♥♥ 結婚一週年沙巴之旅 ♥♥ - 神秘驚喜 @ Day 4 (Part 2)

2010 年 11 月 21 日 (星期日)

《前言》

其實早於出發前已同當地 local tour 夾計，1121 當日要幫我買個蛋糕，再叫佢哋送上我房嘅雪櫃。聽起來有點無稽，因為照計佢哋唔會有 room key，不過 tour guide 一口應承咗我，仲話佢哋自然有辦法幫我送到上房！好！反正所有貴重物品我會跟身，一於放膽比佢幫我安排。可惜，喺神山食 lunch 時收到導遊電話，因為酒店房個雪櫃太細，放唔入蛋糕，經過一輪商討後，決定將個蛋糕放喺酒店先，等我今晚打落去 reception 時再秘密送上房。

其實老公都奇怪點解會有電話搵我（因為買蛋糕個導遊冇我電話，只好打比帶隊嘅導遊，佢再搵我聽電話），我只好推搪話搵 local tour 訂手信出咗小問題，嘻，成功瞞混過去！

**********************************************************************

由神山返回酒店房後休息咗一陣，就氹老公出發食大餐，以配合我蛋糕神秘驚喜。仲同老公講因為我想食完 buffet 轉戰 night market 食燒雞翼，所以要早 d 出發，老公唯有就範，呵呵。

是日為結婚一週年，想安安靜靜，他他調調食一餐，所以就選擇咗喺酒店歎 buffet（其實呢個都係我刻意安排，因為如果呢一晚出去食，到時行呢度行嗰度，未必可以如期返到房呢！）

一早 book 位時 request 埋要坐 pool side，景觀 / 情調果然唔錯！

呢間酒店真係好好 service，環境又靚，將來再有機會嚟沙巴的話，我首選都會係呢間！

Dinner buffet 好多嘢食，而且有一定嘅水準！我哋仲 order 咗兩杯有酒精果汁。

甜品非常精緻，啱晒我，呵呵！

食得太太太飽啦，有藉口同老公講放棄去 night market 食雞翼。佢提議喺酒店周圍行下，我心裡暗喜，因為等大家都冇咁飽，咁一陣間個蛋糕就可以順利 K.O.！

上到房間，見到 room service 又再佈置過間房，好靚呀！^^

除咗到達嗰晚之外，之前嗰幾晚都冇呢 d 佈置，唔通係酒店知道我今日係結婚紀念日，所以再幫我間房扮靚？呢個難題我到宜家都未解開！

喺房睇咗一陣電視，開始有 d 坐唔安企唔落嘅感覺，因為盤算緊搵咩藉口同老公講我要用佢部手機打電話（只有佢部電話插咗馬來西亞電話咭）？唯有照辦煮碗，賴落 d 手信問題... 仲行咗出露台傾添... 好在老公當時掛住睇電視，完全唔理我做緊咩！

隔咗一陣，門鈴響起，老公覺得好奇怪，但我特登叫佢開門...

登登登櫈...

拆開睇下個樣先...

估唔到個蛋糕咁大個，真係幾個胃都食唔晒！

Happy 1st wedding anniversary!!!

切餅儀式 ^^

其實個蛋糕最後都係食唔晒... -_-"