♥♥ 結婚一週年沙巴之旅 ♥♥ - 自由活動 @ Day 5

要快手 d 寫埋最後一日沙巴之旅! 早排，老公問過我兩次：「喂，你個 blog 仲有一日未寫架喎!」我：「我知呀，我記得喎，好快會寫埋! >_<」

犀利呀，連老公都出聲叫我 update，我係咪懶得有 d 過份呢? wakakakakaka

**********************************************************************************

2010 年 11 月 22 日 (星期一)

話咁快就嚟到一週年之旅最後一日，玩埋今日就要收拾心情返香港再搏殺過 lu! 最後一日... 我絕對唔會比自己白過! 起身後，先落酒店食返個自助早餐。

呢間餐廳足足食咗 5 日，無疑去到 last day 當然會有 dd 厭，不過景靚... 乜都補返數!

之前餵魚餵上癮，今次食早餐時又攞咗少量麵包，過去酒店碼頭再玩過! ^^

連蟹仔 + 雀仔都走埋嚟搶嘢食! 我真係冇見過蟹會食麵包!!!!

本來計劃好今日係去做 spa，不過見老公曬傷咗，自己又冇想像中咁攰，所以都係決定周圍 shopping，血拼一下仲好! 出 town 之前要上房執行李準備 check out 先，再寄存行李，就可以好好咁 enjoy shopping 樂趣!

呢個珊瑚係出島玩嗰日老公執返嚟，初時打算帶返香港放入佢自己個私家魚缸，但考慮到出入境問題，我 side 咗好多口水先叫佢放棄，所以最終放返喺房，帶張遺照返香港啦!

pack 行李回程往往比出發時艱辛，幸好今次嘅物品不及上次去日本時多。

再見啦 Room #7449 ~~~

再見啦 Sutera Harbour Resort ~~~

check out 完，坐低等 shuttle bus 嚟接我哋出 town

出到市中心周圍行咗陣，主要係買一 d 之前睇咗決定買但未買嘅手信，不過講真，沙巴真係冇咩好買，除咗零食，行咗一陣都係冇咩特別嘅斬獲，所以決定去醫下肚先! 跟住旅遊書去咗呢間怡豐食叻沙，出發時已經有好多去過嘅朋友叫我一定要嚟，我點會比自己走寶呢?

沙巴人做生意唔會太花巧，係賣嗰 d 就嗰 d，佢哋個餐牌只係得呢三樣食物

飲品亦只得五款

或者可以揀大碗／細碗，真係好平!

我同老公每人都叫咗一碗細叻沙，飲品我就叫咗桔仔冰，老公就叫咗雙層拉茶。

雖然食物及飲品款式選擇唔多，不過貴精不貴多，d 叻沙真係好好味! 至於雙層拉茶我係極度推薦，連一向唔飲奶茶嘅我都飲咗好多啖，^^

《怡豐茶室》冇固定嘅休息日，所以要幫襯佢都要講緣份。至於點知道佢下個休息日係幾時呢? 原來佢哋會喺舖面講明：

哈哈，剛剛尋日我哋結婚一週年時係佢休息日!

醫好肚後，又再次行街，Big Apple Donut..... 我哋又再次遇上啦! 點算呢? 上次已經 miss 咗一次，今晚要走啦，無論如何我都要吞你落肚! 肚皮就快爆開都要買一件!!!

可惜我最想試嘅 double chocolate 經已 sold out，退而求其次買件 Chocolate + peach 嘅試試!

宜家睇到張相仲流口水，hehehe，真可恨我帶唔晒你全家落肚，>_<

唔知過咗幾耐之後，兩公婆行街行到熱熱地，又買支雪條食! 上次試咗粟米 & 大樹菠蘿味，今次我買咗紅豆，老公就買咗牛油果味試試。

紅豆味我覺得好 ok，牛油果味.... 硬係覺得怪怪地，我就冇試啦，不過老公話 ok 好味喎!

買多少少手信，就要返酒店啦! 不過又未夠鐘去機場，所以又去咗酒店吊床嗰邊 hea 下。

呢度真係好舒服，望住個咁靚嘅天，hea 幾耐都唔覺得悶! 最衰時間唔許可，我想訓陣添呀～～～

hea 到咁上下望望錶，咦，真係係時候攞行李去機場啦! 上返去酒店 lobby 時經過幫襯咗 6 餐嘅餐廳，原來冇同佢影過相。

到達機場後辦理登機手續，返到香港又要重回工作崗位捱騾仔...

禁區內比我發現到有咁咁咁大排 Kinda 朱古力，嘩!!! 老公問我要唔要買返香港，不過我好理智地 say no 啦! 今趟 trip 其實都買咗好多朱古力，食咁多好容易變肥師奶架啦!

不過，為食始終係我嘅本性，睇我咀邊嗰粒為食癦就知我唔係浪得虛名啦! 呢頭向朱古力 say no，嗰頭就拎一筒薯片出嚟食。Lemon & Sesame 味好得意，見香港冇先買嚟試下，同事問我做咩唔買返幾筒擺喺公司，又係喎... 一時醒唔起添!

感謝上天咁錫我! 去到沙巴咁多日完全冇落雨，直至我去機場時都仲係天晴，有陽光得嚟唔算勁熱，起碼我仲可以著到長袖衫。不過上機時先發覺原來落好大雨，仲有行雷閃電，同機嘅乘客都一齊有 d 難以置信。

衷心多謝天公造美，亦多謝老公陪我一齊去玩，我有一個美滿的結婚一週年沙巴之旅! 沙巴亦係一個好地方，消費唔多，有機會記得考慮下呢個天堂!

港龍嘅飛機餐... 今次麻麻地好食，可能因為飽飽地 lu, hahaha