影相日 @ 緣美傳說

2008 年 7 月 28 日（星期一）天晴

今日係去緣美傳說影相嘅大日子，我同男朋友之前嗰晚已經執好晒行裝，準備今日順利出發！

我哋約咗 2:00 上去，由於驚呢樣驚嗰樣，我同男朋友都提早咗出門口（其實都唔知驚乜，只係諗住早到好過遲到）。點知...... 喺我哋搭巴士出去尖沙咀期間，架巴士喺屯門公路跪低咗...... 不過我又唔算太擔心，始終我哋提早咗出門口嘛，喺屯門公路截咗一陣順風車...... 結果我哋喺 1:58 上到緣美傳說，Good Fit ~~~

上到去見到兩位攝影師 Sam & Joe 一路食 lunch 一路喺度整緊 d 燈膽之類嘅物體，經了解後原來佢哋特登落手落腳整一盞大光燈 for 我同男朋友今日影相，等我哋影 d 相出嚟對眼珠入面會見到 d 光圈，好靚架！ 嘩，緣美傳說 d 人對我哋咁好，真係要感激你哋呀！之後我嘅化妝師 Doris 就拎咗 6 本相簿比我揀衫，佢哋有 3 本係婚紗，3 本係晚裝，由於我一早諗住著婚紗影相，所以嗰 3 本晚裝相簿可以不理！之後就慘啦，對住佢嗰 3 本婚紗相簿，真係諗到我頭都痕，睇完幾轉終於揀咗 4 件心水婚紗，我覺得試晒 4 件好似好多咁，結果同男朋友商量下 foul 多一件，另外嗰 3 件就要試上身先知啦！揀好心水婚紗，我就同 Doris 去試衫，男朋友就走出去幫佢哋整嗰盞大光燈（可想而知我哋兩個同緣美傳說 d 人幾 friend）。講返我，嗰 3 件婚紗試過之後，我，男朋友及 Doris 一致認為其中一件著得最好睇，喺無任何異議之下就 confirm 啦！（後來先知緣美傳說可以比我哋任影相，早知就影低我 foul 咗嗰兩件婚紗比大家睇啦）之後我就去化妝 lu ~~~ Doris 好有心機幫我化，我同佢講我尋晚突然生咗粒瘡喺額頭度，佢都好有耐性盡量同我遮咗佢！之後到 set 頭，我話佢知因為我塊面比較長，但係又有包包面，所以想兩邊都放返 d 頭髮落嚟掩飾一吓！之後 Doris 三扒兩撥就同我 set 咗一個我超超超鐘意嘅頭啦！個頭飾又襯得靚，連我男朋友都話好睇，仲叫我影低個髮型，到結婚當日可以考慮 set 返呢個頭！

有相睇啦，仲可以睇埋我揀咗邊件婚紗影相添......

呢個就係化妝師 Doris 啦！佢又 nice，又啱傾，good！！！

我揀完衫之後就輪到男朋友啦！佢好快就揀到心目中要嘅男禮（其實都唔係佢揀，係我揀比佢），我都有同佢影低相...... 不過由於男朋友上個禮拜啱啱大病，搞到佢身體抵抗力差咗，結果就比細菌侵入，（定係因為佢食得多熱氣嘢？）佢............ 爛咀呀！！！

大家見到嘛？睇睇吓都覺得幾好笑，我好似同一個日本仔影相呀！！！哈！！！我同咗攝影師講，叫佢盡量幫我就 d 角度唔好見到佢個咀，又或者到時要用電腦執一執...... 算啦，都冇人想咁嘅 ~ 仲好，我可以大條道理揀多 d 單人相，yeah！！！

盞大光燈整完，男朋友又繼續發揮佢搗亂嘅性格，喺緣美傳說見到 d 咩都攞嚟玩！佢攞起呢個玩具之後，我即刻爆笑，立刻要同佢影返張相！！！

我哋喺度搗亂完一輪之後，真正可以出發啦！臨出去影相之前當然要影返張合照先啦！

裝好身之後大概係 3:30 左右，我哋先去咗樓下嘅「古物古蹟辦事處」影相。咁大個女都係第一次著婚紗喺美麗華商場行嚟行去，沿途都有好多人望住我哋，都有少少唔自然...... 不過都係一個練習嘅機會，一陣影相仲多人望呀！

影相嘅時候，真係要讚一讚兩位攝影師！雖則呢輯係免費嘅，不過我見佢哋完全唔理地下污糟，喺個地下度又跪又趴咁同我哋影！我哋兩個又唔識擺 pose，好多時攝影師叫我哋企埋去，我哋兩個真係成碌木咁企埋去，真係難為阿 Sam 不斷諗 d pose 比我地兩個！其實之前都擔心因為同佢哋太熟嘅關係，影相嘅時候會有 d 尷尬，不過當日我發覺我擔心嚟都多餘！佢兩個加埋我男朋友不斷喺度講嘢引我笑，又突登講埋 d 唔咸唔淡嘅鄉下話咁，成個過程都充滿歡笑聲！當我哋玩得好開心之際，有個管理員同我哋講個辦事處要閂門啦！嗰陣望一望錶先知原來 6:00 啦，玩到唔知時候添！我哋唯有離開，去咗諾士佛臺嗰條樓梯影相，影咗兩張之嘛，又有管理員話 d 地方係佢哋嘅，影相的話要申請，結果我哋又要走...... Sam 都話之前都唔會趕人嘅，到我影就趕...... 不過算啦，學佢哋話齋，條樓梯又唔係特別靚，影唔到都唔係損失！

結果我哋就上返去緣美傳說影禮堂啦！阿 Sam 諗 d pose 真係好得，有時佢都會 show 返 d 相比我睇，影到我有 d 似雜誌嘅 model 呀！喺兩個禮堂度影多 1.5 小時，就正式收隊，結束我哋今日嘅行程，臨換衫之前，當然又要影低呢個 moment 啦！

（左邊嗰個係 Sam，右邊嗰個係 Joe，咪睇佢兩個咁後生，影 d 相都幾得架！）

之後佢哋又成班大細路咁失控啦！！！

影到 7:30 影完 lu，我同男朋友就去換衫落妝！Doris 真係好，知道我好鐘意個髮型，佢提議唔好同我拆，等我可以靚多陣，結果我淨係除咗個頭飾咋！

總括嚟講，今日真係超開心！感覺就好似同班朋友出去玩咁，佢哋又玩得，又唔會悶親人，最緊要係交到功課，而且我同男朋友一 d 都唔覺得辛苦呢！我哋落咗妝之後都冇即刻走，同佢哋坐低傾計傾到 9:00！期間阿 Joe 已經開始同我執相啦！我仲衝入去佢哋個 office 入面裝吓 d 相！阿 Sam 話佢哋兩個同我哋影咗 3xx 張相，不過未 out 眨咗眼嗰 d！3xx 張咁多？睇嚟我真係一定要買相啦！不過好在，佢哋加相只係 $70 張連 file，絕對買得過！而且都有心理準備加相！

喺呢度真係要多謝緣美傳說嘅所有人，包括 James（經理），化妝師 Doris，兩位攝影師 Sam & Joe，仲有 Zita！雖然 Zita 今日放假，不過佢真係超好人，之前知道我要 DIY 花球，又教我整呢樣整嗰樣，我識著你哋真係我籌備結婚時最好好好嘅回憶！所以我決定，我下次上嚟睇相時買返 d 嘢食慰勞你哋先得！！！

暫時約咗兩個星期後睇相，由於男朋友爛咀...... 揀完相之後會用比較多嘅時間去執相！我要有排等啦.......  

最後準備 @ 緣美傳說婚紗相

2008 年 7 月 27 日（星期日）

聽日就係我去緣美傳說影相嘅日子啦！心情都有少少緊張，話晒都係自己嘅第一輯婚紗相，所以都會擔心呢樣擔心嗰樣，不過算啦，要做嘅都已經做晒，唯一係認為自己減肥尚未成功......

由於我會戴隻靚靚結婚戒指去影相，所以手部嘅裝扮一定唔可以忽略！我一向都有留指甲嘅習慣，所以我就決定自己搽指甲油扮靚靚啦！獻醜獻醜......

其實我都唔知自己點解揀搽紅色？我純粹想做法式漸變...... 不過出嚟嘅效果好與唔好都好，我都已經冇時間再油過...... 紅色就紅色啦！

另外，本來打算喺影相之前一晚敷返個水份 mask，正當我想拎出嚟敷之際，男朋友講咗一句：「你 d mask 得唔得架，唔好亂敷喎，一陣好似之前有個人咁，敷完之後第二日影相，個樣爆晒光喎。」比佢一言驚醒夢中人，因為我準備敷嗰張 mask 係彩豐行買嗰 d 幾蚊張架咋，咁...... 都係唔好亂試！

註：之前喺網上見到有篇 blog 提醒各準新人注意 d 咩，其中一點就係影婚紗相或結婚之前一晚唔好亂敷 mask，因為有 d mask 含有螢光劑，敷完之後第二日影相遇到閃光燈的話，個樣點影都會爆晒光，所以各位準新娘，小心為妙呀！

我們的結婚戒指 @ PN

結婚戒指終於到咗手啦，其實都到咗手幾個月，hehehe

 我就覺得好靚啦 ....

PN 成員大合照，佢哋仲送咗個戒指枕比我，真係好啦，我只要將佢後期加工少少，咁就可以用得啦 .... 屋企有一對小型嘅 Snoopy 結婚公仔，大概一隻手指咁高啦，打算縫對公仔上去，yeah ..... 一個 Snoopy 戒指枕就將會屬於我 .....

對戒連絨毛硬盒 ~

PN 戒指枕（佢將會變得不普通） ~

當戒指遇上戒指枕

PN 戒指 @ 新娘

PN 戒子 @ 新郎

新娘肥美 "肉" 手 + 新郎皮膚粗糙的 "鞋" 手

係咪睇得唔夠清楚？呢張壓軸出場啦，因為係影 PN 嘅 catalog 架嘛，梗係清楚啦

男裝：一粒主石

女裝：一粒主石 + 左右共有 48 粒碎石（每邊 24 粒）

我仲喺大家嘅介子入面刻咗雙方嘅名及結婚日期（Jenny 21.11.2009 / Oliver 21.11.2009）

綜合一句：

實在太靚啦！搞到我得閒就拎出嚟摸吓佢，好似痴咗線咁..... 兩日後影婚紗相就可以帶佢哋出街啦！到時要同攝影師講，幫我哋同隻戒指影幾幅相先！

MUST Bring Items Checklist @ 緣美傳說

下個星期一就係我去緣美傳說影第一輯婚紗相嘅日子啦！原來期待影婚紗相嘅心情真係又驚又喜架！驚 - 驚自己唔記得帶呢樣帶嗰樣，驚影相當日天氣唔好，驚影得差；喜 - 好期待快 d 有一輯完全屬於自己同男朋友嘅婚紗相。以前睇網友嘅 blog，發覺佢哋擔心呢樣擔心嗰樣，當時都唔會完全明白佢哋嘅心情，而家輪到我做呢個角色，真係完全明白啦！

雖然緣美傳說呢一輯係 rehearsal 性質，不過話明 rehearsal，我都要視呢一輯為正式影嘅咁重視，所以我都列一個 checklist 出嚟，可以照住張 list 去執嘢出發。

拍攝日期：28-7-2008（星期一）

時間：中午 12:00

拍攝地點：尖沙咀古蹟文化博物館 à 緣美傳說兩個禮堂

©©©©©©©©©©©©©©©©©©©©©©©©©©©©©©©©©©©

a 新娘必備 b

(1) Girdle

(2) 束褲或打底褲 （以防有 d pose 要坐地下等等，又可以 cool 住個肚腩仔）

(3) 乾濕粉樸各一塊

(4) 假眼睫毛 x 2 對

(5) 白色高踭鞋

(6) 護膚品（落妝後用）

a 新郎必備 b

(1) 白恤衫

(2) 白色底衫 （著住去）

(3) 乾濕粉樸各一塊

(4) 黑襪（著住去）

(5) 黑皮鞋

a 拍攝道具及其他雜項 b

(1) 清水及體積細小嘅乾糧

(2) 飲管

(3) 蚊怕水（影嗰兩個鐘頭外景，有冇需要帶呢？）

(4) 防曬 （搽身用.....雖然今次只影兩個鐘，但一定要帶，我好怕陽光架）

(5) 結婚介子（Yeah！終於有藉口帶住對介子啦）

(6) 已 saved／hardcopy 相辦

(7) 毛巾（比男朋友抹汗用架）

(8) 相機（for 偷影用）

(9) 100 卡玩具鑽石戒指

 

（深呼吸先 ...........），真係好緊張呀！唔知我之前一晚會唔會訓唔著呢？

我的婚紗鞋

我對婚紗鞋同其他準新娘嘅好唔同。冇閃片，冇珠片，冇釘工，最緊要嘅係 ----- 一對舊鞋。

其實對鞋係我之前買落架，主要係平日著，不過買咗返屋企之後只係著過 2-3 次，原因都係因為我平時鐘意著波鞋多（當然有時都會貪靚著高踭鞋嘅），所以仲 keep 得好新淨。後來自己要結婚啦，去到買鞋呢個項目時，我都掙扎咗好耐，好唔好買一對 for 襯婚紗嘅婚紗鞋呢？話晒件婚紗對於一個待嫁女孩嚟講係好緊要，揀咗套靚靚婚紗，冇理由著對核核突突嘅鞋架嘛！

之但係我又唔想買一對好閃好閃嘅鞋返嚟之後，著完幾次，結咗婚，就冇機會再著，好浪費架嘛！加上初時一直都以為自己會著傘型婚紗居多，都冇乜人會睇到對鞋，諗住冇所謂啦。但隨住自己嘅口味改變，變得誓要租一套 a-line 婚紗不可，婚紗鞋......應該會比人望到啦啩？？？咁我應該點取捨好呢？買對閃爆全場但平日著唔返嘅鞋？定著返呢對舊得嚟但符合經濟原則，外觀又唔差嘅鞋？雖然宜家都好流行閃嘅鞋，買咗之後大不了平日著返都得，不過一向低調嘅我的確好少著 d 咁閃嘅鞋出街，點算好？下個星期就要影婚紗相啦，我點都要做一個決定。

結果，我決定影婚紗相就著返呢對舊鞋先，如果喺結婚之前見到一對好適合結婚著嘅鞋先再買，反正婚紗相應該唔會點影到對鞋，有 d 人著波鞋都係咁影啦......

雖然呢對鞋係象牙色，不過我覺得可以接受。如果真係唔襯，最多著返對波鞋去影相囉......啋啋啋，希望襯到絕啦！

天氣預報 @ 緣美傳說

尋晚同男朋友吵大鑊，仲係超級大大大鑊嗰種。同佢一齊咗 8 年咁耐，都未試過有今次咁大鑊...... 不過我哋一向都可以極速和好，今次亦唔例外，更將之前嘅問題一一解決晒，令到我哋更加齊心去行以後幾十年嘅路。其實耐唔耐咁樣吵一吵都唔係唔好，大家可以趁呢個機會坦白 d 傾一傾。其實都係緊張對方先會咁嘅啫，所以，我深信下星期一影嘅婚紗相應該會好 sweet。

提起下個星期就要影婚紗相，我最擔心嘅就係天氣問題。雖然當日我影戶外景應該只有兩個鐘左右，不過話晒都叫影婚紗相吖，少少陰天都唔係咁想。加上今年嘅雨季好似維持咗好耐咁...... 所以今日返到公司就上網睇睇下星期一嘅天氣預測，結果......

個天氣都還可以啦！部份時間有陽光...... 即係有陰天嘅可能，到時對眼可以擘大 d，都係好事嚟嘅！而且溫度方面都算熱架啦，不過總好過星期日咁最高有成 34 度吖！

希望嗰日會好順利啦！

荷包急劇乾硬化

今個月真係倒錢月 ...... 收到張 credit card statement 真係肉痛死！

話說尋日約老豆及媽咪出去旺角裝身，當然係買衫褲鞋袜去做未來外父及外母啦！其實我都唔係好明點解要早成 1 年零 4 個月去幫老豆買西裝？不過媽咪一向都有焦急嘅性格，可能又因為師奶上身啦，又話驚人哋舖頭執笠，又話驚遲 d 加晒價等等（睇嚟個個都有加價恐懼症），再加上佢見我幫男朋友買到一對咁平嘅黑皮鞋，媽咪都唔執輸話要叫我幫老豆買返對。其實買鞋唔緊要，因為我見嗰間舖頭個樣真係好似想執想執咁，之不過套西裝.......真係要咁耐之前買定？希望老豆個身型唔好點變啦！咁樣搞一搞連埋食飯，我又冇咗 $1,471，睇嚟真係幫助咗香港嘅經濟 ...... 少少啦！

不過呢 d 總算叫做開心錢，雖然一日之內冇咗千幾蚊，不過最後佢哋都好開心，又滿載而歸，而且 d 衫又著得佢哋靚靚，洗少少都應該嘅！

睇返尋日買咗 d 乜：

1) 老豆嘅黑皮鞋（$90 <--- 又喺嗰間買呀，連個老闆都認得我哋，如果 OK 的話，我會不斷帶我同男朋友嘅屋企人去買鞋！）

2) 老豆嘅黑色直紋西裝 + 恤衫 （$650 有三樣嘢，OK 啦，點都平過喺 G-2000 買嘅！包埋改衫，仲要半個鐘後有得拎，幾好！）

3) May's Gi & Gary B9 假眼睫毛兩對（$20 成交，主要係 for 下星期去影第一輯婚紗相用嘅）

4) 銀色晚裝鞋兩對（媽咪出馬講價，由 $138 一對講到 $130 一對，師奶本色真係勁，總共 $260！但係同媽咪同款....... 不過是但啦，到時應該都冇人會注意得到）

5) 是晚晚餐（Pizza Hut，媽咪話要食扭扭腸 pizza 喎...... 不過食完之後...... 冇驚喜，唔會有第二次食同款 pizza，埋單四位總共 $451）

6) 仲有之前做開 facial 個 course 差唔多做完，開咗個新 course 做機，承惠 $6,000 / 20 次）

7) 之前仲幫細佬出咗部手提電話，又係用我張信用咭碌，雖然佢會分期還返 d 錢比我，不過我點都要比咗呢筆數先，唉，$3,880）

嘩，真係唔想再數落去，睇嚟今個月同下個月都要食麫包頂肚...... 都好，乘機減肥囉！

幫屋企人裝身嘅衣履雖然唔知買得算唔算抵，不過有興趣嘅網友仔可以參考以下我嘅 shopping list，尤其是嗰對黑色皮鞋，真係買得過架！

1) 佐敦吳松街 155 號地下（佢間舖好似真係就快執笠，要買趁手，男裝鞋依然仲有 9 折）

2) 旺角荷里活廣場 2 樓（呢個商場大部份嘅西裝都係咁上下價錢，唔一定去我買嗰間嘅）

3) 旺角兆萬中心地庫 2 樓 Box Garden（其實係格仔舖）

4) 旺角中心 2 樓某一間鞋舖

婚宴歌曲系列 - 愛很簡單

呢首歌實在太好聽 ~

真係架......好好聽！不過宜家開始已經變得有 d 老套嘅感覺！實在太多人用啦...

¯愛很簡單¯　　　　主唱：陶喆
作詞：娃娃　作曲：陶喆

忘了是怎麼開始　也許就是對你　有一種感覺
忽然間發現自己　已深深愛上你　真的很簡單

愛的地暗天黑都已無所謂　是是非非無法抉擇　喔~~
沒有後悔為愛日夜去跟隨　那個瘋狂的人是我　喔~~

I LOVE U　無法不愛你　BABY　說你也愛我　嗚
I LOVE U　永遠不願意　BABY　失去你

不可能更快樂　只要能在一起　做什麼都可以
雖然　世界變個不停　用最真誠的心　讓愛變的簡單
（獨白:讓愛變的簡單）

愛的地暗天黑都已無所謂　是是非非無法抉擇　喔~~
沒有後悔為愛日夜去跟隨　那個瘋狂的人是我　喔~~

I LOVE U　一直在這裡　BABY　一直在愛你　嗚 ya~
I LOVE U　永遠都不放棄　這愛你的權利

如果你還有一些困惑　Oh No　請貼著我的心傾聽
聽我說著　愛你 (Yes I really do)

Come on now woo
One more time
I LOVE U 喔　(Yes I Do)　一直在這裡　BABY Oh Ya-
一直在愛你　喔
I LOVE U　永遠都不放棄　這愛你的權利

我想求穩定

究竟你幾時先可以穩定落嚟呀？

我都唔想個個月咁樣提你 ......

我都嫌自己煩呀，講都講到口臭！

唔提你，又驚你唔記得；

提你，又好似吓吓管住你咁 ....................................................................

我都唔想做八婆呀 ...

我只係想過返 d 安定嘅生活啫 ......

你可唔可以自律 d？

我唔想成日擔心你呢樣，擔心你嗰樣呀 ......

可唔可以比機會我做返個正常人？

Promise？

又買到筍嘢 - 男裝皮鞋

2008 年 7 月 13 日（星期日）

3 日嘅婚紗展已經完結，今次同男朋友去咗 2 日，主要都係攞影婚紗相嘅單張，不過唔係打算再 join 多間，而係拎人哋 d 相辦做 reference，圈低自己想要邊 d style，下次影婚紗相時可以 show 比攝影師睇，咁就唔洗自己盲中中周圍搵啦。

之後去咗買男朋友影相用嘅黑皮鞋，因為佢平時只會著波鞋返工／出街，咁淨係影三輯相 + 結婚當日著，只係著得嗰 4 次，都諗住唔洗買太貴。其實男朋友都冇咩要求，只係唔要縛鞋帶款，我就要求要有光澤（唔想要啞色嗰 d）。之前行街時經過佐敦，見到有一間舖面非常普通嘅鞋舖，即係由 d 阿叔做老闆嗰 d 舊式鞋舖呢，佢門口擺咗好幾款嘅黑皮鞋，個樣都幾 ok 架，我仲見到佢哋標價 HK$100，簡直就係不可思議。但係當日只係路經，所以冇入去睇，結果尋日就特登去返嗰間鞋舖睇鞋。

其實去之前都擔心冇男朋友嘅 size，因為佢對腳真係好大隻，佢平時買鞋係著 44／45 號架 ...... 去到好快已經揀啱三款黑皮鞋，兩對賣 HK$100，另外一對賣 HK$150，之後再望真 d 間舖，原來有張 banner 寫住全舖嘅男裝鞋仲有 9 折，我即刻覺得點都要買返對先對得住自己。先試第一款 HK$100 嘅鞋，不出我所料，男朋友嘅 size 真係勁，冇佢嘅碼 ...... 咁試第二款 HK$100 鞋，佢哋要搵埋個貨倉先摷到最大嘅碼比男朋友試，不過又好好彩地啱著喎。結果試幾試，行幾步，ok！第三款都唔洗試就買咗啦！9 折後 HK$90，嘩，你話係咪抵到爛先？我同男朋友都非常之滿意呀，而且對鞋嘅皮仲好軟架，佢都話著得佢好舒服！

之後我哋經過專賣呢類鞋嘅舖頭 ---- Clarks（奇樂鞋），貪得意走去睇吓人哋 d 鞋係咪都係咁軟皮，竟然比我哋見到呢度都有得賣呢對鞋，而且仲要一模一樣添！不過人哋就賣得貴好多啦！原價 HK$4xx，特價 HK$300。連 Clarks 都有得賣，唔知係咪有牌子架呢？哈，我哋真係賺晒！！！

之前喺旺角先達廣場 2 樓都見到類似嘅黑皮鞋，算係最平嘅一間（金都好似要賣 HK$2xx 以上），本身都打算喺先達買，不過咁好彩遇到呢間舖頭，真係有運行！

拍拖 100 個月

2008 年 7 月 12 日凌晨零時，係我同男朋友拍拖 100 個月！

唔好以為我咁浪漫，其實我本身冇計過呢個日子架，都係一位網友睇咗我之前慶祝拍拖 3,000 日，然後靜靜雞提醒我，3,000 日後好快就到拍拖 100 個月！其實我都係今個星期一先知咋，數一數手指原來嚟緊嘅星期五就係，好在佢通知得我快啫，多謝提我嗰位網友！

禮物方面，我真係諗到頭都爆 ..... 都唔知送咩比男朋友好！佢鐘意嘅嘢通常都自己買咗，一係就貴到我冇可能買得起（之前男朋友仲話睇中咗一隻價值 6x 萬嘅手錶 .....，當然佢唔係開聲想我買啦，只係想證明自己幾有品味啫，睇中 d 高價貨嘛），咁試問我又點買得起呢？衫褲鞋袜？唔好啦啩，連佢自己買衫比自己都買唔到，更何況由我去買比佢呢？呢樣都係制唔過，一個星期以來係咁打聽佢想買 d 咩，佢就話冇嘢想買，咁好啦，唯有親手整嘢比佢食囉！男朋友好鐘意食芒果，但係因為兩個星期後就要去影第一輯嘅婚紗相，我又唔想買蛋糕咁 heavy 喎，結果就決定整芒果糯米糍。

由於我想比男朋友一個驚喜，我冇特登勞師動眾去 d 咩特別嘅食肆慶祝，只係去返我哋時常幫襯嘅餐廳。食完嘢之後就梗係到送禮時間啦。其實佢收到盒嘢食時，我都見佢幾 surprise 架，尤其是見到我有個朱古力牌寫住「100 個月」嗰陣，佢個反應幾「估唔到」 ...... 係呀，你冇睇錯呀，唔覺唔覺我哋喺埋一齊咁耐啦！

講返個芒果糯米糍，其實真係易整到暈，加上我屋企又冇焗爐，整呢類甜品就最啱啦！最緊要就係男朋友鐘意食芒果吖嘛 ....... fit 晒佢 ~~~

芒果糯米糍食譜：

材料：

• 即棄膠手套／保鮮紙


• 芒果一個


• 糯米粉 300 克


• 芒果汁 300 毫升


• 糖 2-3 湯匙 （可隨個人喜愛增減甜度）


• 牛油少許


• 椰絲適量

做法：（份量約 30 粒）

(1) 芒果切粒，備用

(2) 將糯米粉倒入大碗內，加入砂糖搞勻，然後逐少加入芒果汁（加芒果汁前可在糯米粉中開個小穴，倒入芒果汁，由中間順單一方向開始搞勻，粉漿就會滑 d）

(3) 搞勻後將粉米粉漿倒入大碟內

      (a) 使用微波爐：

            倒入微波爐盒，蓋好微波爐盒蓋，用高火叮 4 分鐘（記住把蓋蓋好，否則

            粉漿會好乾）

      (b) 隔水蒸：

            放入蒸鍋，隔水蒸 15-20 分鐘

(4) 煮熟後，輕輕搞勻，待稍涼

(5) 戴上膠手套，於手套上搽少量牛油，以免包糯米糍時黏住

(6) 拿出少許粉團，放入芒果粒，搓成圓形

(7) 洒上椰絲，放在小紙杯上，即成

***********************************************************************************

登登登凳，以下就係我嘅製成品啦 ~ 總共做咗 30 粒出嚟，不過呢度只有 26 粒，因為我一路整，阿爸阿媽一路食，每人食咗我兩粒 .... -_-"

個賣相幾好架，睇得吓架，你哋睇，幾精緻 ~~~

因為我要送比男朋友，所以特登買咗個心型盒返嚟裝住 d 芒果糯米糍

不過我又唔想就咁放晒 d 糯米糍入個盒到咁單調，話明拍拖 100 個月，梗係要做返少少嘢突出「100 個月」啦！所以我又買咗塊空白嘅朱古力牌返嚟，再買埋支朱古力筆打算自己寫 d 字上去（呢支朱古力筆真係貴，鬼咁少朱古力要賣 HK$15）

寫好啦 ...... 我手字幾工整，哈哈！

放埋個朱古力牌入去，呢盒就係我送比男朋友嘅芒果糯米糍啦！

時間真係過得快，咁快就拍拖 100 個月，唔知幾時先可以慶祝結婚 100 個月紀念呢？

夫妻的姻緣

她比他小 20 歲，嫁給他的時候，家鄉的人都以為她傍上大款。只有她知道，他到底是一個什麼樣的男人。

他只是一個普通的男人，黑，醜，一口黃牙。媒人當初可沒這麼說，只說是個過日子的男人，就因為家裏窮給耽擱了，一直沒找上妻子。那陣子，沒找上妻子的都去山區找，有四川的、山西的、湖南的……花幾千元就可以找來。那男人也托人帶一個回來，這就是她，一個死了丈夫的女人。

媒人說男人富著呢，靠手藝吃飯。女人因為急於逃離那個家庭，問都沒問男人會什麼手藝就嫁過來了。過來後才知道，他的手藝就是在外面風吹雨淋地修鞋，再加上男人長得醜陋，讓她有種上當的感覺。回去已無退路，婆家人叫她喪門星，說是她剋死了丈夫。

再婚後，男人很寵她，隔三岔五給她買些小玩意來，一盒粉餅，一支口紅，幾串荔枝……她長到 30 歲了，從來沒有用過口紅，更不用說吃荔枝了，很快，她就覺得自己比楊貴妃還要幸福，吃荔枝的時候，男人不吃，只是傻傻地看著她吃。她說：「你也吃。」他說：「我不愛吃它，看著你吃我就高興。」後來，她偶然上街，隨口問了一下荔枝的價格，嚇一跳，竟然要 20 元 1 斤。她的眼睛一時模糊了，他怎麼可能不吃荔枝？他是捨不得吃呀。

她更加疼他，早晨早早起來給他做飯，晚上做好熱乎乎的飯菜等他回來；冬天的時候，男人在街上修鞋，一天下來，凍得全身冰冷，女人就把男人的腳放到自己懷裏暖著。男人也很知足，說是上輩子修來的福才會娶到她，他為什麼 50 歲還沒有結婚，就為等她唄。說得女人心花怒放。

女人見男人每天那麼累很心疼，她說：「給我買台機器吧，我和你一塊修鞋去。」男人不答應，說他掙的錢足夠養活她，可女人認真了，偏要去。於是街上總能看到一對老夫少妻在修鞋，兩個人緊挨著，有鞋修的時候，兩個人就一起動手，空閒時，就有說有笑地聊著。冬天刮大風，女人的手都凍紅了，耳朵也凍得青一塊紫一塊，這時，男人買來一塊烤紅薯，紅薯散發著誘人的香味。男人剝開，用嘴吹著，卻不吃，他把紅薯放到女人嘴邊，女人幸福地咬一口，又吹一吹，讓男人吃。他們一人一口地吃著，好像享受一頓美食，好像吃著愛情的聖餐。

有一天，男人對女人說：「總有一天，我會走在你前面。」女人就哭了，說：「那我和你一起去。」

男人說：「不行！」然後男人又說：「我們現在的錢還不是很多，再掙幾年，給你養老應該沒問題。還有，我給你在地裏種了 500 棵樹，等有一天我去了，你也不能動了，那500棵樹也長大了，我相信它們能夠養活你。」

女人撲到男人懷裏哭了。500 棵樹，那只是 500 棵樹嗎？這一輩子從沒有人替她這樣想過，可是這個男人甚至為她想到老年，她覺得這輩子真是值了。現在城裏人興什麼夫妻樹、愛情樹，而她的男人給她種的樹要比那些樹珍貴一萬倍，那是一片夫妻同心樹。

快樂不是因為擁有的多，而是因為計較的少，在此默默祝福看到這一篇文章的人...

DIY 襟花@材料篇

2008 年 6 月 11 日（星期三）

其實當初冇諗住整襟花，因為用嚟整花球嘅紫玫瑰都唔夠用，何來有花多出嚟整襟花呢？不過後來買吓買吓又買多一紮紫玫瑰，既然有花又有時間，不如整埋個襟花啦！影婚紗相時有花球但冇襟花，始終有少少怪嘛 。一直都以為襟花好易整啫，但唔係親手整過都唔知，其實有 d 地方都要用吓腦架 .....

做襟花嘅花材簡單好多，我準備咗一朵紫玫瑰，一 d 滿天星做襯花，買埋襟花扣同埋絲帶，基本上已經齊晒材料啦！

呢個襟花扣係購自繽紛。雖然佢只賣 HK$5，唔算貴，不過，原來你一次過買 12 個的話，都只係 HK$35（呢個係溫馨無限嘅價錢，繽紛仲要貴 d，同樣係賣 HK$35 一包，不過就只有 10 個），除返開，其實我呢個都幾貴，anyway，我唔係大量整，HK$5 咪 HK$5 囉！

至於絲帶，由於我要求唔高，只要閃閃地銀色就 OK 啦！眼見一般嘅文具舖、繽紛及溫馨無限都要賣 HK$16 一卷，我突然醒起，不如去公司樓下嘅吉之島 HK$10 店碰吓運氣都好！哈，咁啱又比我見到得返一千零一卷喎，一樣係賣 HK$10，我諗都唔諗就買 lu！

當然，相比起 HK$16 嗰 d 可能會細卷 d 啦，不過我都係整一個襟花啫，足夠有餘啦！有剩嗰 d 絲帶遲 d 會喺其他地方 DIY 用埋佢，咁就合乎我嘅經濟原則啦！

好，又係時候埋首整吓個襟花啦，希望會整得靚靚啦！

男士禮服恤衫，平、靚、正

由於尋日去咗金都商場睇 Snoopy 結婚公仔，順道望吓 d 男士禮服恤衫準備 8 月去影相時用。其實男朋友對於恤衫嘅要求唔大，主要係白色簡單款就 OK，佢最唔鐘意有嗰 d 貎似一 pat cream 嘅 lace 喺心口就得架啦！所以我哋就用掌紋鎖定呢款恤衫（搞爛 gag 中 ...）！

其實金都都幾貴，最普通款一件直紋（應該叫做直鈒（音「習」）） + 黑色鈕嘅白恤衫都要賣 $180，有金邊／銀邊再貴 d，大約要 $2xx - 3xx。我哋當然唔會咁容易做水魚啦 .... 之前上網聽人講過旺角荷里活商場都有禮服恤賣，大家都係旺角區，當然過去睇埋格吓價先啦。我哋先殺上一樓，間間都有得賣咁滯，都唔知揀邊間去問價好，所以求其問咗 3-4 間，發覺間間嘅價錢都係 around $148，諗住上去二樓睇埋，如果都係咁上下價錢的話就喺求其一間買算數。

上到二樓兜咗個圈，見都係咁上下，打算落返一樓買之際，我 sharp 醒嘅一雙眼見到有一間賣 $98（1-5 碼）／$108（6-7 碼）？？？諗都唔諗拎上手望，同之前睇嗰 d 根本就一樣，金都真係食水深！如果你哋有需要，可以喺嗰間買，真係平成倍咁滯！基本上佢哋係咁分 d 碼數：如果男士嘅頸圍 under 16.5"，5 碼已經啱著，男朋友咁大件頭都係買 5 碼咋。所以我哋買咗兩件，埋單都只係 $196，不過佢哋冇晒黑鈕款，之前問咗幾間都話得返好少貨，原來黑鈕已經唔再出咁滯啦！所以買咗一件係水晶鈕，一件係暗鈕款！都好嘅，黑鈕款通街都係，著吓水晶鈕都好吖！不過我覺得其實買咩款都冇所謂啦，男仔著咗恤衫之後又要著背心／腰封，裡面著咩其實都睇唔清楚啦！

水晶鈕款

暗鈕款

不過呢間舖頭冇得比你試上身，真係要睇你信唔信個老闆娘用軟尺 +肉眼度身嘅功夫啦！到今時今日我都未係好相信男朋友竟然可以唔洗買加大碼 .....不過佢的確著得到 5 碼恤 ....

舖頭資訊：

旺角荷里活商場二樓，一上樓梯見到有好多蝴蝶呔喺舖面嗰間就係啦。間舖頭專係同人度身做西裝禮服，應該好易搵。

Snoopy 結婚公仔 - confirmed

伴娘小姐去完旅行返嚟啦，點知得到個壞消息，就係佢幫我買唔到 Snoopy 結婚公仔 lu。其實自己都預咗佢未必買到，就算買到的話又要佢同我拎餐懞，都有 d 唔好意思！宜家，我唯有去買返金都嗰對啦，雖然手工冇日本版嗰對咁靚，不過金都嗰對絕對見得大場面架！

之後上 esdlife 同網友傾開，遇到另一個 Snoopy fans，佢就係買咗金都嗰對做結婚公仔，真係多得佢提醒，嗰間舖頭原來係冇現成公仔買，佢會重新做過一對新嘅比你，不過製作需時，我尋晚開單，講到明想喺 8 月底影婚紗相時帶埋對公仔去，佢都唔敢寫包單話做得到比我！不過之後佢話即晚開工同我做，希望喺 8 月底之前做到比我。我都希望佢真係搞得掂，咁我對公仔就可以出鏡啦！

宜家就唯有等，舖頭嗰邊暫時 8 月 20 日可以起到貨，期待中 ~~~

不得不提嘅係我買平咗，同一間舖頭，同一對公仔，比起我 3 星期前平咗 $19 大元。上次去睇嗰時佢賣緊 $498，今次埋單只需要 $480，仲 offer 咗一個優惠價比我，加 $120 有齊晒花車公仔花托，V 字帶及四個車門蝴蝶，不過我其實有諗過 DIY，我要做一架 Snoopy 花車出嚟（諗就咁諗，到時唔知做唔做到），而且 $120 好似偏貴，我見人哋買 4 隻車門蝴蝶都係 $1x-2x 之嘛 .... 況且金都嘅水準我依然有少少保留，都係遲 d 先算！

婚宴歌曲系列 - Forever Love

再來一首婚宴經典歌，王力宏嘅 Forever Love。記得當時呢隻歌一出，男朋友成日唱住，唔知佢係咪好鐘意呢首歌呢？不過由於呢隻歌都係過於普遍，我諗我都未必會用作成長片段嘅歌 lu ~ 不過呢首的確係一首好深情嘅歌呢！

¯FOREVER LOVE ¯　　　　主唱：王力宏

作曲：王力宏　　填詞：王力宏／十方／何啟宏／于景雯

愛你　不是因為你的美而已
我越來越愛你　每個眼神觸動我的心
因為你讓我看見 Forever　才了解自己
未來這些日子　要好好珍惜

愛我　有些痛苦有些不公平
如果真的愛我　不是理所當然的決定
感到妳的呼吸在我耳邊　像微風神奇
溫柔的安撫　我的不安定
所以我要　每天研究你的笑容　ooh　多麼自然

Forever Love　Forever Love

我只想用我這一輩子去愛你
從今以後　你會是所有　幸福的理由

愛情　是場最美最遠的旅行
沿途雨季泥濘　偶爾阻礙我們的前進
感到妳的體溫在我懷裡　像陽光和煦
巧妙的融化　我的不安定
不可思議　證明我愛你的理由　ooh　多麼自然

Forever Love　Forever Love

我只想我用這一輩子去愛你
從今以後　妳會是所有　幸福的理由

妳感動的眼睛　我沉默的聲音
彷彿就是最好的證明
就讓我再說一次　I love you oh (直到永遠)

Forever Love　Forever Love　

我只想我用這一輩子去愛你
從今以後　妳會是所有　幸福的理由

Forever Love　Forever Love　Forever Love