50% 的肯定

2013 年 1 月 20 日 (星期日)

估唔到踏入 2013 年真係有喜事發生。

話說 period 遲咗 12 日都未嚟，但我冇理會，因為最近呢 3 個月唔知點解成日都遲 10 日 8 日，之前都好準嘅。。。之前一日同弟婦 msn 傾起，佢質疑我其實我係咪中咗獎，我當時一口就 say 咗 NO，因為呢排經期唔準，就算當中有同老公努力過，都未必咁好彩夾到中獎日子。二嚟，我成日都認為要 BB 唔係咁容易，幾多人試 N 次都未成孕，我都係 12 月先開始無避孕，我完全唔覺得我會係「想要就有」。

夜晚同老公傾起同弟婦嘅一番說話，佢就講：其實我都覺得你呢排身材好咗。<--- 唔？真的嗎？個胸大咗我自己都的確 feel 到，但我以為自己只係谷 M 咋喎。口就話冇可能，但為咗排疑，而且屋企有驗孕棒存貨，一於第二朝起身就驗下。

結果放入尿液中唔夠 5 秒，兩條線立即出現咗。。。而且仲好深色添

我對結果只係相信 50%，我喺度諗.... 係咪架？因為我所有前期嘅徵狀都冇喎。。。

- 眼訓？無喎，平時返工冇嘢做，飯氣攻心恰眼訓就有，仲頂唔順去咗廁所蛇王添，咁算唔算？
- 大食？無喎，胃口同平時差不多，有時反而仲細食咗。
- 好攰？都無啫，人哋話孕婦會好攰，成日都想訓。我冇囉。。。。吖，有！平時慣咗兩點幾先訓，最近點幾就恰眼訓，算唔算早咗？

唯一中咗嘅徵狀只係乳房脹痛，但係呢 D 平時我谷 M 都會啦，所以我懷疑係咪我放支捧放得唔好，所以影響測試結果？而且支捧係我之前貪方便上 yahoo 買，只係 HK$29，我有 D 質疑佢嘅準確度。。。。 haha

將個結果 whatsapp 咗比老公知，佢叫我聽日返工時去睇中醫 check check。我就寧願買支貴嘢第二朝再驗一次，如果仍然話我 positive，我先去睇醫生，所以走咗落去萬寧買多支 Clear Blue Digital，其實都唔算好貴，HKD85.9。

好，聽日就知結果！

註：因為只係 50% 的肯定，當晚仲食咗生蠔，飲咗酒，XD