2010 年 9 月 23 日 (星期四)
自從買咗部 Canon 500D 後都冇乜點攞佢出嚟用, 今晚就一於去冒下險, 影下 d 鬼魂邪神啦! 是晚為追月夜, 再次得到海洋公園哈佬喂免費 VIP 門票, 仲唔拿拿聲同老公兩個入去撞下鬼!
朋友問我點解成日都有海洋公園 free tickets, 其實我都唔係成日有, 只有佢哈佬喂時先有.... 過 2 次咁大把 (但係都夠晒啦)! 第一次有飛, 因為我老闆個仔係仁愛堂總理, 贊助費老馮要比架啦, 換嚟咪有幾十張 free tickets 囉, 所以益咗我呢 d 員工仔, 當時仲分配到 6 張, 叫埋老公 2 個細佬及佢哋 d 女朋友去。
今次有飛, 因為老闆一個好尊敬嘅朋友又係總理 (今趟係保良局), 佢哋一定比人揼心口架啦, 咪又有幾張 free tickets 回饋下, 又分配到 2 張返嚟!
好, 到達 Ocean Park, 當然要喺門前留返兩條腳毛啦... 當晚人唔太多, 好似因為只係啱啱舉行咗兩三晚, 好易就企到靚位。
旁邊擺咗幾檔嘢賣下飾物搞搞氣氛, 不過我今次好慳家, 冇上當喎~
一入門口, d 鬼先啱啱 warm up 緊, 喺一個特定嘅 area 跳緊舞... 我梗係唔會放過呢 d "餐屎" 啦, 眼金金咁望到實一實...
d 鬼個個都係 dancer, locking, popping, jazz, breaking 應有盡有, 頭盤已經好滿足! 最搞笑係佢哋跳完之後會整整齊齊排好條隊, 再有個 staff 一路搖住個金色鈴鈴帶佢哋出嚟。
係咁易行咗個 round, 山下冇咩嘢好玩, 所以就去搭纜車上山。
行兩行, 開始見到好多鬼屋! 呢個仲講明係抄荔園嘅恐龍屋添...
不過真係 so sorry, 我自認細膽, 所有鬼屋都冇入, 好彩係 free tickets, 否則我咁蝕, 真係唔會買飛入場, 仲浪費埋個 VIP 添呀 ( = 唔洗排隊)。結果全晚就係入館啦, 同埋玩機動遊戲囉!
我所講嘅 "機動遊戲" 都唔算十分刺激... 摩天輪....
迴旋海底世界
呢個 360 度旋轉嘅觀光塔 (想死未? 係咪好想柴我台?)
其實... 我仲玩咗 5 次海盜船架... 海盜船係我至愛嘅機動遊戲... 最鐘意去感受佢嗰種離心力... 有得揀, 我一定會坐最尾嗰排, 當架船 fing 到去最高時會高舉雙手嗰種...
至於過山車...
幾年前喺呢度玩過一次... 嗰次係我第一次玩過山車, 玩完後覺得冇乜特別, 因為全程你都會比嗰舊倒 U 型安全 cushion lock 實咗, 個頭唔可以郁只可以眼珠郁, 左 fing fing 右 fing fing, 幾時倒轉咗個人又唔知, 淨係見到 d 頭髮倒轉晒先知囉... 所以之後都冇咗衝動玩 lu...
展覽館方面, 由於都夜啦, 好多都休息啦, 唯一呢個水族館一定要入去。
以前對海洋一詞冇乜感覺, 但受老公影響 (佢係海洋愛好者), 漸漸覺得水中生物都好靚, 不知不覺間就成日都會留意, 所以都好期待我哋 11 月慶祝結婚一週年嘅沙巴之旅架!
估唔到咁就玩到 9 點幾 10 點, 臨走時搵咗幾隻鬼影相, 呢隻恐佈嗎? 老實講, 第一眼見到佢時都有 d 驚。唔知佢點呼吸 + 睇路呢?
呢隻唔知乜傢伙, 不過當佢自己一個企喺度時有 d 似假公仔。
仲有牛頭馬面嘅牛頭, 本來諗住搵埋馬面影相, 點知失咗蹤, 牛頭先生都話搵緊佢喎!
走啦, 見到氫氣球升咗上嚟喎, 再影多張先~
總括嚟講, 今年嘅海洋公園其實幾揼本, 佢個 music video 真係好有誠意囉! 全園嘅佈置有進步, 而且園方擔心 d 化妝人員比人襲擊, 佢哋都安排咗一個公園員工跟住一隻鬼, 化妝又真, 工作人員又搞笑, 只係我細膽冇入鬼屋啫, 否則應該仲好玩!
後記:
突然覺得自己好乖... 又 update 咗一篇 blog, 不過即管放長雙眼睇下自己 keep 到幾耐... 連自己都睇唔起自己, Jenny 你真係好無鬼用! =p
哈哈，Jenny靚太，你要加油繼續繼續......update呀！
回覆刪除從來都未去過哈佬喂度玩，前兩年有過想的衝動......但係......愈大就愈驚驚，無膽呢 ！
[版主回覆10/08/2010 11:16:00]加油加油.... update! 暫時都有幾個 topic 想寫, 真係要的起心肝!
認同認同, 我真係幾細膽架, 好耐之前入過鬼屋, 越大就越唔敢入.... 但我反而好鐘意玩海盜船, 朋友話玩得海盜船咁激, 冇理由其他嘢唔敢玩喎~
歐陽靚太支持妳~加油啊~ 我會用期待嘅心情等妳下篇blog咖~
回覆刪除[版主回覆10/08/2010 11:17:00]多謝支持呀, 下次有機會見到你, 就簽個名比你報名你啦, 哈哈!
呵呵~我幾好...咁夜都留隻字畀你..點報答我先...哈哈...
回覆刪除原來係用新相機影相(歡迎加入龍友一族),呵呵~加油加油~
不過有哈囉喂既海洋公園我一次都未去過,廸住黎就有入去行個圈,無入鬼屋玩,因為我都好驚下....
你要繼續KEEP住寫下..畀我呢D CD -ROM 繼續 ROM下...嘩哈哈~
[版主回覆10/08/2010 11:19:00]嘩, 你想死, 半夜兩點幾都唔訓... 你真係想變做國寶呀? 為咗報答你, 除咗簽名比你之外, 晏少少再 update 多一篇啦, hahah!
原來你都未入過去哈佬喂, 不如咁啦, 如果下年再有飛多出嚟, 我就預埋王氏伉儷 & 林氏伉儷啦! 哈佬喂始終多人去好玩 d!
你就好啦, 我都好想去OCEAN PARK那個HALLOWEEN呀, 但真係太貴同埋多人....令我的唔起心肝去, 聽聞真係好驚架!!!
回覆刪除[版主回覆10/08/2010 16:14:00]其實一張飛要幾錢架? 平時我都會去海洋公園, 但哈佬喂就唔去啦... 真係會多人... 一係你下年等佢啱啱開始時就去囉, 氣氛可能冇咁好, 但係應該少人 d! 今年我都聽人講話幾驚嚇架, 咁我冇入鬼屋... 咪係一個明智嘅決定? hahaha
聽人講好似有快証, 就$4XX...其他既我就不太清楚
回覆刪除[版主回覆10/08/2010 16:19:00]$ 4XX 都貴過平時喎, 平時係咪 $2xx 呢? 我都唔係太記得啦!