2010 年 11 月 20 日（星期六）
今日要參加第一個 join 咗嘅 local tour：
Kiulu Rafting + 夜觀長鼻猴、螢火蟲
人哋話去到沙巴又唔怕水嘅人，一定要玩下激流。我哋兩個... 係 OK 嘅... 不過就掙扎咗好耐，究竟玩一級定二級激流呢？一位去過沙巴三次嘅朋友同我講，一定要玩二級，因為一級太平淡，簡直似坐船仔遊船河一樣。但考慮到我同老公都未玩過激流，雖然話識游水，但係... 都係保險 D 好，最終都係報咗一級難度。
活動當日，都係例牌去酒店餐廳食個 free buffet 早餐，我哋準時 8 點正已經喺酒店大堂等導遊接送，佢哋都好準時喎，真係 8:00 正就到，時間觀念好值得令我嘉許（拍手）！
上到車，原來都唔係即刻出發，仲要去其他酒店接載其他人！
接齊人就輪到導遊出場。是次激流導遊 --- Angelo，十分十分之搞笑、nice & cute 嘅一個導遊，又盡責又 helpful，又有笑容，有問必答！
Angelo 講解完一輪後，就開始傳閱呢份文件 --- 生。。死。。狀
其實一早做晒資料搜集知道一級激流唔會刺激得去邊，不過一講到要簽生死狀，硬係覺得驚驚地～
簽好晒後，又可以訓陣先！因為由市中心出發到九如河，大概要 1.5 小時... 差不多到達目的地前，司機會車我哋去一個油站換衫，佢哋話最好揀一件污糟咗都唔會肉赤嘅衫去就最好啦。
大家喺油站換好衫後，開始聽到流水聲，我哋到啦～ 周圍有好多樹，又有水，好舒服呢！
落車出發，行入去啦～ 當日好曬，希望唔好曬傷（或曬黑）我，因為老公尋日出島玩時已經曬傷咗啦～
導遊會先叫大家著好救生衣，揀頭盔，攞划槳等等。
↓ 其實我係好樣衰兼騎呢啦... 你哋細心 d 睇，冇人會帶泳鏡囉～ 不過真係冇辦法，由於會落水，我唔敢帶隱形眼鏡，咁無理由盲中中咁玩架嘛，只好帶泳鏡，因為我副泳鏡有近視度數，鬼叫自己細個唔愛錫雙眼咩，宜家要我扮龜都要頂硬上架啦！我媽咪見到幅相之後仲笑咗我好耐添 -_-"
大家都搞掂好裝束後，導遊就為大家開始一輪好好笑又易記嘅 briefing，我好用心聽架！
講解完畢後，真係要落水玩啦！整個激流過程我哋主要拍片為主，相片就欠奉啦。全程大約玩咗 1 個鐘多 d，我相信一定冇二級咁好玩，但係一級都 OK 喎，起碼我哋都有過「刺激」嘅感覺。
一隻艇可以坐 7 個人（連埋教練），我哋被分配同兩位澳門女仔 + 一對韓國母女一齊玩，同船仲有 Angelo（好彩佢跟我哋隻艇，其他艇由其他教練 follow）。點知原來兩個澳門女仔唔識游水，而韓國媽媽要照顧女女，結果我哋兩個就被 Angelo 欽點坐船頭做 leader，負責狂划... 當佢嗌 command "forward" 時要起勢咁划。其實無論成隻艇嘅人幾咁合力，幾咁齊都好，隻艇嘅 direction、你有冇機會反艇落水等等，根本由坐船尾嘅教練控制... 不過因為我哋隻艇有小朋友，Angelo 冇反我哋艇，但眼見其他艇嘅部份人比人推落水，其實都幾好玩，哈～
去到路程嘅一半，大家去到一個較為平靜嘅區域，Angelo 話嗰度適合游水，叫大家落水玩下。
其實我好想試下放手，不過水流有 d 急，我驚沖咗我去大西洋，都係踢下水算數啦，XP
反而老公一早就游緊水，佢真係被沖遠咗少少，不過最後都返到嚟
游咗一陣，係時候趕路，我哋同 Angelo 影返張相留念！
划划下，後面突然間好嘈，原來係一班新加坡人自組隊租艇嚟玩，由於全部都係後生仔，開始不留情面，經過我哋隻艇都要潑下水...
經過多大約半個鐘後，終於到咗終點，還晒所有配件後再影張相。其實唔講根本唔會發覺呢個係終點！
由於方圓幾里都冇地方換衫，上返旅遊巴時 Angelo 教我哋用毛巾墊住嚟坐。不過 10 分鐘車程後就去到食嘢嘅地方，可以沖身換衫，唔覺唔覺原來當時已經係 1:xx 啦。
喺沙巴跟 local tour，對「食」千祈唔好抱太大期望，除非標榜以美食為題。
喺沙巴，食得最多就係雞，其次就係雞蛋，因為沙巴人好多都信回教，冇乜地方有豬食。雖然食極都係雞，不過原來全部都係走地雞，雞肉唔錯呀～
呢餐 local tour 已包，如果想飲嘢，RM3 買個即開椰青！
食物雖然冇乜特別驚喜，不過我哋都認為唔肚痾就得啦，況且啱啱先做完咁大運動量，三爬兩撥已經 KO 咗兩三轉啦！趁仲未到集合時間，再周圍影下相，呢度真係好好好靚，好耐冇親親咁多花草樹木啦！
好大片草原呀～
呢間草屋其實係一個 counter，話說頭先整個激流旅程都有 camera man 喺某 d point 舉機同大家影相，所以可以喺呢間屋查返自己張相。
可惜都有 d 貴... 每隻艇會影 4 張，不過一張 8R 相要 RM40。可以選擇要 CD Rom，4 張齊晒就賣 RM150 啦～ 我哋就冇幫襯，不過同船嘅韓國母女買咗其中一張相，我問佢哋借嚟睇咗就算 lu！
local tour 外判嘅激流專家 --- River Bug，基本上佢承包晒所有嘅激流活動，不過真係好專業，讚！
大家食得 7788 後，又要坐車返酒店啦！不過我同老公 join 嘅 tour 係包埋睇螢火蟲，所以司機會車我哋兩個同下一個導遊會合，其他人就返酒店。見到另一個導遊時已經 3 點幾 4 點，再坐佢架車出發去睇螢火蟲。因為激流嗰 part 遲咗，搞到成車睇螢火蟲嘅人勁等我哋兩個，真係非常之唔好意思啦！
今次螢火蟲嘅導遊就係接機嗰個，叫 Mahoney。再坐車... 再訓覺... 又要 1.5 小時車程！落車後要行一段好短嘅路，導遊話夜晚好多蚊，即刻搽返 d 蚊怕水。
到啦！原來又係食...
今次係 tea，主要食馬來西亞嘅茶點...
仲有專人幫我即場泡製嘅沙巴咖啡，^3^
total 有 5 款小食，每樣試一件就算啦，頭先嗰餐都未落晒格，XP
外面嘅風景超靚～ 感覺好寧靜！
一陣我哋就係搭呢 d 船遊船河架啦！
輕輕醫完肚，大家又著住親愛嘅救生衣落船，準備尋找長鼻猴及螢火蟲。
不過太陽仲未落山，睇咗長鼻猴先啦，螢火蟲會夜少少先出嚟活動。長鼻猴好早就會訓覺，佢哋通常會喺訓覺前出嚟搵嘢食，所以 5 點幾 6 點呢 d 時候就最啱啦！
我哋今勻都算幾好彩，可以睇到晒長鼻猴及螢火蟲。不過就勁勁勁比蚊咬，搽晒蚊怕水都冇用，照咬可也！
呢度有一隻，搵唔搵到長鼻猴喺邊？
開估...
嗰度又有一隻，今次又搵唔搵到喺邊？
又開估...
睇咗大半個鐘頭左右，見到太陽開始落山啦！好靚，真係好靚！
好一個完美嘅倒影～
螢火蟲真係好靚，唔知係咪因為品種問題，沙巴見到嘅螢火蟲同我喺香港見到嘅螢火蟲有 d 分別。香港見到嗰 d 尾部嘅燈係綠色，而且係長期著咗；而沙巴見到嘅螢火蟲尾部嘅燈係黃黃地色，不過閃得勁勁勁快。
我哋沿途見到好多螢火蟲，夜晚黑忟忟，佢哋幾十、幾百隻咁喺棵樹上面閃下閃下，十足十好多好多聖誕樹一樣，可惜相機質素不足，唔可以影相 / 拍 video 返嚟。所以只係用肉眼及用腦記住，整個螢火蟲部份冇一張相影得靚。
長鼻猴及螢火蟲之旅玩咗大約兩個鐘，又要返歸食晚飯。今次亦係 local tour 包咗，食馬來西亞菜喎～
OK 啦，不過不失，反而個老火湯幾好飲！食完飯要上車返酒店，臨走時買咗兩枝雪條，呢隻牌子嘅雪條周街都有得賣。
出發前朋友講過一定要試，而且粟米味係必試，超好食喎，啱晒最鐘意食塞米嘅我！冇記錯只係 RM2 一條，試下都好吖！
老公就揀咗大樹菠蘿味，d 味道係咪好古怪呢？
返酒店時途經一間本地朱古力店，沙巴嘅可可豆好出名，所以朱古力都唔會差。我當然唔放過呢個機會啦，朱古力喎，仲唔血拼？
我同老公一向都係晚出晚歸型，幾夜都唔願訓嗰種人（黑眼圈超勁）。返到酒店已經 10 點幾 11 點，仲有閒情逸緻出露台食宵夜。不過呢餐宵夜唔 heavy，只係 resort 送嘅生果 & 朱古力 + 一枝汽酒啫。見個 feel 咁好，再攞埋部 ipod touch 出嚟播歌聽，好爽～
放心啦～ 裡面有著衫著褲架！
喺觀賞長鼻猴及螢火蟲時嘅日落真係好靚，靈機一觸不如將個日落情景拍低，得閒自己回味回味都好～
