驚喜生日在三亞 @ Day 1 (三亞市中心)

2012 年 5 月 9 日 (星期三)

上一篇 blog 講到歐陽生做咗好多網上資料搜集都搵唔到比較 update 嘅遊記，所以我就決定今次出手寫得詳盡 d，希望大家唔好嫌我長氣。

遊記正式開始~~~~

今次唔知點解歐陽生揀咗坐香港快運。不過正好，之前諗住 11 月個結婚紀念日本 trip 坐香港快運，今次就親身體驗一下服務質素及準時起飛與否。



以往出外旅行，check in 呢類咁濕碎嘅 admin work 通常都係由我負責，所以我都明白歐陽生其實唔係太識。出發前佢只係幫佢自己做咗 online check in，可憐嘅我要重新排隊補做 -_-"。不過香港快運勝在乘客唔多，我都好快搞掂。辦完手續仲有少少時間食返個翠華早餐添。心血來潮好想好想食炒蛋.... 所以個麵由歐陽生 K.O.，我只係負責份蛋，^^

有心理準備知道香港快運個閘口要坐巴士先去到，所以我哋都預鬆咗 d 時間。

飛機上環境都 OK，服務員態度友善，今次班機唔爆，哈.... d 位唔啱可以坐到啱。

結果，香港快運都可以準時起飛，抵讚！起飛後，又係我嘅指定動作 --- 影雲！



由香港飛三亞只需要 1 小時 5 分鐘，所以飛機餐方面只係一個餐飽 + 水。餐飽係豬肉餡，食落其實等於酒樓嘅叉燒飽，只係個包皮硬身 d。不過因為頭先食咗個豬仔飽 + 炒蛋，所以我食咗少少後又落咗歐陽生個肚。



到達三亞後，比我第一個感覺係熱 + 曬 + 地方空曠。
三亞鳳凰機場嘅規模當然冇香港咁大啦。整個機場感覺好似用木材搭成，冷氣固之然冇，不過好彩因為佢哋夠通風，都舒服嘅。但係唔講唔知，原來三亞機場唔比影相，雖然我唔知點解...... 當我一舉機想影，就有個公安走埋嚟阻止，所以以下幾幅圖都係搏返嚟架......



拎好行李後準備向酒店出發。
三亞交通唔算方便，整個城市普遍得的士及巴士兩種交通工具（包車另計）。我哋冇租車，所以選擇坐的士。
專門喺機場兜生意嘅的士通常都係冇咪標，所以上車前一定要同司機傾好價錢。網友教路等司機開價後 cut 一半就成交，我哋就遇到一個...
司機：「係咪去酒店？」
我：「三亞灣假日渡假酒店，幾錢？」
司機：「60 元」
歐陽生立即還價：「30 啦」
司機：「30？唔好意思，我唔得閒，你搵過第二個。」
我心諗：hahahahaha，唔洗咁呀？

遇到第二個司機，佢同樣都係開 $60，我哋叫佢平 d，佢話 $50，要體諒下佢哋喺度曬咗咁耐.... 我見 cut 人 $30 唔 work，而且我都熱到標晒汗，$50 就成交啦。

三亞灣 d 酒店全部痴埋一齊，由機場去酒店區大約 25 分鐘左右，車費 around $50。當然市中心都有酒店，方便就方便，但唔係 resort 形式，係三星級賓館居多，我就唔係太放心住賓館，所以必須要作出取捨。由酒店區落返市中心都要 15-20 分鐘車程架，係咪真係好唔方便呢？

今次歐陽生揀咗住 Holiday Inn 集團酒店，我估佢都係盲中中唔識揀，所以揀一間有信譽 d 嘅。



酒店大堂當然又係冇冷氣啦..... 或者真係喺香港歎慣，人哋送咗兩杯 Welcome Drinks 比我哋都懶得飲住，趕快上房先。

原來 Holiday Inn d 房大部份都係 Twin Bed，歐陽生話佢買 package 時，agent 好心幫佢 request 埋要 King Size Bed + Non-smoking room，所以我哋就分配到一間 Double Bed 房啦！酒店仲包埋每日早餐，計落都叫化算。否則朝朝搭車去市中心食早餐.... 我真係寧願食杯麵。



我本人嚟講就覺得房間屬於大，洗手間都叫乾淨，所有必需品如牙膏毛巾一應俱全，仲有一張梳化仔。景觀方面我哋 book 咗 mountian view，面向泳池，仲望到少少 seaview。其實叫做好彩，因為另一邊嘅房都叫 mountian view，但係就望住對面酒店嘅酒店房露台。

Mountian View（真係實景嚟架，唔係上網 copy 返嚟）



歐陽生就用手機影咗張全景相



settle down 後就搽好防曬，準備出去市中心行下街認下路，順便醫一醫肚。

呢度係由房間 Building 行去酒店門口嘅路，沿途種咗好多花草樹木，D 佈置都真係幾靚！



出到去酒店門口，其實已經有大量嘅的士，私家車，三輪車兜生意。佢哋通常都會問遊客去邊，然後開價。坐巴士都得，不過班次唔算密，大約 10-15 分鐘先有一班。喺咁夏日炎炎仲要無遮無掩嘅陽光底下，真係幾辛苦。歐陽生話臨出市中心之前落去個沙灘行下先。個沙灘好靜好舒服。雖然真係好曬，但因為有微微海風，都有少少訓著嘅衝動，^^



再嚟全景相兩幅，藍天白雲，都真係幾靚架！

唔講唔知原來有好多人特登飛嚟三亞影婚紗相，眼見已經有 3 對 couples 啦，旅遊書仲用咗少量篇幅介紹準新人嘅準備情況。

我哋選擇咗坐巴士由海灘（即係酒店）出發去市中心。巴士車資為 $3 一個人。

所謂嘅市中心，其實就係呢條「解放路步行街」。



步行街同香港嘅花園街女人街好相似。
三亞市嘅海產特別出名，所以街中左右兩排有好多街檔全部都係賣貝殼，珍珠等等。街外兩邊先係有冷氣嘅商舖，包括 Nike，以純，等等呢類舖頭。



我哋兩個對呢 D 擺設都冇特別興趣，條街真係叫行過就算。
行完步行街已經出到成身汗，打算做另一個指定動作 --- 行超市。
旅遊書介紹「旺毫超級市場」係比較具規模，而且價錢亦平 D，步行街附近就有一間。

原來宜家國內嘅超級市場為咗保安關係，所有入去嘅人都要將個人物品存入門口嘅 locker。我哋當時乜都唔知就行咗入去，當然好瘀咁比人叫住啦.....



記得鎖 locker 之前要拎返銀包，電話及環保袋呀（國內已經開始實施膠袋徵費）。

超市地方好大好大，仲分為兩層。好耐都冇見過超市有得咁樣買米啦....



天氣炎熱，已經打算今晚食完飯後入嚟買幾支水返酒店。行到去雪櫃時，哇，d 飲品賣得好平呀！
Minutes Maid 只係賣 $3.2，連可口可樂都只係賣 $2.3 咋。喺香港嘅話，前者閒閒地都要 $6 一支，可樂都要 $5-6 罐啦。不過除咗飲品之外，其他嘢又唔係平過香港好多。



喺超市內消磨咗將近一個鐘，睇中好幾樣飲品，不過我哋決定都係今晚食完飯先一次過入貨。既然零收穫就離開，轉攻隔離嘅小街。轉攻小街都係因為肚仔餓，但又唔敢食太飽（留肚今晚食海鮮）。小街中有幾檔都有賣呢隻 XXX 腸（只記得佢係魚肉），$6/條，超好食呀！街中大部份都係麵檔，5 點幾呢個鐘數食碗麵真係隨時唔洗食飯。見到有類似豪大大雞扒嘅檔仔，明知熱氣，都買咗呢個黑椒鹽酥雞柳（$10/份），可以頂到少少肚餓之餘又唔飽肚嘛！



食完後歐陽生話差不多要去搵下今晚晚飯地點 --- 《春園海鮮廣場》。
佢話記得某年某月某日返大陸，d 國內人好早就食晚飯，又早收工，為免白行一趟都係早 D 去好喎。
沿途見到呢個情景..... 如果唔係住喺鄉郊地區，我估香港都好少見到 lu。



邊行邊 hea 咁好快就搵到晚飯地點，不過又唔想咁早食飯，所以去咗附近一個公園坐下。見到好多國內人原來好鐘意做運動，有好多人打乒乓波，有人玩健身設施等等。

喺公園磨到將近 7 點就行過隔離個海鮮廣場開餐啦。經營模式同流浮山／鯉魚門相似。廣場面積非常非常之大（簡直成個 BBQ 場咁大），入面有一個街市，主要係賣海鮮，仲有 1-2 間菜檔。先搵到你想幫襯嘅排檔，之後就有職員帶你去行街市搵海鮮。我哋盲中中去到都唔知點揀，所以就聽取旅遊書意見揀咗 6 排 8 號。



街市有好多奇形怪狀嘅海鮮，我除咗要食蝦之外完全零 idea，所以交由歐陽生發板。



由於街市同排檔本身冇直接關係，所以 d 海鮮都係即買即比錢，再由排檔加工。而且佢哋好均真，街市入口有好大個燈牌，詳列當日海鮮賣咩價錢（連菜價都列埋出嚟），當你比錢時發現有人收貴咗你，你可以去街市隔離個 office，專係比人投訴 <-- 簡直意想不到。

揀完海鮮就返埋位等職員同你溝通溝通點炮製 d 海鮮。等候期間先留意到 d 碗原來一 pack pack 包好晒，pack 好咗嘅餐具代表已經消毒，每人 $2／份。

排檔本身只係將食物加工，你要飲嘢又有另一班人走埋嚟向你 sell（分工真係分得好仔細）。
本來想飲可樂，不過原來要自己出去士多買。咁啱有個大嬸埋嚟 sell d 果汁，有芒果汁／橙汁／菠蘿汁／檸檬汁等等。見天氣咁熱就 order 咗一 jar 檸檬汁醒一醒胃，註明要冰凍嘅，承惠 $20/jar。可惜嚟到時根本唔冰凍得去邊，而且仲唔係好好飲添。



話咁快，我哋 order 嘅海鮮陸陸續續上枱啦。等我逐樣介紹下：



1) 四淨豆（$15）--- 蒜茸炒
（唔知係咩嚟嘅，不過歐陽生話見到佢奇奇怪怪想試。D 菜好粗纖維，食落又幾好食）。
2) 紅口螺（$30）--- 白灼
（呢個紅口螺佢識我我唔識佢。食落尾段有 d 甘甘地）。
3) 炒飯 （$20）--- 碟炒飯又係另一位阿嬸走埋嚟 sell，我見佢比我睇個樣辦唔係好大碟，況且淨係食海鮮又怕我個男人唔夠飽。點知碟飯上到枱真係成座山咁高。最終食唔晒.... 但最恐佈嘅係我哋食淨嘅份量係等於香港上枱嘅份量！
（呢個炒飯我只係食咗一碗，正正常常，OK）。
4) 小象拔蚌（$35/4隻）--- 蒜茸豆豉 + 粉絲蒸
（比想像中好食，係唯獨有一隻有隻小強喺上面扮豆豉，好彩發現到。不過一隻半隻我都冇同佢嘈 lu）。
5) 海膽（$5/1隻）--- 蒸蛋
（喺旅遊書見到當地人原來好鐘意咁樣食，入鄉隨俗嘛，當然要試下。不過...... 因為用咗大量油同埋豉油，反而蓋咗海膽嘅鮮味，有少少浪費。有機會再食的話，我會叫佢減少用油及豉油嘅份量）。
6) 中蝦（$11x/2隻，以重量計，大約 $12x/斤）--- 蒜茸開邊蒸
（呢個係賣飛佛，心水清的話都會發覺我之前去沙巴、布吉以及今次海南島都有食蝦，讚）！
7) 五指山野菜（$15）--- 蒜茸炒
（um..... 都唔知乜菜，不過歐陽生話試下就由得佢。同樣都係粗纖維蔬菜，味道係 OK 嘅）。
8) 雞腿螺（$30）--- 白灼
（旅遊書話呢個係必試海鮮之一，所以我哋都特登 order 少少。合口時外貎其實同獅奄好相似。雞腿螺好好味，我同歐陽生都激讚）。
9) 扇貝（$35/4隻）--- 蒜茸 + 粉絲蒸
（好味喎，都幾新鮮，又唔貴）。

Cheers~~~~~ Happy Birthday To Me!!!!!
2 個人食咗 9 個餸，係咪嚇死人？最後當然係食唔晒，我以後都唔敢叫歐陽生發板。



晚飯中，有好多呢類表演嘅男男女女孭住結他同埋 speaker 通場飛。原來國內人好興咁樣搵人即場唱歌助慶。當然佢都有走埋嚟撩我哋啦，不過睇睇張 song list.... 大佬，我哋冇一首識架喎，況且我哋都冇咁嘅興趣。不過隔離枱有一對男女就叫咗一對女仔唱歌，我睇唔到佢哋比幾錢呀。但係論歌喉...... 真係有 d 惡頂！



相反有幾位男士就唱得幾好，又識搞氣氛，亦因為咁長期比某一枱霸住....

2 個人 KO 9 碟餸當然食到捧住個肚走啦。埋單計埋加工費大約用咗 $4xx。我相信如果我哋唔係叫咁多嘢食，應該可以再平 d。

食完飯就去做下運動散步。去咗步行街附近嗰間「旺毫超級市場」入貨先。夜晚嘅步行街又幾靚喎....

喺超級市場除咗買咗大量水之外，我仲貪得意買咗幾個山竹.... 我呢.... 其實好鐘意食山竹嘅，不過喺香港買真係唔平，個殼又重秤，唔抵嘛！不過今次買都算幾平，$30/7 個。歐陽生仲買咗佢至愛嘅山楂條同埋能得利果汁橡皮糖，用嚟醫口痕呀，哈哈！

入完貨都已經夜晚 10 點幾，決定返酒店啦。之前都講過，住酒店區真係好唔方便，今早搭嗰架來回酒店及步行街嘅巴士尾班車係 21:00，所以焗住要搭的士（之後晚晚都係）。不過喺市中心截嘅的士大部份都係有咪標，咁就唔洗講價。車資大約 $3x，而車程就 15 分鐘左右。

返到酒店發現電影台播緊《無間道 3》，我呢 d 夜鬼梗係睇埋先訓！