♥♥ 結婚兩週年布吉之旅 ♥♥ - Patong Beach @ Day 1

2011 年 11 月 26 日 (星期六)

等，等，等，眼見各位 1121 之友喺 facebook 同大家 say goodbye 去玩，我幾想 d 時間快 d 過，咁就可以輪到我！

今次仍然選擇坐港龍航空嘅機，因為比較過佢同泰航，佢 d 時間始終靚 d！上午 8:55 飛機，一早 6 點幾就要由屋企出發啦！



每一次坐飛機，我都有個習慣，就係同 d 雲影相。我覺得一舊舊，好鬼得意。

有飛機餐，所以我哋都冇特登去食早餐。一早聽聞早餐唔會太好食，不過成朝早冇嘢到肚，唔好食都要食。
右上：老公嘅點心配炒麵（賣相好唔得囉）
左下：我嘅腸仔奄列配薯塊



經過 3.5 小時，飛機順利降落布吉機場。之前喺網上 forum 見有人話泰國人做嘢好慢，如冇必要都唔好排隊排喺太多中國人後面，因為佢哋對於入境嘅強國人民睇護照時特別睇得耐 d。所以我一入海關就搵咗一班洋鬼子排喺佢哋後面。幸好我哋班機早 landing，因為之後有兩班機一齊 land，成個入境 area 塞滿人，人，人。入境手續只係搞咗 10 分鐘左右，比我預期中快啦。

入境後有 sim card 派，所以我都叫老公去攞一張，點知原來 local tour pick up 時又送一張。

過完關入到大堂，因為 book 咗 pick up service，好快就搵到自己個名，承惠 550B 一程。



Welcome to Phuket！



大約 40 分鐘車程左右就到達 The Blue Marine Resort & Spa。Check in 後安排我哋搭 hotel free shuttle bus 上房，足以證明間酒店有幾大... 不過我哋住嗰間房離大堂唔算遠，每一日我都寧願自己行上行落，除非佢架 shuttle bus 喺 lobby standby，否則我自己行上去都到咗。



推開房門，感覺良好。幾光猛，又夠乾淨，張床仲好大，訓 3 個人都仲得。



今次非常落本，買 package 時特登加咗錢 upgrade 去 pool access 房，大大增加咗游水嘅機會，正！
(左)：由泳池影入房
(右)：由房影出泳池



book package 時 special requst 咗係 honeymooner，酒店冇特別嘢送，只係有 d 靚靚佈置。實在太佩服佢哋可以簡簡單單用一條毛巾就摺到咁靚。兩隻天鵝擺足 5 日都冇拆過。



支水對我好緊要。話說我出發前連續發咗 3 日燒，睇咗醫生食埋抗生素都唔掂。不過諗住去玩就頂硬上，入境時其實仲燒緊，幾驚比人拘留呀~
好在我一向習慣出門會自備藥包，估唔到食咗一粒 panadol 已經退咗燒，個醫生下次都係唔睇佢，冇料到.... 一入到房咩都唔理，即刻食咗我第一粒 panadol。



喺房玩咗一輪，我哋兩個嘅五臟廟都嗌肚餓啦。本來 plan 咗今日去 Patong Beach 食 Briley 雞飯，之前做咗功課話佢收 14:00，諗住行快兩步應該都趕得切。可惜行到出 Patong Beach 時已經 15:00 啦，唯有等最後一日有時間先再食過啦。下午 3 點幾，唔適宜食太飽，所以喺 Jungceylon 商場求其搵咗間餐廳食三文治就算。



最後揀咗呢間叫做 "au bon pain" 餐廳，兩個麵包套餐食咗我 370B，好貴。



出發前喺香港 book 咗個 local tour，佢叫我哋到達布吉後去佢舖頭比錢，所以醫完肚就去附近嘅 "布吉偉林" 找埋條尾數。雖然有地圖喺手，但係話晒只係旅程嘅第一日，都要搵咗好耐先搵到。



任務完成後，其實已經心思思好想試 Swensen's 雪糕啦，不過只係啱啱離開餐廳無耐，所以就決定喺附近嘅 Banzzan Market 觀察下 d 海鮮，又去酒巴街影下相。

鼎鼎大名大嘅 Tiger Bar 裝修中...



以我估計，呢度應該就係泰拳比賽嘅場地。



今日嘅天氣好好呀~ 出發前天文台仲話連續幾日都有 T Storm，好彩好彩。



行咗幾個地方，就鑽返入 Jungceylon 商場涼冷氣 + shopping，不過因為賣嘅嘢價錢普遍同香港差不多，結果零收穫。



商場都開始有好多聖誕節佈置啦，不過平心而論，喺一個咁熱嘅地方過聖誕真係唔係幾啱 feel。

老公幫佢改咗個名叫 Angryphant (angrybird + elephant)。

行咗一陣，心思思想去食 Swensen's 雪糕...



連裝水嘅水杯都咁靚... 真係好想拎咗隻杯返屋企。
(左)：老公嘅士多啤梨雪糕
(右)：呢個咁邪惡嘅朱古力雪糕一睇就知係我架啦





滿足完個甜品胃，就去咗附近嘅 Patong Beach 散下步。梗係啦，唔係一陣個胃邊有位放其他美食。

開始日落西山，好多人都執嘢走啦，沙灘嘅工作人員都忙住拖返 d 香蕉船上岸。





行下行下，咦，有人 sell 放孔明燈喎。從來未玩過嘅我梗係好想玩啦，不過我未開聲老公就喺側邊話：「嘩，咁樣好容易有山火架喎。」勢色唔對，我梗係唔敢出聲啦，不過佢見到我眼望望，就估到我想玩。佢話睇到盞孔明燈嘅質地應該唔會咁易燒著，又話要睇到佢熄咗先好走，所以先比我玩... 好嘢！

嚴格嚟講，根本都唔算係我本人放..... Oh..... 咁就燒咗 100B 啦，真係洗錢容易搵錢難。

行完個 Patong Beach..... 弊啦，點解個肚仲未嗌餓，一定係頭先食得太飽，唯有喺 Patong 附近再散下步。途經見到呢 d 大排檔式嘅海鮮檔，價錢好吸引呀，不過喺咁飽嘅情況底下食海鮮，我覺得好有罪疚感。唔緊要啦，等之後嗰幾晚先嚟試。



再行下，搵到幾間著名推介嘅餐廳嘅位置，massage & spa 又搵埋，都係仲未肚餓，不過咁樣 hea 都唔係辦法。結果揀咗間 P.S Hotel 食晚飯，揀佢因為佢只係嗌小菜，而且又平。



先嚟兩杯解渴飲品，我嘅 orange shake & 老公嘅 lime shake



Order 咗冬蔭功湯，炒雜菜，橙汁鴨胸，仲有嚟到 Patong 必食嘅蝦，個蝦好惹味，讚！



老公本來仲想要個菠蘿炒飯，好在我話睇定 d 先，否則一定食唔晒。

飯後又入返去 Jungceylon 商場做埋個指定動作 --- 行超市 Big C Extra。買咗幾支水，少少零食，同埋佢最愛嘅小老板紫菜。

而佢嘅指定動作就係睇人哋 d cheese.... @_@

 

講起水，初頭都擔心會唔會因為曼谷水浸影響供應不足。不過布吉真係完全冇呢個情況。係，Big C Extra 的而且確限制每個家庭只可以買 6 packs 水，不過講緊 1 pack 有 9 支，而且只限某一個牌子，所以對我哋遊客真係完全冇影響。

 

行完 Big C Extra，就途經酒巴街行返上酒店。每日我哋都要經過酒巴街先可以來回酒店及 Patong Beach，夜晚嘅酒巴街同上午嘅好唔同，今日仲要係星期六，Wow，人山人海。

 

 

好多酒巴都有一 d 妙齡少女喺門口跳 pole dance，不過講真佢哋嘅舞姿我真係不敢恭維，我成日覺得佢哋似搭地鐵多 d。我敢講，如果我肯上台跳，一定好過佢多多聲 (唔好鬧我啦).... hehe



離開酒巴街就會遇到呢隻海嘯狗。"海嘯狗" 呢個名係我比佢嘅，好似話係一個日藉設計師為咗紀念場海嘯而設計咗呢隻狗。好慘呀佢，冇咗個咀...

 

 

我估每個去過 Patong Beach 嘅朋友都有影過呢張相啩...

經過半小時腳程後，終於由 Patong Beach 行返去酒店，日日咁行法都幾甘，我都係因為咁樣晒黑咗啦，嗚嗚...

夜晚嘅酒店 lobby，又幾有 feel 噃，好黑，仲望到好多星星添呀，香港一定睇唔到。



上到房，身水身汗，梗係喳喳臨沖返個涼，攤上床食我嘅戰利品。我出發前講過，我去到布吉一定要成日食 --- 「金柚」是也！我差唔多晚晚食一兜吖！