♥♥ 結婚一週年沙巴之旅 ♥♥ - 雙島遊 + 海鮮餐 @ Day 2 (Part 1)

2010 年 11 月 19 日（星期五）

尋晚場雨都算落得耐，今日安排咗出島浮潛，唔知水質有冇受影響呢？有理冇理，點都要出去玩架啦，落去食咗個早餐先！

↓ 去餐廳嘅必經之路... 仲係我哋間房嘅露台景添！

一路食，一路望住個泳池及海灘景，已經開始急不及待一陣嘅浮潛活動～

每日嘅早餐已包咗喺 package 入面，以為唔會好得去邊，竟然有少少意料之外喎！選擇算多，D 嘢都幾好食！我哋仲已經喺酒店攞定幾塊麵包一陣間餵魚。

前一日已經問定酒店 reception 第一班出島嘅船開 8:30，可惜因為食早餐時太他調，只係遲咗少少到碼頭，不過已經開咗船啦！冇辦法，唯有等下一班... 9:30。

尚有整整一小時，只好圍住酒店周圍行，浪費下 d 時間～ 頭先食早餐時望到有幾張吊床，想返轉頭玩下。途經 resort 另一邊嘅酒店，The Sutera Harbour - The Pacific Wing <-- Pacific Wing 同我哋住嘅 Magellan Wing 有 dd 唔同，Pacific Wing 係商務式酒店，而我哋 book 嘅 Magellan Wing 係 resort 形式，後者渡假 feel 會濃厚 d，不過 Pacific Wing 嘅外觀一 d 都唔差噃！

冇記錯好似第一次訓吊床，幾過癮喎！

老公一於少理，佢有佢梳乎梳乎... 早上陽光未算好猛，晒下太陽簡直一流！

hea 下 hea 下，一小時好快就浪費晒，^^

係時候行去碼頭準備集合上船。沙巴人做嘢真係好準時，每班船係搭正開就搭正開，今次唔可以遲啦！

碼頭泊滿船，但仍然見到好多魚仔，偷偷地攞咗好少好少嘅麵包餵下魚，佢哋好似十年未食嘢咁，猛搶！！！

水質好清，仲竟然有海膽添！

呢間就係酒店嘅 watersports centre，d staff 好 nice，仲有個靚仔添，^^

我哋就係坐呢款快艇出島玩啦！上面嗰隻係香蕉船，我估係跟快艇出去提供比島上嘅人自費玩。

著埋救生衣之後就坐定定，因為要開船啦！

我哋 join 嘅係雙島遊（沙比島 Sapi Isalnd + 馬奴干島 Manukan Island），先去第一個島 --- 沙比島，人哋話呢個島最多魚，但亦都係最多人。不過我哋嗰日又 ok 喎，唔多人吖！

↓ 一個比較簡陋嘅碼頭

呢個就係我哋嘅第一站 --- 沙比島啦！

網友們果然唔會亂報料，真係勁勁勁多魚呀～

救命呀～ 好曬呀～ 但係又怕曬，又要玩，XP

喺呢度要比上島費，不過唔算貴，只係 RM10 一個人，而且我哋玩雙島的話，第二個島唔洗再比錢架啦！

出發前本身好掙扎究竟好唔好 join local tour 出島，老公話唔好，因為佢想 free d，而且 join local tour 唔見得有咩用，自己去嘅程序都一樣。只係跟咗 tour，導遊會幫我哋看守個人物品，咁我哋就可以安心落水玩，而且跟 tour 的話會有一餐海鮮 BBQ lunch。

後期我打聽到原來島上有餐廳，就算自己去都唔怕冇嘢食，結果就選擇唔 join local tour，起碼平 d 而且時間上彈性 d。本來都怕落水玩時冇人看管個人物品，所以出發前千叮萬囑唔好帶貴重物品。但原來酒店有職員會跟快艇出島，目的係等你哋到島後 sell 你哋自費玩水上活動。我哋亦不例外成為目標客人，不過一早已經諗住會自費玩 para-sailing（水上降落傘），而且已經做埋 research 知道收費，所以都唔怕 sell，幸好佢哋一 d 都冇 hard sell！

到島後隨船嘅職員通知咗我哋沙灘上有好多細石，要小心，萬一受傷記得搵救生員幫手。之後就帶我哋 settle down，我向佢表明咗我哋會自費玩降落傘，佢話想幾時玩就隨時搵佢，我以為佢會走啦，點知佢就坐喺我哋張木枱度同佢 d friends 傾計，變相有人幫我哋看嘢，哈哈！

換好晒衫，搽埋防曬後，係時候親親 d 魚仔啦.... 真係好多魚呀～

浮潛浮潛浮潛... 真係好好玩呢！

沙比島其實有左/右兩個沙灘，職員話 A 沙灘會比較多魚，水質都清 d，所以我哋一路都喺 A 沙灘玩得平安無事。玩玩下老公提議不如去埋 B 沙難，一場嚟到，咪去玩下囉。唔玩由自何，一玩就出事！

話說去到 B 沙灘，我已經走咗落淺水區，唔知整緊 d 頭髮定整緊副潛水鏡，老公就仲喺岸上面好似執緊貝殼。我突然覺得隻腳有一陣好似被火燒嘅刺痛 + 少少麻痺，我即刻對老公大嗌：「吖，我係咪比嘢咬呀？有 d 痛痛地喎！」老公拖我上岸後，發現我隻腳有 d 紅，佢以為我係咪比蟹鉗到（因為島上面真係有 d 蟹仔），不過越睇越唔似... 我當時都唔知係乜嘢攻擊我... 後來老公估係咪被水母炸親呢？大家都唔敢肯定，諗住行返去自己張木枱度坐下先... 又唔知仲落唔落得水玩喎，又唔知點做喎... 當我猶疑緊好唔好搵救生員時，老公仲嚇我：「我睇電視見到有 d 人被白炸炸得好嚴重嗰 d，15 mins 會冇命架啦！」

嘩.... 唔係嘛？我即刻去搵救生員... 原來佢哋都見慣見熟，只係輕輕摸下我個傷口，再淋 d 白醋上去，就叫我可以繼續玩... um.... 咁兒嬉咁嘅？

之後個傷口都 keep 住有少少刺痛，但係絕對頂得順！坐低休息一陣後，唔想 d 時間係咁 side，所以決定玩我想玩好耐嘅降落傘，即刻搵返頭先個職員，佢就幫我哋安排。

原來先要坐快艇去海中心，佢會幫我 set 好個降落傘，大概會玩 10 mins 左右，收費 RM250/2 人。

喺佢哋整緊個降落傘時，我再望一望自己被炸嗰度，嘩，搞乜呀，腫起晒，好似被蚊咬咁...

唔理得咁多，我點都要玩呢個水上降落傘，好在唔係太痛...

係時候要飛上天啦...

一扯就扯到好高啦，中途會有 3 次放你落水，但係只會濕半身，哈哈... 又幾好玩喎！職員哥哥影嘅相都 ok 啦，始終真係好高好遠呢！

老公以為我會驚，但係其實我玩得幾開心囉.... 你太睇少我啦，wakakaka

喺天空上望返個島係好好好舒服，有少少微風，好正呀！如果時間上可以玩耐 d 就好啦！臨上岸前又影返張合照...

上返岸，仲有大把時間先轉第二個島，梗係再玩啦... 雖然隻腳仲有少少痛，不過絲毫唔影響我落水嘅心情，^^

見到有其他人想餵麵包，原來宜家已經唔比餵啦，救生員發現後會沒收 d 麵包。但係我哋又唔想浪費咗呢個大好嘅機會，結果做咗次衰仔... 將 d 麵包放入手中，扮晒冇嘢咁走落水，哈哈... 搏 --- 大 --- 霧！不過唔可以成日咁做，因為會吸引晒 d 魚仔埋你身邊，盲嘅都知啦，wakakaka！

玩多陣後，見仲有一個鐘就要去碼頭轉船去第二個島，所以要去醫醫肚先～

比錢買嘢食...

上面都講過，跟 local tour 就有得食海鮮 BBQ lunch，自己去就食自己。呢間餐廳都 ok 吖，有漢堡包，有炒飯炒麵... 我嗌咗個雞肉炒飯，老公嗰個係甜酸魚柳飯，仲有兩杯飲品，一杯係 lemon juice，一杯係 lime。

醫飽肚後，想去沖沖身先轉船，見到個牌... 唉～ 真樣衰，咁都被白炸炸到... 咁多人玩都冇事，點解要係我？？？

見到有人圍住個涼亭猛影相，究竟有咩八？

哦... 原來係巨型水蜥... 旅遊書都有講，我仲以為自己冇機會見到添！旅遊書仲話佢哋唔食肉，都唔係嘅... d 人燒完 d 肉類拋比佢哋食... 仲爭添呀，邊係唔食肉吖，唔食人咋啩？最多時一共出現咗 4-5 隻呀！

睇完巨型水蚚，夠鐘去碼頭坐船，第二站 --- 馬奴干島（Manukan）

島上展示咗世界大戰時遺留落嚟嘅東西... 堅嘢嚟架喎！

um... 決定去呢個島真係有 d 失策... 水都落唔到... 一時太大浪，一時好多細石，唔著鞋的話根本唔洗旨意落到水，所以呢個島多唔多魚我真係唔知。

結果無無聊聊咁閒 hea，周圍行下，影下相就走，早知就唔好轉島啦～

最後仲提早咗一個鐘船返酒店，因為呢個島真係浪費唔到太多時間，寧願返酒店做第二 d 嘢。

又返到嚟我哋住嘅酒店... 原來都幾大喎～