「貢品」入手

2011 年 7 月 14 日 (星期三)

今日放棄了跳舞，因為老爺今日 59 歲生日，下年就 60 大壽啦，要大肆慶祝！

出席飯局前，心血來潮去咗「朝聖」。聖地非 agnes b. 也，而係近期歐陽生大愛 --- Paul Lafayet

點都估唔到一向唔嗜甜嘅佢竟然鐘意食 macaron！好多朋友都話 macaron 太甜，不過偏偏網上激讚呢間甜品店，查看之下發現 K11 及銅鑼灣皇室堡都有分店，於銅鑼灣做 OL 嘅我又點可以比藉口自己話唔方便呢？一個月前喺 K11 已經買過一次，但係當晚因為已經好夜，只係買咗 5 個就收手，見到歐陽生食得不亦樂乎，而且我都試過幾啖，真係好唔錯喎，忍唔住今日再買多次比佢食。

銅鑼灣店我都係第一次去。望到甜品櫃琳瑯滿目嘅甜品，我又點會唔流晒口水？不過今日嘅任務係要買 macaron 比歐陽生，一定要立場堅定！

店員好熱情為我講解每種口味，我未等佢講晒，已經話「每隻味我要一粒，淨係唔要乜乜乜味，唔該。」豪氣嘛？宜家諗返好似好豪爽咁喎... 嘻！

10 粒 macaron 承惠 HK$150，咁就跌咗 HK$150 啦！不過冇計啦，呢排成日陪唔到歐陽生，要佢捱飯盒又幫手做埋我嗰份嘅家務，呢 10 粒 macaron 就當係貢品奉獻比太上皇獎勵佢嘅！

(一下子唔記得唔好壓住隻手臂... 麒麟臂即時現形，)

坦白講，佢 d macaron 真係好好食，同平時食開嗰 d 有 d 唔同。問我最愛邊隻味，我會捨棄朱古力而揀茉莉，好清香，好好食！HK$15 一粒一 d 都唔算平，但係都唔算太貴，值得再去朝聖！

希望歐陽生可以 keep 住體重，唔會太快比我谷肥佢！

真係多謝佢無限量支持，好多晚要佢自己一個食飯都冇怨言，有時甚至星期六 / 日我都因為要 rehearsal 而冇辦法煮飯比佢食，仲要早出晚歸，thanks so much!

 

~*~*~*~*~*~*~ 5 days to go --- SHOWCASE ~*~*~*~*~*~*~*

海報面世

2011 年 7 月 14 日 (星期四)

今日如期去上跳舞堂 + 排舞，終於見到張 poster 啦！寫住 "Panda 學員"，嘻嘻！

當然當然當然... 我唔係跳拉丁 / 社交舞啦！我係跳 Jazz Funk，中文我會翻譯為 "街舞"。

 平時經常見到 Panda 老師嘅大名，一 d 特別嘅感覺都冇。但係當今日見到呢張 poster，有一種好奇妙嘅感覺，覺得自己真係有份參與其中。今次仲要每個 dancer 提供一張相，仲要寫 around 100 字嘅感想印落場刊內，我一定會收藏一本做紀念！宜家... 連 crew name 都諗好咗啦！

 

《同場加映》--- 密密練、密密練...

偷影時已經係晚上 10:3x 分啦，同學們繼續練，好似唔識停咁，佢哋真係好乖，音樂一起就會埋位。而我，唔好以為我偷懶，我都有跳咗好耐架，不過見係時候比雙腳休息下，所以我其實喺度拉緊筋咋！

~*~*~*~*~*~*~ 7 days to go --- SHOWCASE ~*~*~*~*~*~*~*

Enjoy your moment!

2011 年 7 月 8 日 (星期五)

繼續密集式嘅排舞訓練~~~

唔知係咪太密集嘅關係，同學間好似多咗傷兵出現。繼某同學隻手無端端冇力遞起後，今次輪到我了。星期六開始發覺右腳唔可以對摺，而且跪低時係超超超痛！其實我膝頭一直都有問題，因為本身大腿唔夠 strong，好多時令膝頭承受晒 d 力。當時即刻知驚，第一時間打電話比朋友問佢，因為佢以前都有類似徵狀，當時醫生診斷咗佢係半月板移位。其實半月板受傷係好大件事，手尾好長，小則要休息一年半載，大則以後不能做運動。

雖然朋友唔係註冊醫生，佢都係估計啫，我即刻向佢攞咗一位中醫電話，打算星期一朝早頭 7:00 起身特登出灣仔睇佢。人就係咁，硬係鐘意向壞嗰方面諗，我開始擔心我隻腳有事點算？如果醫生兜口兜面話比我聽我以後冇得跳舞，我 100% 肯定我會喊出嚟！老公叫我唔好亂諗，睇咗醫生先，或者情況冇想像中咁差。男人... 呢 d 時候就會用得著, ^^ 我係一個只會諗衰嘢嘅人！

2011 年 7 月 11 日 (星期一)

晨早 7:00 就起身，出到灣仔睇中醫。中間佢點醫我我 skip 咗唔交代啦，thank GOD! 原來... 醫生只係話我血液唔循環，心裡面不禁鬆咗一大口氣~ 等我仲籮籮攣擔心咗咁耐，嘻嘻！

醫生同我按下穴位，鬆下筋，仲試埋人生第一次比人 lock 頸。見前面嗰位婆婆比醫生做，佢好似好舒服咁喎~ 我本來好驚，不過醫生係突然間 lock 我頸，lock 完後我不禁大嗌咗一句 : 好舒服呀~ hahahahaha <--- 低 B 婆！

一輪醫治後，右腳終於可以屈返埋，嘻嘻，一種久違了嘅感覺~ 原來失去過先識得珍惜。呼~ 可惜我要戒食好多美食呀... dancemates 們話我咁忍得口戒得咁清，OF COURSE！曾經試過失去嘅感覺，就會用盡一切嘅辦法令佢唔好再受傷！

 

~*~*~*~*~*~*~ 12 days to go --- SHOWCASE ~*~*~*~*~*~*~*

近況

有好幾個星期冇 update blog 啦，記錄一下最近發生嘅事情先。

~~~ 相簿 ~~~

相簿一事簡直頭頭碰著黑！先講結婚相簿，海洋婚禮幫我做嗰兩本相簿，一本冇問題，另一本嘅頁數依然排亂晒。check 相簿嗰一刻我真係 down 晒，不過鬧個 sales 都冇用，老闆 Hero 又唔喺舖頭，否則我真係捉住佢嚟鬧，仲好意思話我改咁多轉 version，改完 printing 時咪又係比個錯嘅 version 我！本身以為只係自己吹毛求疵、追求完美主義，但點知攞相簿當晚同朋友食飯時，朋友睇完相簿後都問我點解頁數次序係 (1) 接新娘遊戲 -> (2) 出門 -> (3) 男家 -> (4) 註冊一 -> (5) 外影 (6) 席前 (7) 註冊二，等等... 真黑仔！

另一件有關做相簿嘅事，就係我嘅紙婚沙巴之旅 photobook，其中有一頁應該係咁：

可惜收到制成品後就變咗咁：

最大嗰幅相走咗樣... 相信係相簿公司由 ppt file convert 做 pdf file 時亂咗而唔察覺啦~ 講真，我揀得嚟做相簿嘅相，一定係自己有返一定程度嘅鐘愛，呢張相我仲做咗公司電腦嘅 wallpaper，幸好，佢走樣極都有返少少美感，唯有阿 Q d 諗... 既然成本相簿有咁多日落景，呢張走樣少少都尚可接受。

後來我都曾經嘗試聯絡相簿公司，但佢一路都冇 reply 我，醒目嘅都知佢想潛水，算吧啦！

~~~ 舞動奇蹟 ~~~

又係呢個 topic, ^^

最近為咗 7 月底嘅 showcase 真係忙到癲晒！星期一至五除咗固定的 2-3 堂跳舞堂外，其餘嘅時間就用嚟排舞。今個星期更加史無前例地排足星期一至星期五 (普遍由 7:30 pm 排到 11:00 pm 先由銅鑼灣離開，晚晚如是)，可憐嘅歐陽生晚晚放工只係捱飯盒，仲要等我安全返到屋企後先敢沖涼訓覺，不過佢果然係一個 understanding husband，冇抱怨，仲叫我多 d 練習加油努力。但係講到尾我都唔敢太過份，星期六及星期日都會返回崗位，做返一個稱職嘅師奶。老公你要忍耐，我捱到今個月底就可以日日做返師奶架啦，(真係可以用 "捱" 嚟形容，每日返工已經消耗咗一半精神及體力，放工後再排舞用埋餘下嘅一半... 切實體會到何為 "拖住疲累嘅身體返屋企")。漸漸體會到做一個在職家庭主婦，又要維持自己興趣，真係一門好高深嘅學問，我將來有能力做到嗎？********************************************

最近，聽到一個電台節目，有位女士打電話到電台尋找節目主持意見。佢結咗婚 2-3 年，結婚前與老公共識咗會生 BB，但因為佢知道做媽媽後會冇晒自己私人時間，所以趁限期來臨前盡量出街玩多 d (唔清楚佢 "玩" 係咩意思，可能係去 wet 去蒲，可能係做義工)，晚晚好夜返屋企。後來佢老公開始作出無聲抗議，慢慢地離家出走，初時一晚，後來越來越嚴重離家出走三星期都冇返過屋企。

我一路聽時覺得自己同呢位女士嘅想法好相似，當然我老公冇離家出走。主持人大罵嗰位女士唔啱，不論身、心佢都未適合做人老婆及媽媽。我以為趁未生 bb 時做多 d 自己鐘意做嘅嘢，當有咗 bb 後先修心養性做賢妻良母，唔通我咁諗係錯？