爸爸。戒煙。加油

見到標題，有被嚇一跳嗎？
放心放心，佢唔係有咩大病而要戒煙，係佢無端端話突然唔想食。

我家老爹好少出現喺我嘅 blog 上，但熟悉我嘅朋友都知道我最錫嘅就係家人，尤其是爸爸。或者因為小時候爸爸已經係中港司機，經常粵港兩邊走，一星期大概只有兩晚可以返屋企見見我哋。亦因為呢個緣故，其實好多年前佢出面有外遇，媽媽同我嗰陣都好唔開心（而細佬太細佢都唔知發生咩事）。爸爸曾經離家出走，但經朋友勸告後就重返媽媽身邊。呼，都接近 20 年前嘅事 lu，宜家見爸媽兩個好似以前一樣咁好，做子女嘅呢樣係最大嘅安慰。差點由變成單親家庭至今時今日有一個完整嘅家，我知我係屬於好運嘅一群。不過唔知點解，爸爸重返後，我一 d 嬲嘅感覺都無，或者以前唔知道點解佢要走，只知佢出面有外遇，但係突然多返個爸爸，我係覺得開心大於一切。所以我成日比歐陽生笑，我有「戀父狂」。

爸爸係一名煙民，煙齡大約有三十多年。
我唔知佢平時食得勁唔勁，但係佢喺屋企時，通常晚飯後抽一支，臨訓前一支。直至我無端端有鼻敏感，佢都係選擇匿埋喺廚房對住個抽氣扇食，都唔會戒煙。

我公司一向都係吸煙工作間，老闆 + 少量員工亦係煙民。佢哋只會喺自己個位食煙，有時同佢哋開會時我係焗食二手煙，我懷疑我嘅鼻敏感都係咁得返嚟嘅。

今年年頭，老闆突然心絞痛，立即入院做咗通波仔 + 搭橋手術，執返條命仔。病愈後，老闆立即戒咗煙，但並無勒令公司其他同事一齊戒煙。但係冇咗老闆呢個大煙民，公司嘅空氣其實已經清新咗好多（因為其他同事都唔敢隨便喺座位食煙，驚引到老闆，會被老闆娘鬧）。

今月初，一位高層亦係因為心絞痛，往檢查時被醫生捉咗入院，又係立即做咗通波仔 + 搭橋手術，醫生亦形容佢執返條命仔，因為佢差 d 就心臟病啦。病愈後，佢都戒埋煙。其他同事更加唔敢再喺公司食煙，我終於可以喺無煙工作環境底下工作。

人。。。始終都係要經歷過差 d 冇咗條命仔嘅情況下先會珍借健康。

最近回娘家，我就將公司呢兩件事講比爸爸知，並勸佢立即戒煙。佢當時梗係冇理我啦，但我知佢其實係愛錫屋企人嘅，表面上扮無動於衷，實際上佢已經努力緊。爸爸你要加油呀，我會派多 d 線人監視住你。