2011 年 5 月 9 日 (星期一)
今日我大晒!
星期一生日, 當然攞咗假唔返工啦, 你知啦, 8/5 同埋 10/5 都係假期, 我呢 d 懶蟲好難說服自己返工架嘛~~~ 又有一連 4 日假期, 好嘢!
好多朋友問我, 連放 4 日假期, 又遇啱自己生日, 會唔會去個短 trip 呀? 答案係... NO! 生日做 d 乜? 咪就係喺屋企等送冷氣囉! 冇辦法啦, 紅假人哋都要休息, 唯有趁自己攞咗假, 等送貨囉... 好在送貨時間係下午 2:30, 都叫做有得訓晏 d!
至於夜晚就會去 Harbourside @ InterContinential Hotel 食 buffet! 本來想 book 東方文華酒店架, 不過早一星期打去都已經冇位, 連 waiting list 都 full 埋, 冇辦法底下唯有貴 d 都照去洲際.... 真係戥老公個荷包肉赤 ($638/head)。
約咗老公 7 點多喺尖沙咀地鐵站等, 呵... 點知有花收... 勁 surprise! 但送花過程極度搞笑...
當我哋見面時其實佢手上係咩都冇, 離開地鐵站時經過一 d 花槽, 佢突然間停步, 我都未為意佢停低咗, 只係聽到沙沙聲, 初時以為佢個袋比 d 花勾住, 當我回頭望一望佢時, 先見到佢喺花槽入面拎咗紮花出嚟.... hahahahaha, 先生你搞咩呀? 不過... 呢個 surprise 我收到晒.... 多謝老公!
由於訂咗 8:30 先開大餐, 有時間剩就走咗去星光大道行下, 無無聊聊又睇埋個冇咩意思嘅幻彩詠香江。
8:30 啦, 可以開動... 其實揀洲際食 buffet 都係被佢 d 海鮮及任食煎鵝肝吸引... 從來唔食內臟嘅我, 某一年試過鵝肝之後就一試難忘... 但其他內臟我都係怕怕!
食 buffet order 飲品, 係咪有 d 傻呢? 不過我知老公想 order, 唯有聽佢話! $980/支, 比平時貴咗 $200!!!!! 如果唔係我生日, 我真係唔會比佢咁做~
環境介紹:
環境真係冇得頂, 對住維港食晚飯, 已經令人陶醉! Waiters service 勁好, 六星級酒店, 應該都係賣呢 d!
枱與枱之間空間尚算可以接受, 不過隔離位講嘢一定會聽到囉!
Seafood corner - 有好多好多海鮮, 而且真係新鮮架, 供應亦源源不絕... good!
熱葷 - 全晚逗留得最多就係呢個位... 煎鵝肝... 我總共食咗 5 件呀, 膽固醇一定超晒標!
仲有 pizza (上) + 魚翅 (下) 供應, 食 buffet 喎, pizza 會唔會有人食呢? openrice comment 話魚翅唔錯, 可惜我個胃冇位容納...
Dessert corner - good 呀~ 好可惜又係試唔晒... 最得意係佢 d 雪糕及雪芭, 有得加 toppings, 十足十宜家 d frozen yogurt. 我只係試咗 2 杯咋...
仲有士多啤梨噴泉, 我係第一次見, 可惜... 又係嗰句... 試... 唔... 到...
食物介紹:
1) 一去到餐廳, 已經有好多人排隊等攞海鮮, 我哋唯有先攻熱盤, 首選當然去食賣飛佛鵝肝先啦 (上面嗰兩捲係片皮鴨)!
2) 魚生好新鮮, 有我至愛嘅帶子刺身... good... 個魚生師父一 d 都唔孤寒, 第一 round 攞甜蝦時已經比咗 10 隻我 (一人份量), 第二 round encore 時竟然比咗 14 隻... 一個人邊食得晒...
3) 海鮮時間... 龍蝦, 青口, 睡蟹, 長腳蟹, 加菲蟹, 剝殼蟹拑, 焗蟹蓋, 琵琶蝦全部都有~ yummy~~~
4) 老公嘅份量... 堆滿一碟...
5) Mixed berries... 我揀呢間嘅目的仲有一個... Mixed Berries 係老公嘅最愛, 到今日都仲同我講好懷念呢碟 berries
6) 甜品時間, 只可恨自己個胃咁細... 食唔到多 d 甜品!
期間, 老公用咗個香檳塞 DIY 咗張櫈出嚟, 叻仔吖... 有前途呀你, hehe
接近尾聲, 都有 d 唔捨得 d 美食, 不過一定要等下次啦, 我真係冇位食埋落肚...
原來, 我仲有壓軸生日禮物... coin bag! 真係好, 我之前有的起心肝買個新 coin bag, 不過搵嚟搵去都搵唔到啱心水, 多謝老公!
呢張相好靚女呀!!!! 生日快樂~~~~
回覆刪除[版主回覆05/27/2011 10:42:00]係呀.... 我都覺.... 少有嘅靚樣! -_-"
所以即刻轉咗做 FB 嘅 profile 相呀, hahahaha, 係喎, 我都冇喺 FB add 你添, 試下搵下你先...
你老公好搞笑呀 將d花放o係花糟佢唔怕比人當垃圾掉咩? 不過呢咁既surprise都真係幾surprise 因為真係估佢唔到~~haha btw間野好似好真呀~~~
回覆刪除[版主回覆05/27/2011 10:44:00]咪係囉... 我擰轉面見佢喺花槽度摷嘢都覺得好好笑, hahaha, 不過真係 surprise 嘅, 佢平時好少送花架!
so so so sweet, 歐陽抵讚！ Jenny, 個coin bag好似係鐘意果個款，對嗎？(即係我買唔到果個？)歐陽記在心，又要加分！
回覆刪除[版主回覆05/27/2011 10:45:00]今次佢的確抵讚, 不過唔好讚咁多, 佢會囂架.... wakakaka!
唔係呀, 個款唔係上次托你幫我買嗰款, 不過都唔緊要啦, 係實用就得架啦!
Happy belated Birthday~~~
回覆刪除我已經係差唔多5-6年前食過洲際buffet，但到而家都超懷念佢啲海鮮、甜品同埋魚生。不過嗰時無鵝肝同埋平少少(5xx左右)，你搞到我好鬼想再去食，不過實在太貴，要諗諗先得。
你老公好鬼sweet呀，咁送花雖然搞笑，但真係好鬼happy！
[版主回覆05/27/2011 14:25:00]多謝傻魚.... 好耐冇你消息啦, 你絕跡咗 blog 界啦喎, 得閒再 update 下我哋啦!
係呀, 我都好認同洲際D嘢食幾好食架, 魚生好新魚, yummy!!! 如果唔係有咩喜慶要慶祝, 我諗我都唔敢再去食啦, 雖然好食, 不過好貴...
好難想像,竟然有人張扎花放係花糟到....
回覆刪除哈哈又比你老公諗到,又無比人law到喎...
下次當我經過個花糟時,一定十分留意....睇下有無第2個有心人放低扎花...
不過放心la....我吾law走....
你老公真係好有心思....
[版主回覆05/27/2011 14:26:00]係啦, 我都比佢笑死呀, 邊有人諗住放喺花槽度架..... 下次你留意下, 話唔定你第時會喺花槽搵唔到花, 不過係你老公送比你另外一D嘅驚喜, ^^
恭喜 願你永遠如心所願
回覆刪除[版主回覆05/27/2011 14:27:00]多謝晒!
我前年已經想去洲際食Buffet,但太貴我又唔捨得生日叫老公同我去食,諗住佢生日去食,但佢比我的答案係情願食其他慳返果幾百蚊去冒險樂園夾公仔>.<我比佢激死同笑死~~~~~不過你有無食過澳門的自助山,如果有的兩者差幾遠呢?
回覆刪除[版主回覆06/03/2011 17:07:00]其實洲際真係貴架, 唔係有慶祝節目的話, 我打死都唔會去! 不過你老公又幾搞笑, 會去玩夾公仔?
澳門嗰邊我未食過呀, 通常去到都係去D普通葡式餐廳, 唔知好唔好味嘅呢, 不過我估點都平過洲際啦~
歐陽生真係好攪笑呀, 收埋紮花係花槽, 佢為你付出真大! 佢放嗰下都要好少心喎, 比人見到可能會比人攞左, 又或者比食環署見到當佢掉垃圾要罰仟伍. 再祝你一次HAPPY BIRTHDAY~~~
回覆刪除[版主回覆06/08/2011 12:32:00]Thanks Sherry~ 又係喎, 佢比人捉到嘅話, 損失就大啦... 不過我真係冇諗過會喺花槽度囉..... -_-"