抹不去的童年回憶

2011 年 12 月 18 日 ~ 2012 年 1 月 3 日

我的偶像郭富城開 show 了！
還記得上一次的「舞林正傳演唱會」是 2008 年了，闊別 3 年，他又再重返我眼前。

2008 年那年，是我學跳舞的第一年。
對跳舞產生興趣，其中一個原因亦是因為他。

正式學跳舞後，因為自己對舞蹈多了一份了解、一份基本認知，
慢慢認為他的舞技其實沒有想像中的利害，更覺得有點水皮！
而且，對他的鐘愛度亦慢慢減退。
有關他的新聞 --- 沒看；
他所拍的戲 --- 沒有每一套都進戲院看，有些甚至提不起興趣，不了了之；
他推出的 DVD --- 遇到便買，遇不到便作罷；
更開始避忌向別人說出自己的偶像是他，
因為他的歌喉一向不被人公認，
現在連自己都不肯定他的舞技了。
唯一仍有堅持的，只是他推出的 CD，但 2008 年至今好像只有一隻而已。
就算買了回家，我估計應該只聽了一至兩次，已沒有「再聽」的衝動。

有一天，驚覺自己竟然有這些轉變，心想：我應是進入了沒有偶像的階段，好事啊！

早於今年年初已收到他會開跨年演唱會的消息。
到演唱會細節落實後，知道一共開 17 場。
上一次演唱會他只開了 7 場，作為 fans 的我很神心，跟他走了 6 場。
雖然好像很浪費金錢，但那一刻真的無怨無悔。

這次 17 場，我只買了 3 場的門票，該算是收歛了很多吧！
滿以為對他的熱情減退，走 3 場都是因為特別日子，如平安夜，大除夕等等
連尾場都打算放棄沒買票，夠狠吧？

但看罷一場後，發覺自己原來仍然十分享受與投入他的歌舞中，
看他的演唱會就好像帶我回到中小學時代，
那時每天都在聽他的 CD，睡床還貼滿他的海報，
更幼稚的就是會為捍衛他的名聲而跟別的 fans 鬥咀.....
當他在演唱會中多謝他的 fans 時，
我永遠都覺得他在多謝我，=P

最後，還是心甘情願地為他多買幾場門票，
由最初的 3 場演變成現在的 6 場 (截至現時為止)。
目的只有一個 --- 多看他幾眼。
金錢，仍然是浪費得很，
但起碼那「無怨無悔」的感覺再次肯定了我的決定。

原來，有些童年回憶永遠都是抹不去，
這份童年回憶的確讓我想起很多，回味很多！

有看過報道的都知道他這次很危險，
現在，
只衷心希望他能平安渡過餘下的 6 場表演，
久不久再開演唱會為我這類 fans 解愁，
更讓各位城迷再聚集一起，已很足夠！

加油啊，我會為你打氣！

*******************************************************************
特別藉此感謝伴侶與家人。
他們全知道我這次走 6 場，
但從沒說過一句。
反之鼓勵我去支持他，
常叫我問自己，
支持他時自己是否開心？
這次完結後還要等多少年？

感謝，感謝你們的體諒！

♥♥ 結婚兩週年布吉之旅 ♥♥ - 皇帝島+珊瑚島浮潛 @ Day 3

2011 年 11 月 28 日 (星期一)

嚟到布吉旅行，點可以無玩水嘅活動呢？今日開始一連兩日都係水上活動，yeah！

早上準時 8:00 集合，喺餐廳食咗個開始厭厭地嘅早餐之後就出發啦。中間發生咗一段小插曲....

話說今次行程有得餵魚，當然參照上次去沙巴嘅經驗，喺酒店偷 D 麵包拎出海啦。酒店都知有呢類住客架啦，所以喺當眼處都貼咗告示提醒大家唔准拎食物出去。我哋就差 D 失手，當老公拎咗 10 塊 8 塊返埋位時，可能太揚啦，有個侍應問我哋係咪打算拎 D 麵包外出，我哋當然 say no 啦，立刻扮食一塊，當佢一擰轉面時，即刻塞晒 d 麵包入膠袋走人，逃脫成功！險！

唔理咁多啦，上咗車後，去多兩間酒店接人就正式出發。

原來我哋個承辦商叫 Raya Princess，所有參加咗出島嘅團友，都需要喺呢個碼頭集合。碼頭有 free coffee or water，亦有 free 暈浪丸。



當然啦，亦有麵包賣，每 pack 20B，我又醒目地為荷包慳咗 20B 啦！

等了又等，終於齊晒人，開始講解。

無論你出咩島，都要喺呢個碼頭集合。講解完後，各個團嘅導遊開始認領返自己嘅團友。我哋嗰個竟然係女導遊喎。
認領完畢後，要行去碼頭上船，腳程大約 5 分鐘左右。

上船啦，睇下個碼頭幾多人！今次算好彩，同團冇強國人民，竟然連一個中國人都冇呀，好嘢！



行程第一站 --- Coral Island 皇帝島



船程大約只需 15 分鐘，好快就到。

上岸後望下個海.... 已經嘩嘩聲，不過朋友話第二站嘅 Raya Island 仲令人驚嘆呀！





Coral Island 主要都係玩水上活動，不過因為上次沙巴已經玩咗一次水上降落傘，今次唔玩 lu。如果香港嘅海灘都有咁靚就好啦。



滿心歡喜衝咗落海游水，不過越游就越唔對路，因為成個海都有好多浮游生物，就係呢 d 啦！仲有一條死咗嘅雞泡魚添 (阿門)！

唔知係乜傢伙，不過見到佢哋仲識郁，應該係未死嘅。由於真係好騷擾，所以我只係浸咗一陣水就上咗岸。搵咗舊木頭坐低欣賞下個海灘，望下人哋玩降落傘，已經覺得過得好快。

Hea 期間，發現咗有 d 奇形怪狀嘅貝殼同埋一個椰子，攞嚟影張相先



第一站只係逗留 1 小時左右，所以好快就要離開。唔緊要，我比較期望第二站 Raya Island。

要走啦，上船啦，雖然好似唔係幾啱游水，不過 Coral Island 喺我心目中仍然係一個好靚嘅地方，bye bye Coral Island！

上到船，導遊立即為大家送上任食菠蘿及西瓜，仲有任飲嘅可樂+冰水，正！



到達 Raya Island，要上岸都唔係一件易事。

呢條浮橋看似穩陣，其實一 D 都唔係。佢只係用好多個唔同嘅木桶紮起，不過一有浪打埋嚟，就個個都招架唔住，而我...... 就係第一個中招，仆咗喺度，仲擦損咗雙手...

個浪越大，危險性就越高，而且個浪喺你背面打埋嚟，大家根本冇心理準備，睇睇以下嘅連環圖我諗就會明









最後連豐富經驗嘅導遊姐姐都中埋招.... 兩位外藉男士就比較醒目，寧願落水行上岸 (見圖 3)...

唔仆都仆咗啦，唔理咁多，去醫肚先~ 行咗差不多 10 分鐘先到餐廳，我應該喺呢個時候曬黑咗好多...... （T_T)

食物不過不失啦，都預咗唔係大師級水準，求其唔好餓親我，等我有氣有力去玩水就得啦。

食完 lunch，急不及待去享受呢個沙灘。嘩，d 水好清，d 沙好幼呀，超爽！



好難相信世界上有咁靚嘅沙灘... 我係咪發緊夢呀？



我同老公玩咗好耐水，有 d 攰啦，所以搵咗張沙灘椅嚟坐。咦？點解冇人問我哋收錢嘅 (因為 d 沙灘椅要租，唔係任坐架)



咁唔理啦，照坐....

見到呢張相，就令我諗起布吉發惡嘅情景，布吉真係令人又愛又恨！



距離集合時間尚有 10 分鐘時，無端端有個 staff 走埋嚟向我收 200B，哎吔，我仲以為咁好彩可以掩人耳目添......

10 分鐘過後，我哋又坐船去第三站，XXX Bay 浮潛 (唔記得乜乜乜 Bay)，bye bye Raya Island



嘩，呢個 Bay 真係唔好講笑，肉眼已經望到水底嘅珊瑚，肯定開心死歐陽生啦！



個相機比較差，唔知點解一落到水佢就唔聽話唔識 foucs!!!  (怒!!!)



浮潛 1 小時過去，真係要 say bye bye 啦，大家返酒店啦。

以為一日嘅美好行程完滿結束，點知好戲在後頭...

返到酒店因為見個身仲濕濕地，當然唔好浪費跳咗落自己個 pool 游下水啦，點知原來我哋間房可以對到個咸蛋黃正一正，好嘢，反正尋日喺日落崖睇唔到個日落，今日可以游住水嚟 enjoy，雙重享受！

游咗一陣，天都黑齊啦，梳洗後又出發醫肚！go go go~~~

行落 Phuket Town 成日聽到有架車嘈嘈閉，原來就係佢...... 宣傳泰拳！



今日消粍咗咁多體力，一於食返餐海鮮餐！所以去咗第一日發現嘅平價大排檔開餐。

我最鐘意食虎蝦，見佢 150B 100g 好似都幾合理，所以今晚就揀佢啦！



二話不說揀咗全個箱最大隻嘅虎蝦，重 400g，承惠 600B。至於 how to cook，我就揀咗 garlic

仲有其他美食，稍嫌份量細咗 d，尤其是碟菜，未食過架...... 不過要飽肚都唔係難事。

炸雞塊 (陰公，只得 3 件) + 豉椒炒蜆 + 蒜茸虎蝦 + 炒雜菜 + 菠蘿炒飯 + 冬蔭公湯 + Lemon Shake + 椰青

埋單約 1,000B 以下，最貴都係隻虎蝦，如果唔食海鮮，真係平到笑！

 

食飽飽後，當然要散下步幫助消化，所以又去咗 Big C Extra 入貨，滿載而歸！

行過見到 Dairy Queen 人頭湧湧，先醒起原來我未滿足個甜品胃吖....

買咗兩杯同歐陽生一人一杯，佢哋聲稱倒轉 d 雪糕唔流喎~ 味道一般啦，都係 Sweden's 好食 d！

 

兩個胃都滿足晒後，又行咗一輪酒巴街先返酒店。原來酒店夜晚個招牌都幾靚架喎！

 

 

期待聽日重點節目 --- 心肺潛水！

 

 

 

 

 

 

 

♥♥ 結婚兩週年布吉之旅 ♥♥ - 10小時包車遊 @ Day 2

2011 年 11 月 27 日 (星期日)

嚟到旅程第二日。
今日嘅行程係包車 (連司機) 10 小時，約咗負責人中午 12 點先嚟 pick up，所以今朝早可以訓晏 D，再慢慢嘆埋個酒店早餐都唔遲。

出發去食早餐 lu。尋日食咗一粒 Panadol + 訓咗成晚，d 燒終於退晒，今日精神唔錯！好嘢~



上網睇遊記，發現大部份網友如果住 pool access room 的話，房間編號好多時都係 3207 / 3208，我哋今次住 3207。



(上)：我身後就係我哋連住 5 日嘅房啦
(下)：我房門口呀.... 由呢度行上 92 級樓梯就係酒店餐廳 + 另一個泳池啦。我好清楚記得係 92 級樓梯！朝朝早咁行法真係少 d 腳骨力都唔得，往往上到餐廳坐定定之後第一件事係透順條氣先



餐廳分咗 indoor & outdoor 兩部份，不過今日個太陽好兇猛呀，所以冇人坐 outdoor，我哋都唔例外，揀咗 indoor。
其實 indoor 都冇冷氣架，不過有瓦遮頭，冇咁辛苦。



食物款式尚算 ok，我哋第一日去食當然覺得好新鮮啦，不過食到最尾嗰兩日，我已經開始厭厭地啦。



日日望住個咁靚嘅海食早餐，你都咪話唔爽！



食完早餐仲有時間，新屎坑第一日嚟到，當然又周圍影下相啦。個天好藍呀，又冇再病，好開心！



今日個太陽好猛好猛，眼都打唔開。



呢個泳池比起我哋 pool access 嗰個靚 dd，不過自然人都多 d，好多時我哋要游水都會去返自己個池游。



喺泳池影咗好多相，仲避住太陽咁晒咗一陣太陽 (好矛盾呢)。







喺泳池搞搞震後就離開，見仲有 1 個鐘先到 pick up 時間，游水又到喉唔到肺，所以就喺房入面 hea 咗一陣。準時 12 點，司機就嚟 pick up 我哋啦。
佢介紹自己叫阿 Nick，又問我哋第一站想去邊。我見頭先餐早餐食得唔太滿足，又剛到午飯時間，所以我話去網友強烈推介嘅 Phuket Town 食雞飯，我仲比埋咭片佢睇。但阿 Nick 話尋日去過，佢哋 close 咗喎。如果想食雞飯，佢有另一間介紹。本住一試無大害嘅心態，我哋 take 咗佢嘅 advice。

大約 30 分鐘左右就到咗餐廳啦。坐低後想搵個英文餐牌睇下都冇，好彩有阿 Nick 幫手做翻譯 (佢其實都係有限度英文)，否則真係無從入手。



我毫不考慮就要咗個雞飯，而老公就要咗豬手飯。
至於飲品，阿 Nick 話有水，iced lemon tea，coke。但係我見到人哋唔只飲呢 d，問佢係咩，佢講咗句唔知乜，我哋兩個都聽唔明，佢見咁樣就索性話 all finished (賣晒? 咁都得)。我醒起可以試試香茅茶，就問 Nick 有冇類似 lemongrass 嘅東東，佢好爽快話有，點知最後嚟咗杯菊花茶.... @_@，等我之前仲鬼死咁開心以為試到。

(上)：豬手飯
(下)：雞飯



不過論味道，真係好好味。雖然我暫時未有機會試到網友強烈推介嘅 Phuket Town 雞飯，比較唔到。但起碼佢遠勝過 Patong Beach 嘅 Briley (旅程最後一日終於有機會試)，無錯，係遠勝！最衰冇問阿 Nick 舖頭名及位置，否則我會推介比各位。

醫完肚搵返阿 Nick，發覺佢冇喺車涼冷氣噃，佢好乖咁企喺條街等我哋食完飯，突然好有闊太 feel，不過見佢大汗疊細汗，烈日當空又無遮無掩，都真係戥佢熱。
上車後，我哋就話要去 Phuket Old Town，因為嗰度出名有好多舊式建築物。

10 分鐘左右就到，阿 Nick 喺街頭放低我哋，佢就喺街尾等。喺呢度，我哋影相影得好開心，d 建築物真係幾特別架。

行行下見到有架好靚嘅車，又走去搞人哋架車，哈哈！





去旅行就係咁，我哋兩個好鐘意周圍亂行。話說我哋行到一條分岔路就行咗入去，點知原來係街嘅盡頭，阿 Nick 竟然又察覺到我哋喎，仲一度以為我哋蕩失路，特登揸住架車嗌住我哋，我哋解釋係只係周圍行，未行完架，咁佢又返返去原位等我哋啦。阿 Nick 真係一個好盡責嘅司機，抵讚。

沿途見到好多車呀，有一架有好多柚子，另一架就有好多菠蘿。
(右下角)：見到嘛？咸蛋超人都嚟咗布吉呀。



仲見到有本地人喺 Phuket Old Town 取景影婚紗相，不過原來佢哋唔興著婚紗。



行完 Phuket Old Town 去 join 返阿 Nick，見佢係咁抹汗... 我先發覺原來我哋行幾耐佢就企足幾耐。呢個時候我都問老公一陣洗唔洗比返 d tips 佢，不過佢話睇定 d 先。
上返車，天氣咁熱梗係去涼下冷氣啦。所以我哋話去 Central Festival + Big C shopping，兩個商場相距 3 分鐘腳程左右。

入到 Central Festival，發覺佢 d 舖頭都係 chain store 多，價錢又唔係特別平，所以又係零收穫。不過.... 比我發現咗 Mister Donut！自從上次去完台灣食過一次後就愛上，點解唔喺香港開舖呢？今次我唔會放過佢啦，買咗兩個一陣做 tea，每個承惠 35B。



既然 chain store 唔啱行，就轉戰 supermarket (又係 supermarket)！



不過我哋一早 target 咗所有手信、零食會喺 Big C 買，平吖嘛。加上今日有車，唔洗拎餐死。所以喺 Central Food Hall 都冇留太耐就情願轉去隔離嘅 Big C。
經過一輪狂風掃落葉後，已經係 4:30 啦。一早同阿 Nick 講咗今日會去埋日落崖睇日落，所以要出發啦。佢話最理想時間係 5:30 左右到，而我哋由 Big C 過去大約需要 45-50 mins。

日落崖，顧名思義係睇日落嘅好地方。我哋準時 5:30 左右就到咗，越接近日落時間就越多人。
(右上)：我嚟架，係咪好有 d 小說封面 feel？
(左下)：我哋兩個一致認為沙巴嗰張靚 d。

 

有冇覺得好熟口面？



哈哈哈，好無聊呀我哋.... 扮 Kappa 影相！其實仲影咗國產 007 周星馳同袁詠儀睇日落嗰個 pose，不過因為太黑，效果唔特出。

好可惜呀！從相片可見其實今日有好大舊雲喺水平線上，冇得睇住太陽伯伯從水平線上放工 lu.... 冇辦法啦。
不過一場嚟到，我哋都等到個太陽完完全全落晒先離開，當時大約係 7:00 左右。
去 join 返阿 Nick，發現佢又企喺度等我哋喎，做呢份工真係辛苦，淨係呢個景點都由 5:30 等到我哋 7:00。

入夜啦，趁住今日係星期日，所以安排咗今日會去 Weekend Market shopping + 掃街。離開日落崖時見到不斷閃電，我都估到一陣可能會落雨。
到達 weekend market 時，我哋打算先掃街醫好肚仔，之後先慢慢 shopping。
頭 5 分鐘都好正常，不過食完第一串魷魚時，就落好大大大大大雨啦。

由於 Weekend market 所有攤檔都係用帳篷搭出嚟，又漏水又有大水氹，我哋又冇帶遮，又著住波鞋喎，入晒水，心情真係大受影響。又要保住部單反相機唔好入水，所以我只係求其食，醫飽個肚就算數。ping 都冇乜點 shop 就想閃人。到老公醫好肚後，得返 15 mins 左右就要會合阿 Nick，只可以行一 d 冇浸得太利害嘅地方。



到咗集合時間 9:30，我哋行到集合地點打算 join 返阿 Nick，我都未搵到佢佢就搵到我哋（對我而言，大部份泰國人個樣係一樣）。阿 Nick 拎住把大遮，跑過嚟搵我然後塞把遮比我，再濕住身跑去對面馬路揸架車埋嚟。呢個時候老公就話：睇嚟今次 d happy money 唔比都唔得啦。

租車結束時間應該係 10:00，由於天雨關係有少少塞車，到達酒店時遲咗 10 mins 左右，阿 Nick 都冇黑面，我哋識做嘅，比咗 100B tips 佢，講真，今日真係辛苦晒佢。

返到入房，當然又係食金柚時間啦，而老公就開咗呢支泰國益力多飲，我就唔敢試啦，佢都話麻麻地喎。