4D 產檢 @ 16W2D + 喪入媽媽會

最近因為公私事兩邊忙，累積咗好幾篇 blog，要加把勁追返先！

2013 年 4 月 8 日 (星期一)

由於之前睇開個高醫生冇得照結構，而佢本身 refer 嗰間好似都話麻麻地，所以就要靠自己搵醫生。喺 Baby Kingdom 誤打誤撞後見到黃建新醫生，comment 大致上都幾好，做結構亦只係 $1,400，問埋普通產檢原來都只係收 $500 (有一張 4D 相)，一於試試佢產檢先，如果印象良好，結構都係比佢賺架啦。

朝早 10:30 同歐陽生一齊到咗診所，同我度高、磅重、量血壓、度心跳（之前高醫生呢 D 全部都冇做），已經覺得加分。所有嘢都正常後開始等見醫生。我都唔明佢 10:00 開診，點解我約 10:30 （應該第二個症吖) 都要等大半個鐘先有得睇....

入到診症室，開始一般嘅問診，黃醫生都幾細心，講嘢唔算太細聲，而且有問有答，都幾 ok。之後就係最期待嘅環節 --- 照超聲波。

今日我係一心打算照性別架，因為 16W2D 其實性器官已經發育得 7788。可惜 BB 唔太合作，佢全程用個背脊得住我，兩隻脾又夾到實一實，無論我點郁 + 醫生點震我個肚佢都係冇反應，應該訓緊覺覺豬，仲係好冧嗰隻。照唔到性別，唯有睇下其他嘢，醫生話初步見到佢冇兔唇，仲度埋頭圍，脾長等等，全部都係只得醫生一個睇得明...

照照下醫生竟然由 2D 轉咗去 4D 比我睇，仲比埋寫真我哋添！

BB 當時就係咁啦，全程用個背脊向住我哋，仲好似好慘咁比人罰扭耳仔... 醫生話宜家 BB 只係得層皮同埋 D 骨，所以望落去係比較瘦，但唔洗擔心。

醫生都算叫有耐性，幫我同個 BB 鬥爭咗差不多 10 分鐘，阿 B 都係維持呢個 pose，所以最後都係放棄，唯有下次再照性別。

既然得唔到答案，我就一於喪入媽媽會。因為記得之前喺 Baby Kingdom 見過有媽媽提醒，如果透過私家診所入會的話，迎新禮物一定會比自己上網入會多。BB 物品樣樣都貴，我當然會好好把握呢個機會，向診所姑娘拎表。姑娘都好好人，佢只係拎一 D 有贈品嘅會比我入，以下就係 A+ 美贊臣、雀巢同埋惠氏嘅贈品，估唔到個個會都送1-2 罐奶粉咁大手筆，我都應該慳返唔少。

美贊臣（最豐富）：
一個媽媽袋（其實幾醜樣，不過係贈品就唔應該嫌三嫌四）+ 兩罐 A+ 1 號奶粉 (for 0-6 個月）+ 一張被仔 + 一件和尚袍 + 一對手套仔 + 一條紗巾

雀巢：
一罐 1 號奶粉 + 一張 ABC 貼紙

惠氏：
佢嘅贈品當然有就最好，但係我都係「恨」佢張會員咭多 D，因為用惠氏會員咭可以去護協買嘢呀，咁我到時就可以大手入貨 lu。
一罐 1 號奶粉

隔幾日後，因為出開旺角，又順便去埋位於太子嘅 BB Care 入會，同樣嘅做法，只係入一 D 有贈品嘅會，今次入咗 Pampers、Huggies 同埋 Disney。

Disney：
一本 note book + 一把紙尺 (用嚟度小朋友嘅身高) + 一本英文書 (內含兩隻光碟)

Huggies：
New Born 尿片試用裝兩片 + 0 號尿片試用裝兩片 + 健力氏紙巾 + 一塊護墊 + 3 張 coupon

Pampers：
New Born 尿片試用裝 8 片 (共兩包) + 濕紙巾一包



經過一輪大豐收之後，自此我就好鐘意入媽媽會同埋參加不同嘅產前講座。講座除咗真係可以幫到我呢個新手媽媽不少之外，當然都係想拎贈品啦，我最近參加咗一個講座會送奶樽添呀~~~ 有賺！