細佬成婚之旅 --- 關島 @ Day 4

講咗好多篇 BB 嘢，係時候返嚟關島 trip 記述埋最後一日嘅活動，嚟個完美嘅終結啦。
其實我一直都記得呢篇係未出嘅，不過一直遲遲未開始動手寫啫。

2012 年 12 月 14 日 (星期五)

今日就要離開關島返香港啦，永遠都係去旅行嘅時間過得特別快。

今日我哋翻炒情人岬呀。翻炒嘅原因係因為一對新人當日抵埗後去咗教堂辦理法律文件準備第二日行禮，所以佢哋 miss 咗 local tour 呢一站，其實當日我哋都冇乜既定行程，一於去多次啦！

朝早起身行出露台望多次一個咁靚嘅海景，快快手影多少少相先。

仲把握時間落埋樓下影

等齊人，食埋個關島最後的早餐 + 寄存埋行李喺酒店大堂就出發啦。

每經過一個地方，我都話：嘩，好美國呀！<-- 咁呢度真係美國嘅領土，有咩咁出奇？身邊嘅人都開始唔理我 -_-"，但係真係平時睇電視先見到咋嘛。

經過呢個 Underwater World，歐陽生就大嗌話下次有機會再嚟一定要去，佢呢個人真係太鐘意海洋世界啦~~ 不過下次？唔知等到幾時呢？心目中仲有一大堆地方想去呀！

我哋一行 10 人去到 DFS 分兩架的士上去情人岬

到啦到啦~ 原來傳說中嗰對情人就喺呢度跳咗落去...... 真係好深呀，黑麻麻完全見唔到底。

上嚟情人岬嘅另一個目的就係為咗呢 D 鎖...五顏六色其實個畫面好靚



我哋都各自預備咗 D 鎖，寫咗少少字打算鎖喺度，不過應該唔洗幾耐就會被當局剪走。





特登幫佢哋影低先~~~

鎖滿晒成個鐵架時，其實真係好靚架！


除咗呢 D 鎖之外，如果我無理解錯，應該有得比錢做埋呢 D 牌仔，我估存放嘅時間會耐 D 啩，唔會好似 D 鎖咁 1-2 個禮拜就比人剪走。要錢嘅嘢，我哋當然冇做啦，hahahaha~



喺關島雖然係曬，但係上到嚟好好風，大家都好似唔捨得走咁。



個天真係靚到嘩嘩聲架！



之後搵人幫我哋影咗張大合照，齊晒 10 個人，yeah！

由於情人岬係遊客景點，當然有間 shop 賣下紀念品。

我仍然都係嗰個習慣，每去一個地方旅行會買一個當地嘅磁石，如果有一日貼滿晒成個雪櫃就好勁啦~

最後買咗個行李 name tag，因為上次去完台灣後爛晒兩個喼，既然今次去關島買咗兩個新喼，梗係要為兩個喼扮下靚嘛！

臨離開前，弟婦話想試下激似魚生嘅椰青

唔通真係人逢喜事？我覺得佢兩個當日都好醒神喎！

離開情人岬時都係坐返嗰兩部的士，途中有見到 D 自以為好有美國特色嘅東東....

Snoopy School Bus：我一見到就話 Snoopy 校車呀~~~~

同埋變形金剛，XD XD
呢種貨車香港真係未見過，我呢 D 鄉下人出城，係咁大驚小怪。

玩咗成朝，要係時候食飯啦。當大家煩惱緊究竟食咩好時，歐陽生就話：點解嚟到美國地方都唔食下美國嘅 burger 呢？
咦，你又有道理喎~ 一場嚟到，試下人哋 d fast food 係咪真係賣巨型漢堡飽都好吖。
一致贊成，所以去咗附近嘅 Wendy's，香港以前都有分店，不過講真點夠 McDonald's 同埋 KFC 爭。

哈，人哋個飽真係超大份架，就連杯可樂都巨型過人。相入面嗰種 size 只係 medium，見到有當地人叫 large，真係成壺咁飲...... 勁！

醫完肚，行程最尾一日通常都係血拼，所以我哋拉大隊去咗 GPO (Guam Premium Outlet) Shopping。

出發前上網睇 D 人話好平，其實都唔係嘅，同喺香港買好似差不多。

呢間 Nine West 真係睇到我眼都突埋，超多鞋、手袋.... 或者呢張相都唔覺有幾大... 下面嗰張應該會壯觀 d。

我成日好白痴咁喺度諗，萬一 D 鞋盒跌晒落嚟，唔知要花幾多時間先執好晒呢？

結果，各人都有 D 收穫。
我喺 Nine West 買咗個手袋，喺 Calvin Klein 買咗兩個 bra bra，
而歐陽生都喺 K-Swiss 買咗對鞋，對鞋真係平到震，只係百零蚊港紙咋。

放完血就要返酒店拎返 D 行李準備等人接我哋去機場。去機場時經過 Marriott Hotel 接其他人，撞啱有 D 美國軍人返酒店，唔知點解我又覺得好新奇，又影一餐。好在冇比 D 軍人發現我影佢，萬一佢搶弊我就慘啦~~~ hahahaha

日落啦，喺機場門口影多最後一張相，個天好靚！

由於一星期中只得一班機返香港，機場嘅 check in counter 又要應付大量旅客，我哋都排咗好耐隊。咁無聊，一於又影相啦。

歐陽生嘅傑作，佢話要影低我哋有幾多行李喎。

今次個 staff 好好人，知道我哋冇預先劃位，架機又 full，所以盡量幫我哋安排好點坐點坐，又問埋邊個同邊個係 husband and wife 等等。我雖然好欣賞佢嘅貼心照顧，但係搞到我哋係最後一批人上飛機。

United Airline 嘅飛機餐仍然都係 keep 住一個麻麻地嘅 standard!!!!

Bye Bye Guam，唔知仲有冇機會再嚟，不過的確留低咗一個美好嘅回憶。
再次祝賀一對新人，以後要好好愛錫大家啦，遇見 Mr. / Ms. Right 唔係一件易事！

吉之島血拼日

2013 年 4 月 28 日 (星期日)

以往去百貨公司 shopping，BB 部永遠係我最快 skip 嘅一項，宜家為咗小 B，做埋格價專員啦。

上 Baby Kingdom 見到有網友報料全線吉之島做緊 BB 展，我見當時都已經 18W+，去行下攞個 idea 要買咩都好，結果就促成咗第一次為小 B 而放血啦。

因為弟婦有朋友喺 Aeon 度做，幫我拎咗 D $30 coupon，每次買夠 $300 就可以用一張，我更加不留情面咁去買，哈哈！

逛咗 1 個鐘左右，就有以下收穫。其實我耳油未盡架，不過因為當時未知道 BB 嘅性別，所以好多嘢都買唔到，向 sales 八咗下個月再有 BB 展，咁今次一於買 D 不分性別嘅嘢，5 月嗰次照完結構先再入貨。

以上就算折完之後已經用咗我 $940.9 啦，點解 D BB 嘢要咁貴架？？？？
不過因為媽咪會幫我湊 BB，所以 BB 有兩頭住家，導致好多嘢都要買 double！

1) Pigeon PPSU 奶樽 10 大 2 細 @ $60.8 （唔係因為有兩頭住家我都唔洗買咁多！）雖則有打算試餵人奶，但我冇百分百嘅信心可以做到全埋身，必要時都要化身做泵媽，咁就可以泵出嚟由媽咪代餵，我可以休息下。

2) arau BB 專用洗衣液套裝 @ $170.4（唔講都唔知原來成人用嘅洗衣液係有螢光劑....所以洗 BB 衫要買佢專用嘅）

3) 4 格奶粉格 @ $17.6（唔...... 唔知點解買咗，不過算啦，等佢到時大 D 實會有用）

4) 爽身粉盒 @ $20.7（買完先知道原來姑娘唔建議用爽身粉，不過媽咪佢又話佢習慣用，唯有買 D 不含滑石粉成份）

5) Nuk 奶咀鍊 @ $23.2（由於我會買 Nuk 嘅奶咀 (<-- 好明顯係我被 Nuk 奶咀外表吸引，完全冇理會過 BB 食唔食)，所以買返條 Nuk 嘅奶咀鍊配成一套）

6) Pigeon 奶樽刷 x 2 @ $22.4（再次因為有兩頭住家嘅關係，又要買兩份）

7) Minimoto 奶瓶夾 @ $24.6（呢個係買比母親大人嘅，因為佢用返最原始嗰 D 烚奶樽煲，佢話買個鉗比佢就得）

要搵錢好難，要洗錢就一陣風咁~~~ 不過，問心，買 BB 嘢係好開心嘅。

胎動初感受 @ 17W

之前一直都好恨快 D Feel 到胎動，因為我真係一個杞人憂天嘅人。

未 feel 到胎動前我簡直癲咗咁晚晚返到屋企都用胎心機聽下 BB 心跳，感受下佢嘅存在。

我都講過，因為我咩 morning sick 都冇，成日都會好驚 BB 無聲無色底下就...... (啋)!

雖然嗰部胎心機我用咗 HKD650 買返嚟，但係我咁用法簡直抵返晒 ^_^ (明知成日用胎心機未必好，但係就偏偏忍唔住要享受呢段「親子時間」)。

2013 年 4 月 13 日 (星期六) @ 17W0D

因為用胎心機嘅緣故，我終於 feel 到 BB 郁啦。
話說我好似平常咁用胎心機聽 BB 心跳，不過唔為意原來自己較咗好細聲，所以聽心跳時不奇然比平時大力咗少少按落個肚皮度想聽得清楚 D。點知搵到 BB 位置後佢篤返我部機出嚟，好似想投訴我壓得太大力阻住佢咁。第一下我都冇為意，當我回過神後重複試多兩次，BB 兩次都隊返我部機出嚟，個感覺真係超得意。我以為 BB 嘅胎動就此開始，可惜之後嗰幾日佢一 D 動靜都冇。上網睇下文章，好多醫護人員都話第一胎冇咁快 feel 到，大約 20-22W 左右胎動先會明顯，嗰刻有 D 灰，我唔想真係等到 22W 先 feel 到 BB 郁喎~~~

2013 年 4 月 17 日 (星期四) @ 17W4D

feel 到啦 feel 到啦，呢幾日終於都 feel 到肚皮彈嘅感覺，不過好多時一日只係得一次，有 D 懷疑究竟係咪自己 feel 錯。每次佢彈我嘅時候我都唔為意 (通常都係喺公司做緊嘢，分咗心)，到我想再 feel 清楚 D，隻懶蛇 B 又訓覺 lu，都唔知究竟係自己肚皮抽筋定係 BB 郁...

2013 年 4 月 18 日 (星期五) @ 17W5D

今日 BB 喺我返工時一日郁咗幾下啦，終於好明確咁感受到咩叫胎動，真係好想大嗌~~~~
唔知係咪因為喺我個肚度聽音樂聽得多，好多時喺我播音樂時佢會郁得密 D，又或者食飽飯坐喺度佢就會猛郁，但好多時都係夜晚比日間活躍。阿 B 阿 B，你唔可以好似你父母咁夜晚先生生猛猛出動架喎，咁夜訓覺對身體唔好吖~~~

之後，無論歐陽生、媽咪、我嘅靚靚弟婦，佢哋放隻手喺我肚皮度，阿 B 都會比面伸我兩腳，佢哋全部都會 feel 到。到咗今日 21W3D，BB 已經郁得密過之前好多好多，基本上我訓醒開始就 feel 到佢郁，直至夜晚我訓上床佢都係郁得好利害。最搞笑係每逢歐陽生對住我個肚皮同 BB 講嘢時，阿 B 會郁下比反應，因為 D 懷孕書話男性嘅聲線比較低沉，較容易傳入肚中，BB 係會聽到架，所以由爸爸同 BB 做直接胎教係最有用。

生命真係好奇妙，當初只係一粒好細好細嘅細胞，一路進行分裂而變成一個人仔，到今日我同 BB 一齊經歷每一日。幸好我份工作算係「他調」冇乜壓力，同事間唔會爭上位搏表現，家人及朋友關係又良好，日日都冇乜煩惱可以笑住咁過日子，我條「人生路」雖然係平凡但我好滿足，希望我呢位準媽媽可以傳授好多開心嘅賀爾蒙及正能量比 BB！

性別開估 @ 18W3D

2012 年 4 月 23 日 (星期二)

不得不承認，人就係貪平。

有朋友早我三個月懷孕，佢係搵開張國良醫生做查檢，收費應該全港最平。一次產檢只係收 HKD280，照埋超聲波，你話呢 D 專科價錢去邊度搵？但唯一嘅代價就係要等好耐。

我見上次我去黃醫生度照唔到 BB 性別，有點不甘心底下 Book 咗呢位張醫生。當日約咗 5:30 睇症，勢估唔到等到晚上 8:00 先輪到我睇，所以歐陽生好鐘意呢個安排，因為咁佢就唔洗特登向公司請假。不過我欣賞呢位醫生檢查得夠全面，包括驗尿、磅重、量血壓、觀察我呼吸頻率、摸肚等等。一般嘅私家產檢最多都只會磅重 + 量血壓兩樣。

但係平嘢當然要將就一下，佢哋個磅係十年前有個秤，要自己調較嗰種磅；血壓計亦係手泵，不過唔緊要啦，最緊要有做呢 D 檢查啫。但係唯一問題就係連部超聲波機都濛過人。而且醫生有兩個診症室，佢成日兩邊跑嚟跑去，真係幾好笑，不過我又唔係太介意，只要唔好調亂我 D 病歷就得啦。

當我訓上床照 BB 時，佢第一時間就幫我睇性別，結果開估係女仔，yeah！其實好多朋友都問我想生仔定女，我覺得性別唔輪到我選擇，所以我冇特別強求。而且只要 BB 健康，男仔女仔我都一樣愛錫。

醫生講嘢偏細聲，一來佢已經帶住個口罩，二來或者因為佢睇咗全日嘅症，正常都有返咁上下攰，往往佢講嘢好似只係講比自己聽。
話說照緊 BB 時，佢會講 "呢個係 XX，正常吖、呢個係XX，正常。"
當照到 BB 嘅脾仔時，醫生都係咁講，不過因為真係好細聲，我聽到佢話 "偏長" 而唔係 "正常"
所以我就問：咩話？正常定偏長？
醫生：偏長，但係都正常。
然後歐陽生就話：咁咪仲好，女仔喎，42" 長腿..... 正！

所有嘢 BB 都正常，只係比起正常 size 細咗 2 日，呢方面我有少少擔心，我成日都唔想 BB 偏細，因為我知自己食嘢唔夠均衡，驚佢營養不良。不過醫生話 2 日係少問題，好容易追返。

呢張就係 BB 嘅超聲波相，真係比起之前兩個專科醫生偏濛一 D


右邊係頭，左邊漲卜卜 d 嗰個係 body

醫生都知道我哋未必會明白，所以佢手繪咗幅圖比我參考，即係話佢喺我個肚入面倒樹蔥，利害利害：



醫生話到咗宜家 18W 其實可以唔洗額外補充葉酸，所以佢叫我唔洗再食 lu，但係鈣就要，因為 BB 開始發育佢 D 骨骼，如果我唔補鈣，好容易比佢扯晒我 D 鈣走，到時我可能會牙痛、腰骨痛，甚至小腿抽筋等等。佢開咗 6 星期嘅鈣片比我，total 有 48 粒，埋單都只係 HKD300，呢 D 專科醫生嘅價錢真係去邊度搵。暫時約就約咗會返去覆診，不過我宜家決定繼續喺黃醫生度做檢查，雖然張醫生平，但都未必咁樣兩邊睇 lu。除非我特別想見下 BB，又或者食晒 D 鈣片就或者考慮上去，^^。

祝願 BB 一切平安，Y


佢能夠健康出世就係我嘅心願！Y