尋日嘅心情真係極為複雜，直情可以用「來回地獄又折返人間」嚟形容。
見醫生前個心真係跳得好快，個衰佬又話嚟陪我睇醫生，我睇完佢都未到。=_=
尋日一入診症室，高醫生就問我：hello，你點呀？
我：幾好呀，完全唔覺自己有咗 BB，行得食得訓得又無嘔無暈
醫生：有 d 人係咁，我有客人試過自己有咗 5 個月都唔知，不如我哋照咗先啦。
我乖乖訓上張超聲波床，等醫生即將開估 BB 究竟有冇心跳，但我個心跳得仲勁。
醫生吱咗 d 啫喱喺我肚上，我已經眼定定望住個 mon，佢碌咗好幾下個 mon 都冇料到，嗰 10 秒 8 秒其實個腦浮咗好多嘢。然後負面思緒又令我諗.... 死啦，冇嘢睇到嘅，之前見到嗰個會唔會只係水 pok 而唔係胎囊？開始有 10 萬個問號....
唔知係部機未 ready 定咩原因，好在之後都見到個胎。我以萬分之一秒時間就見到胎囊入面有個胚胎，咁即係話我唔係空心胎啦，心裡已經暗暗地笑咗一下。
第二關心嘅就係究竟有冇心跳。。。醫生都未出聲，我已經見到 BB 個身體有一點閃下閃下，比起我想像中閃得快。醫生都話，嗱，呢個係 BB 心跳啦。嗚嗚嗚。。。好想喊。。。好感動呀～
我一大堆問題要問：呢個係咪頭、手、腳？BB 心跳正唔正常？一分鐘幾多下？足唔足 size？
醫生話全部嘢都正常。Thank God!
我知自己一向都週期長，之前 period 仲要亂晒大籠，所以尋晚去照 BB size 有 7w5d，但如果用最後一次 period 計我應該 8w5d，足足細咗一星期。不過醫生話正常嘅，冇問題。
後來佢開咗 d 鈣片比我就 byebye，承惠 HKD800。做專科醫生真係好賺...
醫生知我會喺屯門醫院生，寫咗轉介信比我，我臨走仲喺診所拎咗成大疊媽媽會入會表格，返屋企先慢慢填。
BB 你要生性，你真係好叻。
你爸爸仲未親眼見過你嘅心跳架（鬼叫佢遲大到），所以下次再嚟覆診時你再比心跳爸爸睇。
沒有留言:
張貼留言