評一評、諗一諗 @ 用品篇

1) 紅酒 - 新翹行（負責人：夏生）

呢間公司我諗唔洗多講，因為喺 esdlife 又係出晒名，一諗起要訂紅酒，10 個有 9 個都會考慮夏生。

佢哋 d staff 都好 pro，介紹紅酒時好專業，而且收費合理，又有回收服務，萬一訂多咗都唔洗咁肉赤焗住自己飲嘛！

冇記錯好似訂夠 2 箱就有送貨服務，夏生佢哋早 2 日已經送咗去酒樓，而且送完貨仲會補多個電話比我向我交帶一聲，非常之滿意！

2) 花品 - 童話佈置（負責人：Rita）

我只係幫襯 Rita 訂咗一個鮮花花球及 4 朵主人花鮮花襟花。雖然唔係大客仔，不過 Rita 都好幫我，我衰仔，一向對花球款都心大心細，個款改完又改，不過 Rita 冇怪我，仲成日同我 email 討論咩花好咩花唔好。最後我喺大日子前兩星期先 confirm 款式，雖然最終我心儀嘅花種因為開得唔靚嘅關係用唔到，不過都好感謝 Rita，因為佢即刻打比我，勸我寧願轉款都唔想我用 d 開得唔嘅花做嘅花球，多謝 Rita！睇返 d 相都覺得牡丹真係幾靚，好在有機會用到粉紅大牡丹陪我出嫁！

至於主人花方面，我揀咗馬蹄蘭，我比咗張 sample 相 Rita 跟住做，有 9 成似呀！好滿意！

唯一要扣分就係交收花球嗰日非常狼狽！事關 Rita 就咁揸住個花球約我喺地鐵站交收，紙袋都冇一個，我當日又要拎衫，好在有伴郎伴娘在場多 2 雙手拎嘢，最後廢事樣衰 + 廢事同人迫地鐵，結果臨時 call 咗架 van 仔車晒所有嘢返入天水圍。

不過 d 花嘅 quality 真係唔錯，Rita 仲隨盒附送營養粉，冇記錯我好似臨去 honeymoon 之前嗰個星期先扔（當時只係搵水喉水養住），真係 keep 到好叉耐！

3) we've found our cup of tea

之前都介紹過我嘅回禮小禮物 --- 茶包。

偶然嘅機會下搵到個 supplier，起貨快過我預期，包送貨到任何一個地鐵站，手工 ok，價錢又合乎我 budget，所以好開心有個咁得意嘅物品做我嘅小禮物，希望大家都鐘意！

1121 盟友，我預備咗比你哋架啦，下次 gathering 再派比大家！

　

4) 結婚戒指 --- PN

本來真係唔識 PN 呢個牌子。

去睇戒指，就即刻諗起周亨亨、周大碌、六叔等等呢 d 大公司。不過越睇就越覺得唔對路，點解唔會心動想買架呢？後來又係多得 esdlife 網友報料，有間新興嘅 PN，d 款比較摩登，可以望望，結果一望就出事啦！喪多款啱心水，勁想買返屋企，知道自己有呢股衝勁先知冇去錯舖頭！

後來當然走唔甩，用咗 $15,200 去買咗一對結婚戒指！到宜家我都覺得洗咁多錢去買一對結婚戒指係好好好離譜嘅一件事，不過唔知點解又真係好鬼鐘意！學老公話齋，與其去買一對冇乜款嘅戒指，倒不如去旺角潮流特區嗰 d 地方買對戒指結婚算數啦，結婚戒指喎，梗係要勁 d 啦！（相信佢只係安慰緊自己個荷包）

5) 兄弟煲呔 --- yahoo 拍賣場

唔知邊個兄弟 pat pat 痕提議想打煲呔，見歐陽生又冇乜所謂，所以就決定成全佢哋。我就即刻發揮本小姐嘅 shopping 功能，第一時間喺 yahoo 拍賣場已經有心水。手功同貨色都 ok 啦，d 兄弟揸住個煲呔玩得好開心。