充實澳門遊 ~ I am ready!

Go Go Go~~~

數數手指，其實有一段時間都冇過大海。唔知點解，澳門我一向唔太熱衷。

賭？唔啱。
玩？澳門都無乜嘢好玩啫。
食？都 OK 嘅。但係要我買船飛再租酒店只係去食，又好似唔太化算。

既然係咁，今次點解會去呢？因為...... 偶像郭富城於 29/9 喺澳門開巡迴演唱會 - 澳門站。

之前一直有朋友叫我去台灣站、新加坡站，話氣氛會比香港好好多。不過我未至於追星追到呢個地步，澳門近近地，就去澳門啦。而且，公司有個員工福利，去澳門者，可以由公司出錢，包來回船飛及酒店，所以今次過去澳門睇 show，基本上我只係出錢買門票。好嘢！適逄 29 號開始有一連 4 日中秋及國慶假期，我提議不如留多一晚啦，故此就促成咗今次 3 日 2 夜嘅澳門之旅 (好似都未試過喺澳門 stay 多過一晚)。

第一晚就去睇郭富城，咁第二晚做咩好呢？

實不相瞞，我仲未去睇水舞間架，上網 check 到仲做緊，咁不如買埋門票去睇。買飛時留意到原來澳門當地人買飛會平 d，同樣 A 區 (話係最正面，最貴嗰區喎)，一般人買要 HK$880，澳門人買只需 HK$790，每位慳近乎 HK$100，所以立刻打盡人情牌叫澳門同事幫手買。

由於香港站嘅演唱會已經睇咗 6 場，今次唔會再咁癲買最貴嘅座位，HK$680 好了，感激歐陽生仍然陪我去癲。

水舞間我只要求唔好濕身，雖則知道會係有限度嘅濕，不過都係唔想麻煩。澳門同事幫我揀咗兩個位係對正面台，sales 姐姐仲同佢講話係最多人買嘅一個 section 喎，信住先啦，thank you！

船飛方面都搵同事訂好，到時可以直接出飛，聽講會係豪華位。

住宿方面亦都訂好，會入住 Galaxy Hotel，貪佢對面就係威尼斯人，而且同新濠天地又近，方便我睇 shows。聽講 Galaxy Hotel 有個人造沙灘，不過唔係大，但係仍然好好好期待。

咁啱澳門由 9/9 開始每星期日都舉行緊煙花比賽，本身我哋打算 29/9 睇 Aaron，30/9 睇水舞間，1/10 返香港。撞啱 1/10 國慶日澳門有最後嘅一場比賽，歐陽生話既然 2/10 唔洗返工，不如睇埋先走。

Yeah!!! 所有門票都到手啦！宜家只係靜待 29/9 來臨嘅一刻！從來去澳門都只係 hea + 食 (一味掃街)，真係未試過有一次係咁充實。