprise Dinner

2011 年 5 月 6 日 (星期五)

星期五，放工後如常去上跳舞堂。上堂前，其中一位好朋友 (兼好 dancemate) whatsapp 我，問我今日放學後有冇特別事，當時其實已經聯想到有一餐 birthday dinner，^^

9:30 落堂後，同學們火速執拾個人物品，我從頭到尾都唔知道原來真係食飯，當問及會去邊度食，同學 A 回答: 「我哋去食法國私房菜。」心諗呢一餐一定唔慌平，要大家請客真係唔好意思，不過完全冇想像到貴成咁。

呢間法國私房菜位於銅鑼灣 SOGO 對面，一步入已經覺得十分有情調。餐廳分間了十多個房間，房間與房間之間以活動木板分格，同學 D 仲開玩笑話似「架步」，而我就認為似玩星相占卜、塔羅牌、水晶球等地方，但明顯睇得出裝潢特別。

甫坐低，dancemate 們已送上生日禮物! 又係 agnes b. 朱古力，佢哋真係好了解我。相識只有一年多，其中有啲仲係新相識，已經係我肚入面條蟲，識得話:「佢又鐘意食朱古力，又鐘意 agnes b.，呢樣嘢最啱佢!」<-- 完全 bingo!

稍後侍應生遞上 Menu，前菜、湯、主菜、甜品、飲品有不同嘅價錢，無論你點叫，總之每人 min. charge 為 $320。

餐前麵包非常香，配以牛油、什麼什麼醬，我試咗一小塊，本來想再食，但怕之後食唔落主菜，好唔抵架嘛，嘻嘻!

前菜叫咗煙鵝肝配蘋果沙律

本來想叫香煎鵝肝，但見呢個煙鵝肝有兩粒星 (即 chef's recommendation)，諗住既然係推介菜式，一試無妨，可惜我認為稍為遜色，都係香煎好味 d!

其中幾位朋友就要咗呢個沙律... 佢哋話好好味!

主菜係豬扒，超級超級好味!

我切咗部份分比幾位朋友試食，佢哋都讚不絕口! 本來有一個朋友食緊羊肉，佢已經覺得好好味，但當試完我個豬扒後，立即覺得自己份羊肉唔好食，如果我有機會再去我必定會試返呢個! =P

食完主菜，又係時候要攻甜品。朋友 D 嘅心太軟，賣相一流!

朋友 A 嘅焦糖燉蛋，本來想試一啖，但傾傾下唔記得咗，朋友已經好快食晒。

我嘅 apple crumble，好味道， ^^

飯局間傾跳舞、傾工作、傾家庭、傾食物 (其中一位為甜品店老闆)，不知不覺原來已經過咗三個多小時，如非侍應門叫我哋先埋單，都唔知原來已經係 23:50。

埋單時知道每人要夾 $700，我非常非常之唔好意思，但大家乃念我呢一年嚟為咗跳舞班默默付出，無功都有勞，你哋對我咁好，我會唔捨得去生 BB，離開你哋，離開跳舞班架..... 點算呀?

P.S. 部份相片取自 openrice.com