我係咪過輕？ @ 32W 及 33W 產檢

2013 年 7 月 26 日 (星期五)

@ 31W6D 健康院產檢

踏入 30W 以後，健康院規定每隔兩星期就返去檢查一次。
原本以為今次都係好 hea，見完姑娘就閃得，點知因為體重輕得太少而被安排去見醫生。

話說今次同平時一樣，去到先磅重，驗小便，量血壓，見姑娘聽 BB 心跳 + 度肚圍，再見另一個姑娘了解下呢兩個星期嘅懷孕情況，然後就走得。

點知今次一上磅，58.9kg，我望一望枱面上自己個報告，兩星期前嘅磅數係 58.7kg，咁即係話我只係重咗 0.2kg。姑娘話要我磅多次，唉，但係磅多次咁又點，仍然係得 58.7kg。不過姑娘話我只係重咗 0.1kg，其實明明 58.9 - 58.7 係 0.2，佢係都要話我重咗 0.1kg。

結果我以為可以過關走得之時，有個姑娘跑出嚟同我講：你重得太少啦，要去見醫生，見完醫生先走得。平時如果冇咩問題係唔需要見醫生，估唔到今次因為體重問題要第一次被安排見醫生。

入到去醫生房，佢就問我自己估唔估到咩原因重得咁少。我好老實咁答佢，由我懷孕以嚟，我胃口冇特別增加得勁咗，食量仍然同未有 BB 前差不多。而且我冇任何害喜反應，一直都食到嘢，就係唔知點解唔係重好多。醫生話每個孕婦每兩星期返嚟覆診要重 1kg，而我只係重 0.1kg，係人哋正常嘅十份一，宜家冇嘢驚，只係驚個 BB 唔吸收，出世會比較輕磅，到時要訓加護箱。咁我梗係問 BB 宜家 size 正唔正常啦，醫生話政府冇得照，唔知 BB size，佢哋只係度子宮 size，每次返去覆診子宮比之前大 1cm，我今次啱啱好大咗 1cm，所以醫生話 BB size 係「可接受範圍內」。唓，咁即係要我出私家照啦。之後醫生話叫我每日加一餐下午茶，但唔好加宵夜，因為宵夜好容易肥晒喺媽媽度。之後佢仲好凝重咁同我講：只要你當日唔係飽到嘔，都唔該你加返餐下午茶。下午茶可以食芝士，生果，乳酪，梳打餅等等。<-- 其實呢 d 嘢我耐唔耐都有食下當 tea，不過就硬係唔算重好多，我問醫生萬一我跟住做，但係兩星期後返嚟都係重得唔多，咁點算？醫生話咁冇辦法，或者你真係唔長肉，如果其他方面都一切正常，咁就無問題。

離開健康院後我有 D 唔開心，係咪因為我真係平時食得太少而令 BB 唔長肉？但係我由始至終冇去 keep fit，每一餐我真係食到有飽我先收手架！

下星期五就輪到去私家覆診，呢次好關鍵，因為可以知道究竟係 BB 唔吸收，定係母女都唔吸收。



2013 年 8 月 2 日 (星期五)

@ 32W6D    私家產檢

今次去私家好緊張呀，因為即將開估 BB size 正唔正常。

我記得睇過 d BB 會資訊，我呢個週數 BB 應該要有 4 lbs 或以上。

今日見到黃醫生時同佢講晒健康院所發生嘅事，佢叫我唔好擔心，其實我 BB 嘅 size 一向都係中碼 B，唔洗刻意谷肥佢。

安慰完我就去照超聲波，黃醫生幫佢度晒頭圍，肚圍等等等等，叫我唔洗擔心，因為 BB 有 4 磅 12 安士，佢有長大到呀，所以叫我放心，仍然係中碼 B 一個。我順便問埋黃醫生如果推測落去，BB出世會大約幾重，醫生話估計有 3.3kg，即係 7 磅 2 左右。OH!!!! 我其實好希望 BB 出世唔好過 7 lbs，咁樣我會易生 d。雖然我明白私家嘅數據未必 100% 準確，但係我估冇十足都有 8 成啦，所以我終於放下心頭大石。而且我怕 BB 太大舊，決定今日開始隔日食烚蛋，隔日飲鮮奶。視乎下一次返私家覆診就知有冇成效。yeah! 我可以開始慢慢遠離日日食烚蛋 + 鮮奶嘅日子啦！

BB 請你繼續乖乖，每一次見醫生都要有體重增長，咁先係我嘅乖女！