未出發，先擔心！

2011 年 9 月 10 日 (星期六)

人哋係「未出發、先興奮」，我竟然係「未出發、先擔心」!

話說決定咗落實結婚兩週年旅行地點係布吉後，一向都 well planning 嘅我就開始睇一 d 有關自由塵嘅 package，諗住遇啱就出手買。

本來睇中咗一間，打算去最就腳嘅銅鑼灣恒隆中心分行買 package，點知神推鬼X咁入咗同層另一間叫「星月旅遊」嘅旅行社。向職員問完價後，覺得 OK，比咗 $2,000 訂金留機位，點知原來就係惡夢嘅開始。

不得不承認，係我貪方便! 我揀星月旅遊買 package 係因為佢真係抵，而且仲覆我話有機位 (要講清楚因為由我問 package 開始，一路都話最平嗰隻 economy class 機位要 waiting list，除非加 $400 upgrade 去第二平嘅 economy class)，見佢有機位我就即刻 go ahead，仲傻更更比咗 $2,000 訂金。當時佢覆我整個 package 連稅，2 個人 total $11,552。好! 機位有啦，等酒店回覆個期有冇房，有就可以出機票 + hotel voucher。當日係星期四，職員覆我話下個星期一下午 5:00 前會有消息。我一心認為酒店一般會好快覆，經驗所得通常即日都覆到，所以冇為意，拎住張收據就離開。

回程路上，一路諗點解佢哋做到咁平? (比起我原本想買嗰個 package 平咗 $1,000 左右)，唔係咁黑仔入咗黑店吖? 即刻上網 check!

結果.... 當然係 oh my god 啦! 黑店中嘅黑店!!! 佢哋試過幫客人 book 咗酒店又私自 cancel 咗，客人去到外國要自費比酒店錢! 又有客人試過一路都出唔到電子機票，直至出發前一日上去分行嘈，先乞到張機票返嚟。呢 d 報道全部上晒報紙...  睇晒呢 d 報導後，嗰刻我異常冷靜，因為我知我做唔到 d 咩，而佢未有任何消息，我唔可以話佢呃咗我 d 咩，唯有等。

好，星期一..... 5:00 過後仍然未有旅行社任何消息。我當佢忙，比多一日時間佢。

星期二下午 5:30 左右，都仲未有消息，我唯有自己打去追。負責職員話因為上星期六係泰國假期，當地 agent 放咗假，所以要遲一日先有消息。

隔咗一陣，佢打嚟補飛，話因為之前 quote 比我個 package 價錢，酒店房價係 10 月價錢，我係 11 月去，分分鐘房價會有調整。然後又扮好人，話佢哋咁耐都唔覆有冇房，驚我到時去唔成，所以私底下搵咗另一個相熟嘅 agent 幫我 quote 咗 11 月嘅實價。有房，但每人加多 $300，即係成個 trip 加多 $600 啦。仲好有道理咁話，如果 contract 嗰間 agent 做到而平過 $600 的話，當然會 through 佢攞房，如果貴過 $600 的話，就建議我用佢個相熟 agent。<--- 傻仔，我係 sales 的話，我都知你最終一定話 contract 嗰間房價會貴過 $600，唔係你點賺多 d 呀？呢 d 技倆我都識啦! 之不過咁，我同老公計落條數，加咗 $600 比你後，我都仲叫有平。好，$600 就 $600，我照加! 幾日後，一如我哋所料，佢哋打嚟，堆砌咗一堆藉口去收嗰 $600! 仲話好在佢幫我 hold 咗房，咁..... 我係咪要多謝你吖?

OK! 酒店 + 機位都 confirmed 後，我另一個關心嘅問題，就係迫佢快 d 出機票及 voucher，因為我唔想變咗頭先提到嗰位網友咁，被佢哋拖到出發前一日先攞到文件。好在，職員話 confirm booking 後要 3 日內出飛，否則會 cancel booking。天助我也，星期六放工後上去比尾數，出機票。

星期六約好咗 1:30 上去一手交錢一手交文件。佢條友...... 我交晒尾數後又話我上去之前冇打比佢，佢都要等對方出 hotel voucher 比佢，要我喺附近行下，等佢一個鐘，文件齊晒會打比我... 好! 本小姐今日啱啱有 1.5 小時空檔。

約半個鐘後，我再打上去迫一迫佢，我話 15 mins 後要離開銅鑼灣區，佢一定要出到機票比我。呵，點知佢好順攤，OK 喎。

最後，我順利地攞到機票及酒店 confirmation。不過，我真係好好好怕會成為下一個受害人，所以我跟手 send 咗個 email 比酒店，re-confirm 咗我個 booking。連隨亦打咗去 airline re-confirm 機位。

我諗.......... 今次我應該逃過一劫!

下次! 下次再去旅行的話，我一定唔會貪方便，上網做足功課先走去落訂。好怕一心諗住去玩但搞到好掃興。更何況呢個係結婚週年 trip，最好唔好有咩差池啦!

好! 下個 target，定行程! 今次再會 encore 出外島浮潛，有機會的話仲會試埋深肺潛水 (即係要孭氧氣樽嗰種)，唔知有冇機會同大海龜一齊潛水呢?