♥♥ 結婚兩週年布吉之旅 ♥♥ - 皇帝島心肺潛水 @ Day 4

嘩，真係唔認自己懶都唔得！個 blog 真係好耐都冇郁過，趁呢幾日公司冇咁忙，我又真係唔想個布吉 trip 爛尾，都係乖乖地寫埋餘下兩日嘅行程，亦都方便一 d 上網搵資料嘅網友們嘛...

2011 年 11 月 29 日 (星期二)

嚟到旅程嘅 Day 4，呢日係成個 trip 嘅重點項目，因為今日會跟一位香港教練 "Mark" 學潛水呀~ 我知歐陽生恨咗好耐架啦，所以一早喺香港 book 定。

一早起身，當然喺酒店食咗個美味早餐先啦。執齊嘢就約喺 lobby 等人接，點知我真係超大懞.... 明明執好咗條大毛巾，點知唔記得帶出去，結果去到碼頭要買一條又貴又甩巾嘅毛巾.... 條毛巾宜家洗咗幾次，都一樣甩毛 >.>

到咗碼頭後，以為可以直接上船，原來仲要搭多一程車先得。就係搭下面粉紅色呢架巴士啦！架巴士好搞笑，係冇門架....

同教練阿 Mark 相認咗之後就跟佢上船啦。上圖紅色嗰隻就係啦！呢張相可能唔係太清楚，一陣下面會有一張比較清楚 D 嘅。阿 Mark 其實係土生土長嘅香港人，佢爸爸叫 Dino，都係香港人。N 年前因為太鐘意海底世界，喺香港考咗個潛水教練牌就移民咗去布吉教潛水。阿 Mark 都係受佢影響愛上咗潛水架，book 個香港教練，溝通都方便 d 嘛。



介紹完之後，阿 Mark 就安頓我哋坐好。同時仲有幾 pair 來自唔同國家嘅教練及學員，憑佢哋嘅方言，我估到有日本，瑞士等等。當時我唔係好敢四圍影相，因為見船上面有好多設備，而各位教練好似好忙碌咁準備緊 d 工具，所以唔敢周圍走，廢事整爛／亂人哋 d 嘢。

船上提供好簡單嘅早餐，都係能量性嘅食物，例如香蕉，麵包等等，唔知點解見到隻香蕉好想食，哈哈。

阿 Mark 幫我哋準備好潛水設備後，就嚟同我哋 brief 一次潛水要注意嘅事項，同埋教我哋一次點樣用 d 工具，認識下 d 手勢等等。仲即席比我哋試用個呼吸器，呢 part 我真係覺得佢解釋得好詳細。因為我最驚自己做唔到反壓動作，到時要我坐喺船上睇住我老公潛水，我會唔制.....

之後就要簽生死狀啦~~~ 記得舊年去沙巴時，玩激流前又係要簽生死狀，一講到條命仔.... 就好自然有 d 驚...

由於我同阿 Mark 事先聲明我好易暈船浪，所以搞掂晒所有嘢後，佢就叫我哋去上層坐，空氣流通 d。
今日會去兩個潛點，每一個潛點潛 30 分鐘。由碼頭去第一個潛點要大約 1 小時，所以呢 1 小時都係傾下計，影下相，仲有其他船員訓覺添。



終於到達第一個潛點，要著好裝備做我最最最怕嘅一個動作 --- 跳落水。
唔知點解呢個動作我真係會好驚，如果要我喺坐喺船邊打個跟斗落水嗰 d 我更加驚。不過事情發展到呢一步，呢下跳水嘅指定動作都不得不做。阿 Mark 教一隻手按實腰間上面 d 鉛，另一隻手按實個呼吸器及眼罩.... 大家就一齊睇睇我哋兩個跳落水個傻樣...

P.S. 孭住個氧氣樽同埋著住對蛙蛙，真係會突然間變得唔識行路。



個樣核突冇？尤其是帶住個眼罩，眼耳口鼻都變晒形....

嗱，呢幅相就清楚 d 啦，我哋出海潛水嘅船呀。報名時多口問句有冇得幫我哋影相，原來係有嘅，只需要加大約 HK$150 左右。我哋冇潛水相機，況且今次潛到約 10-12M 深，又唔想掛住影相而潛得唔盡興，所以都係加錢，叫阿 Mark 幫我哋影。

第一次潛水時，阿 Mark 會用條繩比我哋扶住慢慢落，期間當然要不斷做反壓動作啦，切記要確保兩邊耳仔都反到壓，否則水底水壓太勁，隨時會整穿耳膜架。幸好，我哋兩個都算順利，好快就落到水底。

落到水底第一樣做嘅嘢，原來就係餵魚仔。阿 Mark 幫我哋帶咗兩隻香蕉餵魚，真係諗都諗唔到魚係會食香蕉。D 魚其實都好醒，見有人落水就會圍住你游水，即係佢哋知道即將有嘢食啦嘛。



餵完魚，我哋就開始跟住阿 MarK 潛水，周圍游見下其他嘅海洋生物。好鐘意呢張相，係阿 Mark 幫我哋影嘅。

今次見到嘅魚同沙巴差唔多，有 d 喺沙巴都冇見過，而且見到好多珊瑚。





原來喺水底游下游下，30 分鐘好快過去。慢慢跟住阿 Mark 嘅指令游返上水，輪到我哋開餐食 lunch 啦！

Lunch 其實都唔會抱太大期望，都係普通泰式嘅小菜，炸雞鎚咁。喺我哋食飯嘅同時，其實隻船已經駛緊去第二個潛點。今次個潛點係 Day 3 玩浮潛嗰度。大約用咗半小時食 lunch，再坐多 1 小時左右船就到第二個潛點，夠晒時間比個胃消化。

第二次跳落水，已經冇第一次咁驚啦，簡直食菜咁食，哇哈哈。



今次潛落水底冇得靠繩啦，要靠自己。不過好彩我都唔失禮，完成任務！

唔知係咪因為第二個潛點深過第一個少少，見嘅魚都有 d 唔同。



而且仲比我哋見到海龍，你話如果叫我認佢出嚟，我只會當佢一塊枯葉，hahahaha。

上船後同阿 Mark 傾下計睇相，佢似乎唔太滿意今日嘅結果，因為見到嘅魚太少，但係其實對於第一次潛水嘅歐陽氏夫婦嚟講，已經夠晒皮啦。阿 Mark 話期間佢都試過潛遠少少睇下有冇收穫，不過因為近日天氣唔係太穩定，經常落雨，水質有 d 濁，所以都係唔好搏。不過聽到同船其他教練及船員講，佢哋見到海星及海龜，但係人哋係資深潛水學員，潛點都深過我哋，見到嘅嘢當然唔同 d 啦。

兩個潛點都潛完後，就跟隨大隊一齊返碼頭啦。臨走時同阿 Mark 影返張合照... （好明顯我已經黑咗好多，嗚嗚）

由碼頭返到酒店後大約 5:00 左右，見自己個身未乾得透，所以又落咗去個 access pool 游水，唔好蝕，哈。點知游游下就落起大雨，幸好今日潛水時一片晴朗，仲曬黑咗我添。我就唔係太鐘意落住雨咁游水，但係歐陽生就好鐘意咁玩，所以我上咗水，佢就繼續游。

場雨係大成咁喎？游水邊好玩架？

當歐陽大細路玩完水，梳洗過後就出發去醫肚。今次打算去好多人大讚嘅 No. 6 Restaurant，話佢又平又好食。



No. 6 一 d 都唔難搵，去到 Patong Beach 嘅舊舖，好多人，全 full，等位就大約等兩張枱左右。記得網友話佢哋喺某個山頂開咗新店，仲提供 free shuttle bus 接載食客上落，唔洗等，個 view 又靚 d，所以其實我係特登想去 new branch。一轉身，哦~~~ 原來就係坐呢 d 貨車仔上去。

去到 new branch 又真係冇介紹錯，個 view 好靚，裝修、佈置都係新店贏晒。

而且價錢亦都好合理，味道都唔錯，最衰呢日已經係 Day 4，聽日就要返香港，否則再 spare 多一晚上嚟食都得。



今次點餸真係要比個叻自己 --- 因為我用泰文點咗一碟生蝦刺身呀 ~

話說嚟咗咁多日，都仲未有機會試食到生蝦刺身，因為原來當地 d 人好少咁食，只係一 d 旅遊熱點嘅餐廳先有生蝦刺身提供，餐牌上一般都冇呢道餸。我唔知突然比 d 咩刺激到，醒起好多網友都話嚟 No. 6 要 order 生蝦刺身，但係佢哋嘅餐牌都冇相喎，點算好呢？之前我有用 iphone 影低生蝦刺身個樣，然後打算嚟到 show 比侍應生睇，可惜呢晚我冇帶電話出街。左諗右諗，當我想放棄之際，腦內突然醒起網站上 d 網友稱呼生蝦刺身叫「公車腩霸」，初時睇 d forum 都唔係好明係乜東東，及後有網友解釋先知係泰文發音，所以我對住個侍應生，有 d 口震震咁講咗呢 4 個字：「公。車。腩。霸」！哈哈，佢明呀，佢明呀！勁有滿足感！！！

晚飯後又由 Patong Beach 散步返酒店。聽日就要離開布吉啦，但仲未試到網友另一樣激讚嘅 pancake。但係行返酒店時有幸比我遇見一檔，雖然個胃剩低嘅位置唔多，但係都好想吞佢落肚，所以同老公一人叫咗一份。

我呢個朱古力怪，當然叫咗個 Nutella Chocolate，而老公就唔執輸，叫咗個 Tuna Cheese Onion Tomoto Black Pepper。

um.... 味道其實不過不失，冇網友講到咁好食，當小食食吓係 OK 嘅，未至於要為佢瘋狂。

食埋個 pancake 之後就乖乖地行返酒店，沿途都唔好再食嘢啦，否則跳多多舞都會變肥婆！