中獎了

2013 年 1 月 21 日 (星期一)

尋晚硬係訓得唔係幾好，喺張床都 hea 到兩點幾都眼光光，隔離嗰個當然大覺訓咗好耐啦。朝早 7 點幾就醒咗 (平時我 8:15 先起身返工)，喺度左諗右諗，萬一一陣驗到係 positive，我應該點做好呢？點同家人講呢？幾時同老闆講呢？又想像下佢哋嘅反應，等等。Hea 到 8:00 鬧鐘響咗第一次，我就索性唔諗咁多，走出廳驗。

結果係 pregant，仲估計有 3+ weeks，嗰時都只係 80% 相信。。。

立即入房同訓到朦朦朧朧嘅歐陽生講，佢都起咗身，仲叫我去睇醫生。我本來打算請上午假去睇醫生，不過老公話陪埋我去睇，叫我安排下晝，都好，還掂我仲未做 research 邊個婦產科醫生睇得過，一於下晝先啦。

返工時成程車就係咁同 d 經驗人士 whatsapp，朋友介紹旺角雅蘭一位叫高正東女西醫，估唔到即日仲有個 5:00 位，call 埋老公一陣診所見。

去到診所登記完再等差不多成個鐘，我哋兩個入到診症室同醫生講：「我想驗孕，因為經期遲咗 14 日仲未嚟，我連續兩日自己用驗孕棒驗過話 positive。」估唔到個醫生答我：「哦，咁係架啦，唔洗驗架啦。」

雖然聽落好兒嬉，不過佢其實幾有耐性。問完我一輪資料之後就去照超聲波。



原來黑色嗰粒就係胎囊，裡面仲有一個叫做營養環，但因為周期仲係早，暫時未見到 BB，醫生叫我兩星期後再嚟覆診，到時就會見到 BB，有埋預產期先寫紙我去醫院登記，初步估計有咗 5 週幾。

哎吔，等我仲以為自己係周期不順，上星期三走咗去睇中醫，佢開咗 d 中藥比我，唔知對 BB 有冇影響添。

到咗呢一刻，我都只係有 99% 相信，始終未見到 BB 真身，我仍然都覺得自己唔係一定中獎。