♥♥ 結婚一週年沙巴之旅 ♥♥ - 神山國家公園一日遊 @ Day 4 (Part 1)

2010 年 11 月 21 日 (星期日)

今日仲有一個 local tour，就係 "神山國家公園 + 吊橋 + 波令溫泉一日遊"。神山係亞洲最高嘅一座山，自問未有功力攻頂，所以都係去佢個國家公園兜個圈，觀下光就足夠。假若有齊裝備，爬山經驗又充足嘅朋友，不妨試試攻頂，佢哋個日出 / 日落真係冇得頂。

訓醒之後循例落酒店餐廳醫肚，之後就喺 lobby 等 tour 嚟接我哋，佢哋再再再一次咁準時～ 上車後，導遊話今日會用好多時間喺搭車上，因為神山公園距離市中心甚遠，冇記錯好似要坐約 2 小時車，oh my god!!! 有一刻覺得自己傻咗，點解會揀咗呢個行程，但又認為去得旅行當然要試下動態 + 靜態活動，好快又覺得唔後悔～

兩小時車程過後，導遊喺一個公園仔放低我哋。一落車已經見到一望無際嘅樹木，令到個人好平靜。

嗰度有一間疑似教堂，又影咗 d 相。

喺 set 咗三腳架嘅情況下，仲要跑返埋位諗 pose 影相... 左下角嗰張嘅難度分係... 10 分！

公園仔嘅另一邊係一個小型 market。地方唔大，而且檔口亦唔算多。主要賣水果，紀念品等等，我哋就冇乜斬獲，但同團嘅國內同胞就買咗 d 香蕉。

之後就再坐車去行吊橋 + 波令溫泉。先喺門口影返張相～

經過入口後，已經有條好短好短嘅吊橋比大家熱熱身...

行呢條吊橋，真係一 d 驚恐嘅感覺都冇，不過呢度只係熱身，一陣就可以試到自己驚唔驚啦！

導遊繼續帶領我哋行，經過 "波令溫泉"。

不過佢話一陣間先浸，宜家先去行吊橋。Well... 但係呢個溫泉，我諗... 我都係唔浸啦！

行吊橋除咗要買入場卷之外，原來仲要替每部相機買門票。即係話，如果帶相機去影相，必需要買飛，冇買飛嘅相機就唔可以影相啦！我同老公一人一部相機，但我哋只係買咗一張飛。不過沿途發覺係冇人看管，所以行行下... 我哋都拎埋另一部相機出嚟，大家千祈唔好學我，哈哈！

相機售票處

買飛先...

搞掂晒之後，可以出發行吊橋啦！但係原來唔係話行就行，要行條山路上去架。好在當日唔係烈日當空... 頂得住、頂得住！

出發！

就快到啦～

終於見到吊橋啦... 不過人數頗多，要等...

神山公園內一共有四條吊橋，形成一個圓型。行完四條之後，又會身處起點附近。

我初時都怕自己會驚，但係原來一 d 都唔驚架！我差 d 想喺條橋上面跑，哈！

Um... 其實唔講... 係咪唔知呢張相喺 set 三腳架影架呢？真係驚險萬分... 驚險唔係在於自身安全... 而係三腳架 + 單反相機嘅安全

話咁快就行晒四條吊橋啦，呢個就係終點！

好屎呀... 唔係好驚咋...

行完吊橋落返山，再次途經波令溫泉。導遊照慣例比大家浸 15 mins，我同老公當然對呢個溫泉零興趣啦，所以就周圍影下相！

離開神山國家公園後，就要去醫醫五臟廟。

食完嘢，導遊再帶我哋去一間博物館嘅東西，了解下神山嘅歷史兼認識下沙巴。之後就坐旅遊巴返酒店啦！計下車程，返到去可能接近 5:00，咁就玩咗一日。

其實當日天氣唔算太好，係就係無雨，不過較為大霧，導遊都話大家未必有機會見到神山。點知回程時慶幸天公造美，雖然未至於放晴，但係有一堆霧 (定係雲?) 剛剛散開，導遊就即刻叫司機搵個地方比我哋停低盡情影相。不過不斷叮囑大家要快、快、快，因為另一層唔知係霧定係雲正吹緊嚟啦！

身處神山附近，空氣變得較為低薄，我懷疑路牌隔離嗰 d 唔係霧，而係雲。

呢張相好靚呀... 如果冇咗路人甲乙丙就好 lu...

~ Part 2 待續 ~