♥♥ 結婚兩週年布吉之旅 ♥♥ - 10小時包車遊 @ Day 2

2011 年 11 月 27 日 (星期日)

嚟到旅程第二日。
今日嘅行程係包車 (連司機) 10 小時，約咗負責人中午 12 點先嚟 pick up，所以今朝早可以訓晏 D，再慢慢嘆埋個酒店早餐都唔遲。

出發去食早餐 lu。尋日食咗一粒 Panadol + 訓咗成晚，d 燒終於退晒，今日精神唔錯！好嘢~



上網睇遊記，發現大部份網友如果住 pool access room 的話，房間編號好多時都係 3207 / 3208，我哋今次住 3207。



(上)：我身後就係我哋連住 5 日嘅房啦
(下)：我房門口呀.... 由呢度行上 92 級樓梯就係酒店餐廳 + 另一個泳池啦。我好清楚記得係 92 級樓梯！朝朝早咁行法真係少 d 腳骨力都唔得，往往上到餐廳坐定定之後第一件事係透順條氣先



餐廳分咗 indoor & outdoor 兩部份，不過今日個太陽好兇猛呀，所以冇人坐 outdoor，我哋都唔例外，揀咗 indoor。
其實 indoor 都冇冷氣架，不過有瓦遮頭，冇咁辛苦。



食物款式尚算 ok，我哋第一日去食當然覺得好新鮮啦，不過食到最尾嗰兩日，我已經開始厭厭地啦。



日日望住個咁靚嘅海食早餐，你都咪話唔爽！



食完早餐仲有時間，新屎坑第一日嚟到，當然又周圍影下相啦。個天好藍呀，又冇再病，好開心！



今日個太陽好猛好猛，眼都打唔開。



呢個泳池比起我哋 pool access 嗰個靚 dd，不過自然人都多 d，好多時我哋要游水都會去返自己個池游。



喺泳池影咗好多相，仲避住太陽咁晒咗一陣太陽 (好矛盾呢)。







喺泳池搞搞震後就離開，見仲有 1 個鐘先到 pick up 時間，游水又到喉唔到肺，所以就喺房入面 hea 咗一陣。準時 12 點，司機就嚟 pick up 我哋啦。
佢介紹自己叫阿 Nick，又問我哋第一站想去邊。我見頭先餐早餐食得唔太滿足，又剛到午飯時間，所以我話去網友強烈推介嘅 Phuket Town 食雞飯，我仲比埋咭片佢睇。但阿 Nick 話尋日去過，佢哋 close 咗喎。如果想食雞飯，佢有另一間介紹。本住一試無大害嘅心態，我哋 take 咗佢嘅 advice。

大約 30 分鐘左右就到咗餐廳啦。坐低後想搵個英文餐牌睇下都冇，好彩有阿 Nick 幫手做翻譯 (佢其實都係有限度英文)，否則真係無從入手。



我毫不考慮就要咗個雞飯，而老公就要咗豬手飯。
至於飲品，阿 Nick 話有水，iced lemon tea，coke。但係我見到人哋唔只飲呢 d，問佢係咩，佢講咗句唔知乜，我哋兩個都聽唔明，佢見咁樣就索性話 all finished (賣晒? 咁都得)。我醒起可以試試香茅茶，就問 Nick 有冇類似 lemongrass 嘅東東，佢好爽快話有，點知最後嚟咗杯菊花茶.... @_@，等我之前仲鬼死咁開心以為試到。

(上)：豬手飯
(下)：雞飯



不過論味道，真係好好味。雖然我暫時未有機會試到網友強烈推介嘅 Phuket Town 雞飯，比較唔到。但起碼佢遠勝過 Patong Beach 嘅 Briley (旅程最後一日終於有機會試)，無錯，係遠勝！最衰冇問阿 Nick 舖頭名及位置，否則我會推介比各位。

醫完肚搵返阿 Nick，發覺佢冇喺車涼冷氣噃，佢好乖咁企喺條街等我哋食完飯，突然好有闊太 feel，不過見佢大汗疊細汗，烈日當空又無遮無掩，都真係戥佢熱。
上車後，我哋就話要去 Phuket Old Town，因為嗰度出名有好多舊式建築物。

10 分鐘左右就到，阿 Nick 喺街頭放低我哋，佢就喺街尾等。喺呢度，我哋影相影得好開心，d 建築物真係幾特別架。

行行下見到有架好靚嘅車，又走去搞人哋架車，哈哈！





去旅行就係咁，我哋兩個好鐘意周圍亂行。話說我哋行到一條分岔路就行咗入去，點知原來係街嘅盡頭，阿 Nick 竟然又察覺到我哋喎，仲一度以為我哋蕩失路，特登揸住架車嗌住我哋，我哋解釋係只係周圍行，未行完架，咁佢又返返去原位等我哋啦。阿 Nick 真係一個好盡責嘅司機，抵讚。

沿途見到好多車呀，有一架有好多柚子，另一架就有好多菠蘿。
(右下角)：見到嘛？咸蛋超人都嚟咗布吉呀。



仲見到有本地人喺 Phuket Old Town 取景影婚紗相，不過原來佢哋唔興著婚紗。



行完 Phuket Old Town 去 join 返阿 Nick，見佢係咁抹汗... 我先發覺原來我哋行幾耐佢就企足幾耐。呢個時候我都問老公一陣洗唔洗比返 d tips 佢，不過佢話睇定 d 先。
上返車，天氣咁熱梗係去涼下冷氣啦。所以我哋話去 Central Festival + Big C shopping，兩個商場相距 3 分鐘腳程左右。

入到 Central Festival，發覺佢 d 舖頭都係 chain store 多，價錢又唔係特別平，所以又係零收穫。不過.... 比我發現咗 Mister Donut！自從上次去完台灣食過一次後就愛上，點解唔喺香港開舖呢？今次我唔會放過佢啦，買咗兩個一陣做 tea，每個承惠 35B。



既然 chain store 唔啱行，就轉戰 supermarket (又係 supermarket)！



不過我哋一早 target 咗所有手信、零食會喺 Big C 買，平吖嘛。加上今日有車，唔洗拎餐死。所以喺 Central Food Hall 都冇留太耐就情願轉去隔離嘅 Big C。
經過一輪狂風掃落葉後，已經係 4:30 啦。一早同阿 Nick 講咗今日會去埋日落崖睇日落，所以要出發啦。佢話最理想時間係 5:30 左右到，而我哋由 Big C 過去大約需要 45-50 mins。

日落崖，顧名思義係睇日落嘅好地方。我哋準時 5:30 左右就到咗，越接近日落時間就越多人。
(右上)：我嚟架，係咪好有 d 小說封面 feel？
(左下)：我哋兩個一致認為沙巴嗰張靚 d。

 

有冇覺得好熟口面？



哈哈哈，好無聊呀我哋.... 扮 Kappa 影相！其實仲影咗國產 007 周星馳同袁詠儀睇日落嗰個 pose，不過因為太黑，效果唔特出。

好可惜呀！從相片可見其實今日有好大舊雲喺水平線上，冇得睇住太陽伯伯從水平線上放工 lu.... 冇辦法啦。
不過一場嚟到，我哋都等到個太陽完完全全落晒先離開，當時大約係 7:00 左右。
去 join 返阿 Nick，發現佢又企喺度等我哋喎，做呢份工真係辛苦，淨係呢個景點都由 5:30 等到我哋 7:00。

入夜啦，趁住今日係星期日，所以安排咗今日會去 Weekend Market shopping + 掃街。離開日落崖時見到不斷閃電，我都估到一陣可能會落雨。
到達 weekend market 時，我哋打算先掃街醫好肚仔，之後先慢慢 shopping。
頭 5 分鐘都好正常，不過食完第一串魷魚時，就落好大大大大大雨啦。

由於 Weekend market 所有攤檔都係用帳篷搭出嚟，又漏水又有大水氹，我哋又冇帶遮，又著住波鞋喎，入晒水，心情真係大受影響。又要保住部單反相機唔好入水，所以我只係求其食，醫飽個肚就算數。ping 都冇乜點 shop 就想閃人。到老公醫好肚後，得返 15 mins 左右就要會合阿 Nick，只可以行一 d 冇浸得太利害嘅地方。



到咗集合時間 9:30，我哋行到集合地點打算 join 返阿 Nick，我都未搵到佢佢就搵到我哋（對我而言，大部份泰國人個樣係一樣）。阿 Nick 拎住把大遮，跑過嚟搵我然後塞把遮比我，再濕住身跑去對面馬路揸架車埋嚟。呢個時候老公就話：睇嚟今次 d happy money 唔比都唔得啦。

租車結束時間應該係 10:00，由於天雨關係有少少塞車，到達酒店時遲咗 10 mins 左右，阿 Nick 都冇黑面，我哋識做嘅，比咗 100B tips 佢，講真，今日真係辛苦晒佢。

返到入房，當然又係食金柚時間啦，而老公就開咗呢支泰國益力多飲，我就唔敢試啦，佢都話麻麻地喎。