講到布吉住宿，唔知點解今次好想游多 d 水，所以好有衝動去 book 一間房，可以一推開門就係泳池.... 或者因為想暗地裡補償去唔到馬爾代夫 / 斐濟嘅心態啩。
為咗方便去玩，我哋一致決定住返喺芭東區。睇咗旅遊書介紹及網上 research，好想好想 book 一 d pool access 房間。本來想 book 一間叫做 La Flora Resort。不過我都未免太有眼光啦... 5 日 4 夜普通 Deluxe room 已經要 $6,xxx 大元，更何況要 upgrade 去 pool access 房呢? 我買 package budget 嘅 bottom line 係 around $12,000 兩個人。如果太貴，我倒不如轉地方去豪 d。
集中火力喺旅遊書及網站中挑選 pool villa / pool access room 後，鎖定咗呢間 The Blue Marine Resort & Spa。衰就衰在佢喺山頂，出入會麻煩 d。酒店嘅 shuttle bus d 服務時間又鬼咁早收工，睇嚟今趟最甘都係車費啦。不過兩睇啦，佢位處喺山頂，咁即係話佢個 view 靚 d 囉!
~ The Blue Marine Resort & Spa 的日與夜 ~
<-- 好似冇乜泰式風味...
2011 年 9 月 10 日 (星期六)
話說決定咗落實結婚兩週年旅行地點係布吉後，一向都 well planning 嘅我就開始睇一 d 有關自由塵嘅 package，諗住遇啱就出手買。
本來睇中咗一間，打算去最就腳嘅銅鑼灣恒隆中心分行買 package，點知神推鬼X咁入咗同層另一間叫「星月旅遊」嘅旅行社。向職員問完價後，覺得 OK，比咗 $2,000 訂金留機位，點知原來就係惡夢嘅開始。
不得不承認，係我貪方便! 我揀星月旅遊買 package 係因為佢真係抵，而且仲覆我話有機位 (要講清楚因為由我問 package 開始，一路都話最平嗰隻 economy class 機位要 waiting list，除非加 $400 upgrade 去第二平嘅 economy class)，見佢有機位我就即刻 go ahead，仲傻更更比咗 $2,000 訂金。當時佢覆我整個 package 連稅，2 個人 total $11,552。好! 機位有啦，等酒店回覆個期有冇房，有就可以出機票 + hotel voucher。當日係星期四，職員覆我話下個星期一下午 5:00 前會有消息。我一心認為酒店一般會好快覆，經驗所得通常即日都覆到，所以冇為意，拎住張收據就離開。
回程路上，一路諗點解佢哋做到咁平? (比起我原本想買嗰個 package 平咗 $1,000 左右)，唔係咁黑仔入咗黑店吖? 即刻上網 check!
結果.... 當然係 oh my god 啦! 黑店中嘅黑店!!! 佢哋試過幫客人 book 咗酒店又私自 cancel 咗，客人去到外國要自費比酒店錢! 又有客人試過一路都出唔到電子機票，直至出發前一日上去分行嘈，先乞到張機票返嚟。呢 d 報道全部上晒報紙... 睇晒呢 d 報導後，嗰刻我異常冷靜，因為我知我做唔到 d 咩，而佢未有任何消息，我唔可以話佢呃咗我 d 咩，唯有等。
好，星期一..... 5:00 過後仍然未有旅行社任何消息。我當佢忙，比多一日時間佢。
星期二下午 5:30 左右，都仲未有消息，我唯有自己打去追。負責職員話因為上星期六係泰國假期，當地 agent 放咗假，所以要遲一日先有消息。
