一個人結咗婚，原來真係可以懶成咁！收到攝影師 d 相差不多有一個月啦，公司同事、兄弟姊妹、四大長老、三姑六婆係咁催我話要睇相，我都真係唔得閒整比大家睇。唔係唔想，係真係忙，但忙 d 咩呢？我又唔係咁清楚。總之每日返到屋企已經係十點幾十一點，跳舞、做 yoga、同朋友食飯、返娘家食飯，其實我都唔係好知自己忙 d 乜！
2009 年 11 月 21 日（星期六）
結婚前一晚，基本上無乜點訓過，因為天氣真係幾凍，手腳訓極都唔暖，無記錯最終應該 03:XX 先訓到，但眨下眼 06:00 又話要起身，眼肚直情大到跌落肚臍！連化妝師 Shirley 幫我上妝時都話我個黑眼圈範圍幾大.... -_-"
我起咗身後，家人都陸陸續續要起身，為我準備大日子要用嘅物品。化妝師、伴娘、攝影師各自都好準時嚟到。原本話 d 姊妹要早過攝影師十五分鐘到我屋企，雖然姊妹們遲咗，但好在唔過份，時間都繼續 catch 到！
當日早上氣溫只有 11 - 12 度，好羡慕 d 姊妹可以有件大褸相伴，我正擔心緊一陣自己咁單薄... 點算？
我有我整裝待發，姊妹們就好努力咁準備玩謝男子組嘅一切功夫！
咁多位姊妹，真係好多謝你哋呀！我愛你哋！
攝影師 Hero 幫我哋諗咗句口號：開門利是九萬九，唔比一腳踢佢走！
可能我太太太開心，take one 已經嗌咗：開門利是九個九，唔比一腳踢佢走！<-- Sorry，我講錯咗啫，大家已經話我咁快幫住男子組，$9.9 開門利是都肯嫁？？？結果大家就比我呢句... 笑到收唔到制！
之後我就同在場嘅親戚朋友影相，姊妹們就繼續努力預備啦！
喺另一邊廂，花車、男子組成員都好準時咁到咗我樓下（係好難得架）。佢哋以為攝影師有排都未落嚟影花絮，歐陽生竟然帶頭 call 晒成班兄弟去食早餐！點知一坐低就收到我電話：喂，Hero 落緊嚟啦喎，你哋要準備佈置花車！結果成班麻甩佬只係用咗 5 mins 就啪咗成個早餐！
唔好見有幾部相機喺度就扮勤力啦，我知道個花車佈置係司機搞嘅！不過，我真係覺得你哋成班準備剪綵，夠唔夠鉸剪用？
好有信心咁喎... 未有得上嚟住呀，去隔離介紹下 d 兄弟團先啦！
咁疊馬，想點先？
氣勢如虹噃...... 數下有幾多隻靚錶，有幾多條名牌手鍊先，有定心理準備，一陣玩遊戲時搏大霧「立」幾隻去賣吖嘛！
吉時到，要上嚟受死啦，渣渣臨啦（蘇絲黃腔）！
沒有留言:
張貼留言