2013 年 9 月 15 日 (星期日)
嚟到住院嘅第二日，尋晚真係訓得唔係幾好，一整晚仍然只係 keep 住小便有血絲但冇規律嘅陣痛，唔知要等到幾時，又好驚要落催生藥（因為會比自然作動痛好多）。問過醫生我咁嘅情況可唔可以出院返屋企等，但醫生話唔得，一嚟其實就到預產期，應該都係呢幾日會生得，二嚟我繼續見紅，佢哋唔可以放我走。再問佢有關催生嘅事，佢話屯門醫院嘅指引係如果連續三日都只係見紅而冇規律陣痛先落催生藥。吓？咁即係我仲要等..... 歐陽小 B，你一係就早 d 出嚟，唔好要我成日中空寶咁等.... 結果，當晚就真係嚟料啦！
其實住院嘅一整日都真係不規律陣痛，痛起上嚟好似 M 痛咁，不過我 feel 到越嚟越痛。之前都可以傾下計睇下電視話咁快就過。越夜就越痛，痛嘅時候係食唔到飯，要等痛完後先可以繼續。但我計過時都仲係 10-15 分鐘先痛一次，仲未夠痛。
直至夜晚 11 點左右，病房已經熄晒燈要大家訓覺。唉，我邊度訓得著吖，因為開始痛得密咗。計一計時原來已經進化到 5 分鐘痛一次，每次都有半分鐘至一分鐘，亦到開始 feel 到每次嘅陣痛係痛得勁咗，即刻運用呼吸法去減輕陣痛。原來用呼吸法呼吸得太細力，根本止唔到痛，越夜我就抖氣得越大聲。11 點幾嗰陣見陣痛一直都係好規律，心諗都應該今日生得啦啩，所以 whatsapp 歐陽生叫佢隨時準備趕嚟陪產。順便去多個廁所，但係真係有 d 痛，行去搵姑娘叫佢可唔可以幫我睇睇有冇開度數。點知姑娘串串地話：「你仲落得床去廁所，仲笑笑口就即係唔係好痛啦，再等下添啦。」咁就冇再理我。其實我好有疑問，我係痛，但係你唔比我係忍得痛嗰種人咩？不過嗰一刻我冇同佢嘈，乖乖地走返上床再等，因為我都唔肯定其實我有冇開到度數。
上返床後繼續好大力咁呼吸止痛，我諗其實我隔離床都應該比我搞到訓唔到。捱到凌晨兩點幾，姑娘換咗班，新嘅姑娘循例都會巡一次房，行到我張床附近佢聽到我好大聲呼吸就問我係咪好痛。我話係，再問我幾耐痛一次，幾時開始痛，每次痛幾耐等等，然後就主動話同我 check check 有冇開度數。一 check 原來我開咗兩度，仲鼓勵我叫我努力繼續用呼吸法，如果 BB 合作的話，天光之前應該生得。
如是者我繼續 he he 鞋鞋咁捱到 4 點幾。同一個姑娘再嚟巡房問我陣痛情況，佢再幫我 check 多次，勉強有 3 度。但係佢真係超好人，佢話第一胎嘅媽媽規定要開到 4 度先可以推入產房，佢即管問下產房宜家有冇位，睇下收唔收我。結果產房有位，我拿拿臨執拾細軟，除晒衫 (只係著一件唔扣鈕嘅產婦衫) 訓上床咁就比人推咗入去，嗰陣仲係凌晨 4 點幾，而我亦都即刻打比老公叫佢過嚟，再跟手打埋比媽咪話佢知我推入產房啦。
~~ 待續 ~~
沒有留言:
張貼留言