♥♥ 結婚一週年沙巴之旅 ♥♥ - 雙島遊 + 海鮮餐 @ Day 2 (Part 2)

2010 年 11 月 19 日（星期五）

出完島玩返去酒店後，知道差唔多日落啦，快快手放低 d 嘢，帶埋部相機影日落，再出 town 食海鮮。

再攤屍 ing... 個環境真係令人好舒服～

睇住個天慢慢由再由藍天白雲變到好紅好紫，每次都覺得好靚，睇極唔厭！

仲要特登影一系列唔見樣嘅相

超超超超愛呢兩張呀！！！

又去咗訓吊床... hahahaha，都真係幾無聊

每一次日落我都會問自己：點解沙巴嘅日落會咁靚？

睇日落時我總會磨爛蓆，等到月光出埋先肯走...

睇完日落，又出動去搵食啦！今晚會去食海鮮，正... 不過今次要搭的士，因為  7:00 - 8:00 酒店係冇 shuttle bus，司機哥哥開飯時間呀～

講到海鮮，沙巴真係周街都係。旅遊書推介 "雙天"，話因為又平又好食，但係我上網搵過，有一間叫 "珍珠" 嘅仲平。隨後幾日同 local tour 傾偈時先知，原來我哋去嗰間本地人都覺得貴... 唔食都食咗啦，冇辦法啦！

先揀海鮮，想食幾多職員會幫你秤，再問埋你想點整，不過我哋都唔係好識，食招牌菜就得啦！

好大隻嘅瀨尿蝦

本來想食石頭魚... 不過好貴喎～

軟殼蟹

唔知係咩斑... 

仲有鬆郁蒙嘅東風螺

最後 order 咗：濕奶油老虎蝦（招牌菜），瀨尿蝦，東風螺，馬拉盞薯仔菜（招牌菜），東星斑，兩杯桔仔冰，承惠 RM17x。OK 呀，我仲以為要 RM300，而且味道唔錯。聽個名以為濕奶油老虎蝦唔會太好食，本著招牌菜一試無妨，結果絕對超乎意料之外，極力推介！

食完捧住個肚走，由於未夠鐘坐酒店嘅 shuttle bus，諗住去買件蛋糕返酒店食。旅遊書重點介紹呢間餅店 --- Secret Recipe，原來喺沙巴都幾受歡迎架！

好多款式呀，一向嗜甜嘅我已經流晒口水，wakakak～ 好快殺咗 2 件。再行返去 shuttle bus 候車處時又出事... 買雪糕食添... 自家制雪糕，當支持下啦！（藉口！）

返到酒店，夜晚嘅景色又係另一個 feel～

呢頭先食完杯雪糕，嗰頭就話要食埋件 cake，想唔肥都難... 呢餐已經係今日第 5 餐，死未？

食飽後抖一陣就係時候要訓（仲唔係做豬？）因為聽日要參加第一個 local tour：九如河激流（Kiulu Rafting） + 夜觀螢火蟲。