推到入產房之後要做一大輪檢查，又量血壓又驗小便。我都唔知自己做咩，留院幾日一直嘅血壓都好靚仔，就係偏偏助產士同我量咗 4 次血壓都話我偏高。仲有就係驗小便，呢樣先搞笑。話說做好大部份檢查，準備疊埋心水等大痛就生得。點知助產士話睇機見到我膀胱好脹，如果照生的話 BB 會難 D 出嚟，所以比個尿兜我小便。之但係個人都已經係咁痛，仲邊可以放鬆小個便呢？助產士問我對上嗰次去小便係幾點鐘，大佬.... 我一直都痛到典緊，對上嗰次咪就係比病房姑娘串我嗰陣囉，即係 11 點幾。結果我試咗好耐都真係痾唔出，要插尿喉放尿，一個字 ------- 痛，比生仔更痛!!!!! 好啦，放咗尿用試紙驗，點知又話我有蛋白尿，唉..... 救命，我一直以嚟乜事都冇，就算係做咗咁多次產前檢查都冇事。由於呢個蛋白尿同埋血壓偏高，要安排我種豆，話要咩咩咩種粒豆然後去 check d 唔知咩嘢 (當時一路痛得好密，已經冇心機聽佢哋 up 乜，只係想快 d 做晒所有檢查)。
有一個男醫生嚟到，幫我喺手背拮一針，嘩，支針又長又粗，我本身唔怕打針，但係原來佢支針拮咗入嚟之後仲要喺入面左撩右撩，痛到嗌晒救命。個男醫生搞咗一輪，突然有另一個男醫生出現，用英文同第一個男醫生講：「抽血邊度係喺呢個位抽架，呢度邊搵到血管？」之後佢親自出馬，喺我手腕高少少再種咗粒豆。嘩，我真係想爆粗，唔識抽就唔好幫人抽啦，已經承受緊陣痛，仲要比你支又粗又長嘅針拮多鑊撩多鑊。xyz!@#$@%$
我好緊張同埋真係越嚟越痛，助產士主動問我洗唔洗打止痛針。我其實心思思好想，所以答咗好。佢解釋風險我知，如果 4 小時內 BB 出得世，d 藥力會過咗少少去佢度，所以佢可能會遲鈍少少。我當時認為自己只係第一胎，4 個鐘內實搞唔掂啦，所以冇乜點詳細考慮就話好。
好啦，終於搞晒所有嘢，醫生發現原來我未穿水話幫我人手穿水。不過佢話穿水後度數有可能會縮返少少，但捱過咗之後會開後好快。咁我都冇得揀啦，卜一聲就幫我穿咗水，我就 feel 到有啲好暖嘅水流出嚟，醫生話 d 胎水係清嘅，冇問題，接住落嚟就係等開度數。
由於我好緊張，陣痛嗰時 d 肌肉拿埋一齊，不過痛完唔記得 relax 返，結果 d 手指好似人哋搽咗收縮水咁蜷埋一舊。助產士不斷叫我放鬆，我仲話我放鬆咗架啦，仲白白痴痴咁問點解我 d 手指會變成咁，係咪因為種咗豆，不過助產士笑我因為係我太緊張。
由於產房嘅指引係要開夠 4 度老公先可以入嚟陪產，我就仍然徘徊喺 3 度左右，助產士問我既然我咁緊張，想唔想叫老公早 d 入嚟陪下自己。我當然 say yes 啦，有人幫我按摩下紓緩下仲好，所以佢立刻幫我安排。
老公入到嚟話見我好痛，其實佢都主動問有冇得做無痛分娩，可惜因為當時係 5 點幾 6 點，麻醉師未返工，所以冇得打，而我之前打嗰支止痛針藥力又未發作，所以只好繼續用呼吸法止痛。當時其實我都痛到乜呼吸法都唔記得，幸好有個好稱職嘅陪產員 (即歐陽生) 一路陪我一齊呼吸，咁講真.... 又真係冇咁痛，而且只係大約深呼吸 2 下，陣痛就會過咗。
如是者大約 15 分鐘左右，助產士再埋嚟望一望，佢話已經開到 9 度。我當堂 O 咗咀，吓？開得咁快？助產士話望到 BB 個頭啦。佢比我試生，可惜我每次用力時 BB 心跳都會減慢，試咗 2-3 次，助產士都話唔好搏，等 10 度全開先再生。大約等多半個鐘左右，開晒 10 度啦，成個產房嘅人就好似如臨大敵咁，忙呢樣忙嗰樣，爭在未喺產房入面跑嚟跑去。唔知幾時就幫我 set 咗腳架同埋鋪咗 d 嘢喺我身上。助產士比指令，當下次陣痛一嚟時就用力痾。我聽到呢句都不知幾開心，終於唔洗再忍，可以痾得。然後突然 feel 到下體有少少痛，好似比蟲咬一咬咁，再 feel 到 chup chup 兩下，原來咁就剪咗我會陰。當時第一個反應又係喺心入面爆咗粗：X！做咩剪我呀？ (但事後諗返其實佢唔單聲都啱嘅，否則我可能會更緊張。)
第一次陣痛，我出力痾，陣痛完咗我就 relax。點知比助產士鬧，佢話叫我繼續用力，但係我明明知道係陣痛時先用力，過咗陣痛就回氣。原來助產士話當時 bb 已經出咗好多，如果我繼續用力其實可以生埋嗰少少咁就收得工。唓，我鬼知咩，之前上產前講座都冇教呢 d。歐陽生出聲：「算啦，唔過都過咗，咪等下次囉。」
第二次陣痛再嚟，我再痾，痾咗大約 6-7 秒左右 (之前教要痾 10 秒)，突然比助產士叫我唔洗再痾啦，原來 BB 已經出咗嚟啦。
其實我冇乜太大感覺，亦都唔知 BB 已經出咗嚟，我只係知道痛就用力痾，痛完就放鬆。總之，歐陽小 BB 就喺 2013 年 9 月 16 日上午 06:49 出世，重 2.90kg。計返轉頭，我由有規律陣痛開始至 BB 出世，只係用咗 7 個鐘，第一胎可以喺 10 個鐘之內完成我已經好心足啦。至於 push 嗰度仲勁，我睇返醫生 report，原來頭夾尾我只係用咗 4 分鐘。開度數更可以 15 分鐘內由 2 度開到 10 度，唔知關唔關事我之前跳開舞呢？
BB 一出世只係喊咗一聲，然後繼續 zzzZZZZ，可能因為真係支止痛針嘅關係，佢頭一兩日真係鈍鈍地，一日到黑只係識得訓唔食奶。
抹乾淨 BB 身體後，助產士就由頭到腳望一望 BB，然後交比我哋時會同我哋講聲發現 BB 邊度有問題。而歐陽小 BB 隻右眼有少少紅咗，相信係因為我生佢出嚟時壓到佢，不過會慢慢退。
我抱住歐陽小 BB 其實都好感動，不過未至於喊，我只係覺得成件事好得意。
BB 嚟到我懷抱後就即刻試餵人奶，不過都係嗰句，佢係不斷訓，所以第一次唔成功。助產士幫我哋影咗第一張全家幅，然後另一個助產士就幫我聯針 (有打麻醉藥)，我同老公就不斷玩 B，聯針一 D 都唔痛，因為止痛藥已經喺我心口。
再留咗喺產房觀察一個鐘，如果我冇乜特別大問題就可以推返去產後病房。期間歐陽生繼續可以陪住我，直至我轉病房。助產士都好好人，因為病房正正係派早餐時間，佢都拎咗份早餐比我喺產房入面食，因為過咗鐘，去到產後病房就冇得再食早餐架啦。
從此以後，歐陽家就變成三人行啦!
