婆媳關係

2010 年 6 月 3 日（星期四）

終於都考完試啦，地獄生活再一次成為過去！為咗應付考試，我連續食咗一星期飯盒，每晚都兩點幾先訓！真係苦了自己亦苦了老公！

由同歐陽生拍拖開始，我一直都覺得呢個未來奶奶唔難相處，我當時仲認為如果要婆媳同住，我應該 handle 得到，所以「婆媳關係」呢個 topic 我一直都覺得自己 ok 架！就喺我考完試離開試場開手機嗰一刻，我收到奶奶 send 比我呢個短訊，自己都 O 咗咀（唔好意思，影得唔係咁好）：

哈哈哈，我都有 d 估佢唔到，唔知係咪因為經過咗母親節 + 奶奶 6 月嘅生日，佢覺得我好錫佢啩？咁講真，有時我都覺得對奶奶好似忡好過對自己阿媽！或者因為係奶奶，所以有時會提醒自己要以禮行先，反而自己娘親啦喎，少不免會有呼喝情況出現！

最近，奶奶仲開始叫我幫佢手做下嘢，咁當然唔係做粗重嘢啦！其實咁樣我反而覺得佢真係當咗我係自己人咁看待，有少少甜在心頭添！

仲仲仲有，話說前排曾經為高速煲及壓力煲一事做資料搜集，因為覺得要每星期都飲下湯水先夠健康。其中一個資料搜集對象當然就係奶奶本人，佢比咗意見我後，大約一星期，我收到奶奶電話，佢已經幫我買咗個煲啦...

不過，我唔知係佢係想佢個仔有靚湯飲吖，定係。。。？