我們的大日子 -- 2009年11月21日 (星期六)

頭先抱住試吓嘅心態, 打咗比老豆, 問佢如果我結婚嗰日係09年11月21日(星期六)佢有冇問題, 我主動解釋完一輪生肖相沖嘅問題之後, 佢咩都冇問就話 OK!! 哈哈, 我一早都話佢唔會介意呢d嘢架啦, 不過佢係我老豆, 又係主婚人, 當然要同佢講聲啦, 係咪?

宜家咁就好啦, 男家女家父母都對呢個日子冇問題, 2009年11月21日, 呢個日子就係我結婚嘅大日子啦!!!

今晚放工要同 bf 講一講呢個消息先, 我都仲未通知佢喺佐敦迎囍做咗pencil mark~~

婚宴場地 Part III

唉, 宜家總算有少少定案!

尋日真係勁sad囉, 首選(銅鑼灣煌府)同次選(始創帝皇庭)嗰兩間酒樓喺我結婚嗰日都比人book咗!!! 其實我大可以改婚期嘅, 不過21-11-2009(六)嗰日沖嘅生肖係鼠, 冇沖正我哋兩邊屋企人嘅生肖, 所以先揀嗰日, 不過原來嗰日咁多人結婚! 你話係咪過份吖, 2008年1月訂2009年11月嘅酒樓都竟然full, 原本仲話想3月先訂, 睇怕要提早到2月!

尋晚再同 bf 商量吓揀邊間酒樓好啦, 揀揀吓最終決定揀佐敦迎囍酒樓, 咁話晒係稻香集團, 人哋稻香係上市公司, 服務同食物水準真係有好多人讚, 又保持到水準, 雖然個名係難聽d, 迎囍.....迎囍....好娘咁, 不過唔緊要啦, 講真佢個朵夠響嘛! 而且佢目標係做到酒店級咁, 應該唔錯! 如果鐘意中式酒樓, 迎囍的確做得幾好, 可惜我鐘意西式...不過佢都有個西式backdrop, 但我已經唔記得咗佢個backdrop係點啦! 之後就係....佢個場, 的確有幾多柱, 新娘房又細, 不過基本設施好足夠嘅! 柱嗰方面, 冇法子啦, 避得就避, 仲有佢係 L 型廳, 不過都唔緊要啦, 個個望到我就得, 我都可以望到佢哋! <-- 唯有慢慢開始接受啦!

剛剛打咗去搵余經理 (之前係梅姐serve我架), 做咗pencil mark, 佢話只可以hold場一個星期, 如果冇人問我個日子, 先可以比我hold耐少少, 希望冇人問我嗰日啦! 所以我哋宜家就要約四大長老上去睇場地, 菜就冇得試啦, 佢哋主打係打邊爐嘛! 要試都比人叫咗上去稻香試, 根本試唔到迎囍嘅廚師囉!

好! 下次帶埋四大長老去睇場地, 我唔想連呢間都冇埋! 迎囍收費幾均真, 菜單價錢 x 圍數, 就係要比嘅錢啦! 而且佢哋送嗰d優惠都幾實用吖! 所以pencil mark咗呢間其實都幾滿意! 不過余經理話09年會加價, 但菜式同送嘅優惠都唔會點變, 唉, 樣樣都加價, 人情又唔見會加碼, 我點維皮???

婚宴場地 Part II

哎吔, 好煩惱呀, 到宜家都未揀啱場地擺酒, 我好驚趕唔切呀!!! 話晒2009年係雙春兼潤月, 有好多人嗰年結婚呀... 話時話, 我哋其實都冇話因為2009係好年而打算結婚, 純粹因為撞啱時間咋!

唉, 咁宜家點算呢? 之前睇咗咁多間好似都唔夠好咁, 本來已經揀定銅鑼灣煌府, 但esd d姊妹又話煌府冇端端加咗城堡喺backdrop度, 格格不入咁, 又冇咗d花花decor。

就係變咗咁啦~ 之前靚好多架嘛!

唉....之後又有人話個簽到枱d紗布開始變黑 (因為原本佢係米白色), 咁點呀? 仲揀唔揀佢好? 原本我話想叫經理拆咗個城堡, 不過 esd d 人話好大工程, 叫我索性搵過第二個場仲好...咁又係, 冇理由叫人拆咗佢架? 不過cwb煌府真係幾靚, 又有油畫, bf 佢最鐘意, 而且我都覺得唔差吖! 唉, 可惜吖...要再重新考慮過仲訂唔訂呢間好!

原本之前話去奧海城進發, 不過睇過奧海城其實都冇咩好酒樓, 只有皇廷酒家, 魚翅城海鮮酒家, 聯邦, 金滿庭及利寶閣~ 雖然個場我未正式逐個逐個去, 不過皇廷, 魚翅城同聯邦我應該唔會揀啦, 都係大同小異啫, 唉, 好懊惱呀!!!

不過, 或者有另一個辦法, cwb煌府可以照book, 但我要喺出面搵佈置公司同我做佈置囉, 唉, 唔通真係要咁做? 又要洗一筆錢喎!

初步擇到日子啦

星期四見到男朋友父母, 問埋佢哋想點擇日法。佢媽咪話只要唔係揀12月就得啦, 其他都冇咩要求, 因為12月係佢哋祖先嘅唔知生忌定死忌, 所以要避開...不過12月都影響唔到我哋, 我哋由頭到尾都冇諗住揀12月~~ 既然佢父母冇咩要求, 咁就最好啦, 我哋兩個自由度會大d, 我哋可以自己話事!

尋晚返到屋企問埋媽咪, 佢話如果男朋友嗰邊冇所謂, 佢都冇所謂喎, 不過最好就揀星期六... 但由於09年下半年嘅星期六大多數都唔係"宜嫁娶", 就算有時又會沖咗我哋6個人嘅生肖, 唯有避得就避, 所以暫定揀咗 2009 年 11月 21日, 星期六, 嗰日冇話宜嫁娶, 但亦都冇話忌嫁娶, 之前睇酒樓時都見到有人訂呢日嘅酒席, 咁應該嗰日都唔會差啦....不過呢個日子仲未過老豆嗰關, 如果佢都ok, 咁呢日就應該, 可能, 或者係我哋嘅大日子啦!!!

不過....最擔心係....要唔要過埋我阿麻, 我阿婆等等嗰關呢??? 如果要就大煲啦, 佢哋肯定好多要求~~ 希望唔洗啦, 亦都希望我哋大日子嗰日風高氣爽, 唔落雨, 唔會太凍, 廿零度左右就好啦!!! 好緊張添, 不過仲有差唔多兩年....緊張嚟都冇意思

我好鐘意嘅紫色倫敦的士呀!!!

尋日上網搵酒席資料時, 睇睇吓變咗睇花車... 其實我哋之前都有溝通過想租架倫敦的士做主花車架, 不過見大日子仲有排都未到, 諗住遲 d 先再諗啦~ 點知比我無意中發現原來有紫色嘅倫敦的士架, 見嚟見去都係粉紅, 白色等等.... 有我哋兩個最鐘意嘅紫色呀...就係呢個 blogger 嘅一幅相啦 (我同佢一樣都係鐘意PC狗架):

http://hk.myblog.yahoo.com/happy-wai/article?mid=142

尋日 bf 睇完幅相之後佢都話紫色呢架好靚, 梗係啦, 我哋都一樣鐘意紫色架, 所以宜家更加要決心租架倫敦的士做主花車先得!!! 求神拜佛, 我希望我大日子嗰日無人租紫色......

婚宴場地 Part I

由上年11月決定2009年結婚開始，大大話話都睇咗好幾個酒樓場地，等我總括一下佢哋每個場 d 資料先，癈事遲 d 唔記得：

1) 尖沙咀翠亨村 - 初時去睇呢個場, 都係因為比佢無柱式 + 樓梯吸引, 之不過, 去到睇完, 又發覺不外如是, 仲要 min. charge $140,000, 新娘房比較細, "FOUL"

2) 煌府 (始創) - 幾靚, 最好就係包晒所有佈置, 我唔想搵人搞, 菜價都可以接受, 新娘房夠大

3)煌府 (銅鑼灣) - 呢個場好靚, 暫時會係首選, 因為無柱式, 25圍可以包場, 又好有歐陸皇宮感覺, march-in 時有噴雪機, 幾得意! 新娘房亦算大, 有獨立廁所

4) 皇上皇 (中港城地下) - 喺門口望入去已經覺得好有壓迫感, 雖然佢係無柱式, 不過有得揀, 我一定唔會揀嗰度, 最後入都冇入去

5) 帝廷皇宮 (中港城二樓) - 呢間又係好得, 我哋兩個都好鐘意歐陸宮庭 feel 嘅裝修, 不過包唔到場, 但係經理話如果包唔到場, 我哋都會有獨立門口及獨立客廁, 感覺都似包咗場啦~ 缺點就係星期一至五要擺20圍先得, 星期六日要擺夠唔知23-25圍

6) 皇潮匯 (中港城) - 都係皇上皇集團, 不過我哋睇場嗰晚有人擺婚宴, 只可以隨便望兩眼, 不過如果真係要揀皇上皇集團, 我哋應該會一致選擇帝庭皇宮

7) 帝廷 (北京道1號) - 又係皇上皇, 當晚又係有人擺酒, 睇唔到, 但應該都唔會揀

8) 桃源 (中港城) - 感覺麻麻地, 好一般式嘅酒樓, 冇咩可取之處

9) 迎囍 (銅鑼灣) - 一間好有中式婚宴感覺嘅酒樓, 服務及食物水準一向都有人讚, 不過可惜, 我比較偏向西式禮堂, 未必會揀呢間

10) 迎囍 (雅蘭中心側) - 呢間更加唔會揀! 皆因佢連住稻香嘅問題, 有好多人等晚市食飯, 門口好嘈, 裝修亦唔覺特別靚, 不過當晚都係有人擺酒, 睇唔到新娘房

11) 迎囍 (佐敦大華酒店側) - 呢間算係最靚嘅一間迎囍, 我哋都好鐘意! 個感覺好 Grand, 一樓係迎囍, 二樓係稻香, 唔會好似雅蘭嗰間咁多閒人。而且如果二樓爆晒先會有人坐一樓, 所以喺一樓擺酒簡直好似包咗一層咁滯! 加上一路行上一樓時 d 樓梯都有佈置, 有閃燈, 盞水晶燈又靚, 好可惜係, 我擺18-20圍就要 L 型廳, 又有好多柱, 賓客要望電視, 我又唔想, 不過佢真係幾靚, 但係新娘房好細呀.....

12) 海港 (始創) - 算係意外收穫, 經理好好人, 不過有人擺緊酒, 睇唔到新娘房, 佢哋冇參加 expo, 話寧願留返 d 錢慳喺 d 菜單度, 不過佢價錢真係好吸引, 最貴嗰個 plan 都只係 $4,988, 已經有原隻鮑魚, 呢款菜單出面起碼要 6, 7 千蚊~ 不過....個場冇乜特別啫~ 究竟揀食物質素好嘅酒樓, 定揀裝修豪華嘅酒樓呢? 我自己會揀裝修多過食! 最特別反而係佢有個露天天台, 有 d 草及木櫈, 有賓客食煙就啱晒佢哋, 其他酒樓都冇架 (經理話09年唔會點加價)

13) 帝皇庭 (始創) - 驟眼望個名以為係皇上皇集團, 原來唔係... 呢間個場都 ok, 但係 bf 話有 d 似墳場, 因為佢哋用咗白雲石嘅問題... 但我冇呢個感覺喎! back drop 好似煌府, 菜單都 ok, 仲好似話 09 年唔會點加價! 呢個場新娘房超大, 同煌府有得比! 不過如果我大日子喺11月21日(六)的話, 呢個場唔得啦, 有人book咗~

14) 彩福皇宴 (始創) - 聽聞呢間都幾靚所以走去睇, 點知有人包咗場, 我哋都唔上去啦, 費時阻住經理, 又阻住對新人啦! 但係一打開菜單睇, 最平個 plan 要 $4,988, 仲未計酒水, 好似有少少 over budget 喎... "FOUL"

15) 囍臨門 (創興) - 呢間冇乜裝修, 好普通一間酒樓, 好處就係可以包全場, 基本上佢個場係長方型, 要晒都唔難, 而且一出 lift 就係簽到枱, 感覺上好似要晒佢成間酒樓咁, 好勁, 但係個經理好被動, 問一句答一句咁, 冇咩嘢都應該唔會揀呢間

嘩, 唔做個統計都唔知原來我哋睇咗15個場, 好勁, 不過, 仲要繼續去睇, 因為仲未搵到一間百分百啱我哋要求嘅酒樓....唉~

下個目標係去睇利舞台麒麟閣及向奧海城進發!

擇日之正確方法

籌備一個完美的婚禮絕不容易，由第一步的擇日開始，不少準新人已不知從何入手，以下是一些擇吉日應注意的要點。

結婚需要夾八字

雖然時代進步，但現在結婚擇日的人仍很多。至於夾八字，由於社會進步，男女平等，再沒有以前的盲婚啞嫁，只憑媒人之言，父母之命得來之婚姻亦已過時，故現在有求於夾八字是否配婚的人已經很少，相反是希望從八字加深男女雙方的認識，互取其長短而補其不足，做對最佳的配搭。

一般擇日的喜好

一般準新人都喜愛選擇以下的日子結婚：

• 選用雙春兼閏月之年份。
  
  
• 喜用雙月份：如二、四、八、十、十二月，但六月時候除外，因恐怕是半世夫妻。
  
  
• 特別喜用農曆八月、十月、十二月。
  
  
• 喜用假期、週末、近聖誕。

 

 

一般擇日的禁忌

有不少準新人都會避免選擇一些禁忌的日子結婚，但其實大多禁忌都未必會有影響的。

• 盲年不用，即是沒有立春之陰曆年。
  
  
• 犯太歲之年不用。
  
  
• 不喜用單月，如正、三、五、七、九、十一月。
  
  
• 三、七、九月不用，因三月忌清明，七月忌盂蘭節，九月忌重陽。
  
  
• 六月不用，恐半世夫妻。
  
  
• 父母及自己生日之月不用，有些包括兄弟姊妹之生日的月份亦不用。
  
  
• 祖宗生死忌之月不用。
  
  
• 三娘殺不用，即每月之初三、初七、十三、十八、廿二、廿七。
  
  
• 大時大節日不用。
  

 

正確的擇日禁忌

在選擇結婚吉日時，應注意以下的禁忌：

• 忌相沖新郎新娘年日。
  
  
• 忌相沖主婚父母。
  
  
• 不用亥日、歲破日、月破日、四離日、四絕日、上朔日、日月食日期都不選用。
  

 

正確的擇日條件

在選擇結婚吉日時，最好能夠配合以下的條件：

• 選與新郎新娘相生相合之日，如天干五合、地支三合、六合之日。
  
  
• 有貴人、祿元之日。
  
  
• 有財星、官星、印星、比旺、子星之吉日。
  
  
• 黃道吉日：十二建除神內之除定執危成開日；如當值吉神有：青龍、明堂、金匱、寶光、玉堂、司命之日。
  

 

擇日的準備

在選擇結婚吉日時，準新人最好預備以下的資料：

• 新郎出生年月日時及出生地點。
  
  
• 男家主婚父母出生年月日。
  
  
• 女家主婚父母出生年月日。
  
  
• 舉行婚禮之國家。
  
  
• 因應個人假期及喜好而定。

不過現時都好少人會跟足黎擇日架啦!只要自己鍾意,就岩時間,而當日宜嫁娶都會有人揀。

Aaron Kwok de Show Reel Concert Live Extension 2008 (加場)

哎吔吔, 收到 fanclub 消息, Aaron 又再加場呀~ 今次加嘅日期係 21/2/2008 - 23/2/2008, 好奇怪, 唔知點解之前開到 17 號, 要隔幾日先再開 21 號呢?

呢個都係題外話, 人哋本來買咗2場飛啦, 14號頭場睇 $480 (經 fanclub 買), 17號以為係真正尾場, 仲叫阿 samantha 托朋友買貴飛, 睇 $630 (第4行), 點知收到消息佢加場喎, 宜家又要再睇多一場啦, 應該睇多場 $630 啦, 如果買 $480, 冇人陪我睇呀...癈事又要豬先生睇多一場, 佢已經陪我睇14+17號兩場架啦~ 算啦!

其實, 雖然口講就話唔想 Aaron 加場, 不過佢加場其實都係好事嚟, 起碼我又可以見多佢一次, 好開心~ 都值得嘅!!!

貼一張 Aaron 演唱會 poster 出嚟先~

結婚分享小貼士

新娘化妝

好多新娘子以為白就靚, 經常在前一晚做一個 " 美白 " mask, 原來mask中有一些叫螢光劑的原料, 因吸收於皮膚底部肉眼係睇唔見, 但當閃光燈打上面, 照出來的效果會反晒光, 會令化妝師補好多粉都無用。有個化妝師同我講, 之前有個客回門後無野做, 問可唔可以落左個妝, 佢要訓一陣, 點知佢自己走去做左個 "美白mask " ,
後來照出來D相爆晒光了。
* ( 注意禁忌 : 當日出門直至婚禮完結之前,新娘子是不可訓的

, 坐下就可以 )

接新娘

好多人都會影 snap shot, 如果想相片好睇, 叫姊妹多考考新郎同兄弟的動作題.
最好不要考記憶題, 因為好多人都無咩記性, 答錯就瘀啦。用多些 colorful 的道具, 會令畫面靚d架。

租衫

1) 結婚當日裙掛原來除下來之後, 不可以再穿回, 會有再婚之意。
(例如 : 在酒家/ 酒店入席前有些新娘子會再穿回裙掛敬茶比長輩)
 如有此情況, 可考慮

 多租一件晚裝來席上敬茶用。

2) 白馬皇子都要小心D !!! 當新娘子穿上裙掛, 新郎不可以用白色禮服配襯新娘的。

3) 新娘子不要選淺紫色的晚裝, 因拍照出來的效果會變成灰色的, 怎樣拍都一樣。

Backdrop

  * 紅色是比較吸光, 點影個人物都會唔靚, 唔精神

  *白色很少東方人使用的, 事關辦喜事嘛
  * 深紫色, , 太過 colorful 的顏色會另人個主意力集中唔到係對新人到
  *

建議用 米色, 象牙色, 粉色....等等. (簡單就是美)

March in

當進場時, 都有好多兄弟姊妹或朋友會拉一些拉炮助興.但拉炮的一股氣是十分厲害, 切記勿向新人的面部發炮, 否則新人腫到豬頭

就無謂啦 !....哈哈