試驗成功 - 桂花酒釀丸子

2011 年 4 月 23 日 (星期六)

提起桂花酒釀丸子，我同老公都大愛呢種甜品。

記得第一次食... 係喺荃灣某一間上海舖，當時覺得好香好好味，丸子好煙韌，好想食過翻尋味。從來都冇諗過原來自己郁手整的話，時間只不過十分鐘左右。

經 sweet sweet 嘅 Gogo 介紹，某日放工去咗銅鑼灣嘅「老三陽」買材料。好就好在樣樣嘢都可以買現成，慳返唔少時間，如果要我自己搓丸子，我應該老早就放棄。

價錢唔算太貴，三樣嘢合共 HK$52，不過我哋兩公婆都食得好狼死，首次試驗已經鯨吞半袋丸子，我相信呢袋丸子只夠我哋兩個食兩次。相對地酒釀 & 桂花糖就可以用好耐。

1. 先煲滾三碗水 (Gogo 食譜係兩碗，不過我見好似好多丸子，三碗水應該差不多)，等 d 丸子滾起後浮上水面就可以撈起 (過程其實只需約 1-2 分鐘)。

2. 加入 3-4 茶匙桂花糖煮溶 (由於歐陽大少極度鐘意桂花味，我比 Gogo 食譜建議嘅 2-3 茶匙糖多咗少少...)。

3. 加入 2 茶匙酒釀 (賣相比較醜陋)。

4. 撈埋 d 丸子就可以開餐啦！

老公評語話似模似樣，成個人即刻飄飄然... 梗係啦，我係一個勁少煮糖水嘅人，煲湯煮飯就冇問題，宜家比我知道咗咁易整呢款大家都愛嘅糖水，唔飄飄然就怪啦。第二日返娘家食晚飯，仲認屎認屁話要整比家人食添。

有興趣嘅朋友可以試下，滿足感一定大增，^^

題外話：有冇人知道呢 d 急凍丸子除咗「老三陽」有得賣外，仲有邊度有得賣呢？要由銅鑼灣拎到入元朗嘅屋企，宜家天氣未算最熱就勉強可以...