你哋近來好嗎？
我就... so far so good 啦，最近懶蟲上身，結婚日 d 相片都只係 post 到外影篇，不過我相信會陸續有嚟，起碼等完咗個世界盃先啦，^^
提起世界盃，呢個 4 年一度嘅盛事，你／你伴侶有冇極度投入呢？我就剛剛相反，身邊嗰隻佬係零興趣，而我就盡量睇得幾多得幾多。或者係因為自細受老爹及細佬影響，我係堅睇波而非齋睇球星。唔好當我流架，我小學已「被迫」睇波，屋企成日睇住曼聯 d 賽事，所以幾時係越位、幾時判角球、幾時判球門球、咩係窩利、咩係掛網，我一一都識架！最愛球星並非碧咸而係簡東拿（前前前前曼聯隊長，穿 7 號球衣）<--- 不過應該係 97／98 年？？？最愛門將亦並非施文而係舒米高 <--- 聽過嗎？可見我嘅「波齡」都唔淺架！如果識波嘅你聽到我講呢堆名字，都知全屬英格蘭，所以我都好順利成章做咗英格蘭 fans，可恨嘅係上星期日對德國嗰場賽事輸得好冤枉... 愛隊 Bye Bye 了，你哋返家鄉放暑假啦～
天亡英軍，唯有繼續捧巴西 & 阿根廷 ^_^
除咗世盃賽事，另一件我正在頭痕嘅事莫過於結婚相簿！
係吖，無錯！婚後已經 7 個月有多啦，兩本結婚相簿仲未起貨，但責任並不在攝影公司身上，而係我 & 歐陽生。夠膽死喺大概一個月前先至施施然咁交相比人做，人哋用咗 2 星期就排好版，但收到 draft 後當然嘔咗十九幾兩血啦，差不多每頁都要重新排過。每一日開著部電腦時都下定決心要執排版，但往往都無功而還，如是者又差不多成個月都未覆人，真係自己攞嚟衰，稍後先再出 post 比大家睇下點解會嘔十九幾兩血出嚟...
提到婚後生活，唔覺唔覺都結咗婚 7 個月啦，點解我成日都覺得好似早兩個月先擺完酒咁嘅？同樣係 2009 年年尾結婚嘅你有冇開始諗下點樣慶祝結婚一週年？我同老公最近有共識，結婚一週年會外出旅行，但地點仍在選擇中。暫定會揀陽光與海灘... 都係泰國蘇梅島與沙巴之爭，極有可能會揀沙巴。不過一向唔鐘意同陽光玩遊戲嘅我唔會咁順攤，我一定會出動晒全屋嘅防曬用品，由頭搽到落腳，由天光搽到天黑 ^^
其實仲有考慮過再一次去日本，不過今次會選擇睇紅葉，不過... 老公話去日本寧願去睇雪，咁不如都係揀返陽光與海灘算吧啦！
另一樣會耐唔耐諗下嘅事就係造人計劃。呢一刻，我會 say no，因為我仲好想繼續跳舞，可唔可以下年先 plan？幸好男家暫時仲未比壓力我，反而媽咪就不斷灌輸「有仔趁嫩生」嘅道理比我。閒時又話比我聽三姑六婆個女有咗 bb 啦等等，睇嚟要開始為我嘅「跳舞生涯」(我有咩？) 倒數...
我已經book左10月去東京la~~wakakaka~好開心呀!!!
回覆刪除[版主回覆06/29/2010 14:38:00]wakaka, 正呀, 日本真係一個好好嘅地方, 我都發誓有生之年要去多幾次, ^^ 到時記得影多 d 靚相返嚟 share 呀!
講開睇波, 我都好熟嫁, 不過我係車仔的 fans 啦~
回覆刪除果日林伯真係黑仔都無人有呀, 果球如果當入的話, 係佢係世界杯的第一球來的, 咁樣比人吹走咗, 真係慘~
咁都未算, 呢球之前有一球比人護空門, 之後又一球中楣, 真係黑仔到呢~
我都覺得好似好快就結咗婚 7 月咁耐, 一d 都唔似 lor~
我同老公都有傾過生仔的問題, 我哋諗住出年開工啦, 因為開始 feel 到老公家人的壓力了, 你有無呢方面的壓力呀 ?? 我哋都有打算 1 週年時去旅行呀, 可能去星馬果邊啦~
[版主回覆06/29/2010 14:48:00]咦, 你係車仔 fans, 咁林伯嗰球你咪好慶囉? 真係一場歡喜一場空! 其實佢哋真係踢唔出水準... 開場冇幾耐已經被人搵到幾次機會, 門將 james 又好似食咗屎咁 (唔好意思, 一講波經就好粗鄙), 朗尼又交唔到功課, 真係無眼睇! 林伯已經好叻仔架啦, 之前嗰幾場佢好似冇咗影咁, 佢呢場盡咗本份, 個旁證盲咗都唔關佢事! 但我敢寫包單, 如果冇呢個問題球, 個賽果一定會改寫.... 不過算啦, 就算佢入到 8 強, 下場波對住阿根廷可能輸得仲慘... 仲有呀, 下半場本來迪科爾差少少架啦, 點知又唔夠人快... 真不幸!
唉, 少少壓力啦, 男家嗰邊反而未有催生仔, 不過我媽咪成日提住提住, 耐唔耐同我講邊個邊個有咗 bb 呀, etc. 不過我估我都冇得走雞, 同你一樣, 出年要開工, ^^
係呀, 我果晚好嬲呀~ 不過唔止我嬲, 連我老公都好嬲 (不過佢係利記 fans 來的), 我哋果晚係咁大罵啦, 幾驚比人投訴呀~
回覆刪除我唔止少少壓力呀, 我老爺已經捉咗我老公入房幾次, 問佢幾時先有孫抱, 而奶奶就係我面前, 成日都講 d 有關 bb 的話題, 又叫我第時有咗, 要小心 d 食嘢, 唔好亂食藥咁~
但我同老公都覺得, 暫時我哋都仲未接受到做人父母住, 但奈何生 bb 的壓力太大了, 所以 plan 咗出年開工 lor~
[版主回覆06/29/2010 17:31:00]haha, 我嗰晚都嘈到拆天呀, 不過呢一球真係好冤枉, 可能屋企上上下下都一齊嘈, ^^
咁你嘅 case 就 worse d, 不過唔好理人哋點講, 自己兩公婆嘅心理準備最重要, 如果認為未係時候就唔好立亂做決定, 我一向都好支持等自己 ready 咗先開工! 你都要放鬆 d 呀, 順其自然啦, 其實你有冇向老爺奶奶表示想出年先呢?
我無同老爺奶奶傾過呢方面的話題, 次次都係老爺拉埋老公一二便講的,不過老公就同老爺講過 "駛唔駛咁快呀 ?", 但老爺就回返一句 "你年紀都唔細嫁喇, 而家仲唔生, 等幾時呀?" (我老公而家 3x 歲)
回覆刪除同埋其實我同老公傾好咗, 我只會生一個, 但老爺好似想我哋止少生 2 個, 仲要係有男孫添, 我真係好驚到時生咗個囡囡出來, 老爺又叫我哋追多個啦~
老公只係同老爺提過下我哋只想生一個, 費事負擔大, 點知老爺好大反應話一個咁少, 起碼都要生 2 個啦~
[版主回覆06/30/2010 11:09:00]如果係咁, 你應該會遭受好大壓力呀, 不過老實講, 點都好, 真係等兩口子都 ready 好先去 plan, 呢樣係我一直堅持嘅~
我地都打算 10 月 去一去旅行輕鬆下~
回覆刪除不過地點仲未決定
可能去新加坡 (新開咗聖淘沙同環球影城)
或者日本大板
[版主回覆06/30/2010 11:11:00]10 月呀? 我哋都有諗過 10 月去日本睇紅葉架, 不過最終決定陽光與海灘! hehe, 到時又引發一輪旅行潮, 上年年底結婚嘅大部份都出咗埠, haha
我都結咗婚3個月, D 相都仲未搞掂, 仲有未比相攝影公司做送個2本相簿!!!
回覆刪除[版主回覆06/30/2010 11:11:00]yeah yeah yeah, 唔知呢 d 係咪婚後嘅通病... 我之前仲喺度諗, 會唔會結婚一週年都未有相簿拎出街比人睇, ^^
我同老公都 plan 緊出外旅行慶祝一周年，地點應該係......去多一次馬爾代夫，kaka~~
回覆刪除[版主回覆06/30/2010 11:12:00]嘩, 你就爽啦, 可以去人間天堂兩次... 不過到時記得影多 d 靚相返嚟比我 "恨" 下呀, 咁就可以激發我儲錢去一次, ^^
Jenny, 你終於捲土重來扛理blog啦 ！好嘢！
回覆刪除其實真係估你唔到咁鐘意睇波...
[版主回覆07/06/2010 11:17:00]捲土重來.... wakakaka, 其實婚後清閒咗 d, 想寫下嘢同大家分享, 不過又唔知寫乜, 但係我會盡量提高返個曝光率, 哈哈!
ok 架, 我都幾鐘意睇 d 運動比賽架, 游水, 排球, 羽毛球我全部都啱
wakakakkaka... 其實你唔算懶，我o地到呢一刻都仲未揀相俾人整相簿！ 連派俾親戚o既相都未晒添！勁哩！俾阿媽鬧屎....
回覆刪除7個月，真係唔覺唔覺，呢 7 個月最豐富o既收穫就係.... 磅數！已經回復返高峰期喇！死得！
[版主回覆07/06/2010 11:19:00]嘩, 真係勁喎, 我收到相後一個月之內已經晒返 d 相比親戚, 反而朋友嗰 d 未郁, ^^, 咁落力都只不過係比媽咪日催夜催先咁乖咋!
唓, 你有 quota, 就算返咗高峰期都仲可以, 冇所謂啦, 食得是福!
你終於update blog喇？
回覆刪除我d相就曬晒啦, 不過海洋送嗰本相簿就仲未攞去比佢做, 上個月先的起心肝簡左入冊既相, 不過簡完又放左响度, 未燒碟攞比佢, 懶....
我都諗住一週年去旅行呀！不過宜家都係諗下中。
[版主回覆07/06/2010 14:33:00]haha, 係呀, 懶蟲最近少咗 d, 開始寫返少少 blog 啦, 廢事搞到佢發霉, ^^
海洋嗰本我諗我會用好多時間先搞得掂, 出完呢篇 post 直至今日我都係冇掂過個排版, 不過我真係希望喺結婚一週年前可以完工!
我哋決定咗啦, 會去沙巴, 其實有少少心動想去澳洲架! 去啦, 難得有一個咁大條道理嘅藉口去旅行, =]