今日第一次去健康院做產前檢查。之前揀健康院時都三心兩意咗一排，論位置，應該係天水圍健康院最近我，但係論效率，應該元朗嘅容鳳書唔洗點等。所有天水圍嘅準媽媽都去晒天水圍健康院，有次打去問嘢已經聽到好嘈好嘈，又怕多單非媽媽，最後都係決定揀元朗容鳳書。
當日個期係 9:30，又要留小便又要食早餐，真係早過平時返工起身。健康院仲話由於係第一次，有好多 test 都要做，所以要預留一個上午。當日我都玩到 12:35 先走人，仲要全程老公冇得入診症室，真係陰公，我見老公等到釣晒魚..... 下次都係自己一個去得啦。
一去到又係等嗌名度高磅重驗小便，驗小便嗰 part hea 到不堪，睇嚟唔可以靠呢樣嘢驗到自己有冇妊娠糖尿。
之後又要填問卷，份問卷只係一張 A5 size 紙，但係等交問卷就等咗我一粒鐘。
見姑娘時又係問返同一堆問題，同埋教餵人奶（咁快教？）
之後再等.... 等到見醫生，呢 part 先叫有 d 得著。
話說我入到房訓上床，要全裸.... 因為要驗胸 + 下體，好彩係女醫生!!!
醫生叫我吞啖口水比佢睇，然後再聽我心跳，做完一大輪測試之後佢同我講結果。
醫生第一句就問我：頭先見你吞口水時你條頸好腫喎，同埋你心跳都好快，你有冇甲狀腺問題？
我心諗：咦，呢個醫生堅喎，好多醫生都唔為意我有呢個問題。我答佢：其實我一向頸部都係比較粗，不過應該冇咩事。
醫生：咁你知道自己有 BB 後有冇驗過有關甲狀腺嘅嘢？
我：有呀，第一次見私家醫生時我已經問過，抽咗血驗甲狀腺素，不過驗血報告話我正常。（好彩真係有做 checking，否則好似好不負責任咁）
醫生：咁啦，你喺呢度都抽多支血驗多次啦，等我哋呢邊都有你嘅 record。
突然覺得政府嘢冇我想像中咁 hea 喎~ 血我大把，隨便抽，最緊要驗到健康。
醫生仲叫我下次去檢查時帶埋私家份報告返去比佢哋做 record。
唔好以為抽血好簡單，唔知今次要驗 d 乜每個孕婦要抽 4 支血，而我.... 因為要驗埋甲狀腺素，比人抽多一支。
本來我都對 D 姑娘好有信心，因為之前幾次抽血都冇問題，而我自己本身都唔係好拍抽血。點知今次遇著個生手定係大意嘅姑娘..... 抽到第 3 支時竟然我 d 血流咗出皮膚出面，好似發生命案咁仲整污糟咗佢哋個 cushion。個姑娘竟然第一句說話係：哎....... 我仲有兩支血未抽架..... <--- 有冇搞錯???
唔洗問.... 咁搞法，我隻手當然係一定一定會瘀!!!!!!!
下次返去檢查先知驗血結果，佢話無論有問題定無問題都唔會打電話通知你！
沒有留言:
張貼留言