產假開始咗啦 @ 37W6D

2013 年 9 月 6 日 (星期五)

@ 37W6D

其實可能好多人都奇怪點解我拎產假拎得咁古怪。

其實我本身係星期六開始放前二後八，但係咁啱我逢星期五都要返健康院覆診，既然又係要請假，倒不如提前一日放，公司都唔會嘈我嘅。結果就開始咗我一生人可能唯一一次嘅產假啦。

老實講，對於一啲工作上忙到爆嘅人應該好期待放長假，本來我都好期待架，第一日，第二日本來都好充實，去覆下診，執下屋企啲立雜嘢，訓下晏覺，一日話咁易就過。不過去到產假嘅第四日，開始好悶啦。BB 嘢其實已經做得七七八八，電視又唔係成日啱睇，當你成日都有機會訓時，其實晏覺都訓唔到咁多。阿 B 又唔生性未出嚟，都唔知要等到幾時。唔知係咪因為我冇其他媽媽所講講腰骨痛，恥骨痛，好墜嘅感覺，所以我成日都覺得阿 B 會過期居留，即係要催生。唉，如果係咁就慘啦，聽聞催生痛好多。我成日都諗，既然呢一日始終都係要來臨，倒不如快快趣趣到，等我呢段時間唔洗咁無聊，之後亦都多幾日湊下阿 B 嘛。希望阿 B 聽聽話話，過多幾日好出嚟啦。

***************************************************************************************
2013 年 9 月 9 日 (星期一)

@ 38W2D

今日去私家醫生度做最後一次產檢，主要係想睇下阿 B 個頭仔落得夠低未，同埋睇下佢有冇臍帶纏頸，最重要都係想睇下佢幾重，有個心理準備。

幸好，冇臍帶纏頸，兩個星期前覆診醫生話阿 B 個頭落咗五分三，經過我呢幾日努力行多啲行多啲，佢個頭已經落咗五分四，不過最無奈係就算佢個頭仔落晒都好，都要等呢位小公主揀個適當嘅時候出嚟，即刻話我仍然要等。。。

至於體重，今次連黃醫生都開口啦，阿 B 的確係偏細粒，而且醫生都話我個肚細，但幸好仍然都係 within normal range，我都鬆一口氣。超聲波度出嚟話佢有 6 lbs 6 oz，估計佢出世應該有 6.5 lbs！ Good，係我心目中嘅 size 呀！

唔知 BB 係咪真係識聽我講嘢。

尋晚我同佢講，今次應該係最後一次見佢，之後就應該見真人架啦，所以我叫佢聽聽話話，比醫生照到佢個樣，哈，估唔到佢個頭仔雖然落咗去，但係仍然見到佢個 B 樣。

我一見到阿 B 個樣，第一個反應就係：嘩，真係好大個鼻呀。

黃醫生幫我換咗幾個角度再照，仍然都係大鼻妹，最後連醫生都講咗句：你個 B，個鼻真係幾大喎。

我聽到後。。。。so sad！

歐陽生，似足你呀！！！

P.S. 塊面珠仔好似好好肉地，好想一啖咬落去！

余仁生產後調理 @ 36W6D

2013 年 8 月 30 日 (星期五)

@ 36W6D

生完 BB 之後，產後調理真係唔可以輕視。

但係有關產後調理嘅資料又真係唔多，做咗少少資料搜集後，發現最多人服用嘅都係產後廿八方。本來都有諗過買嚟跟住食，因為真係好方便，分為普通版同金裝版。普通版嘅藥材當然就屬於廉價啲，而金裝版就會係矜貴啲。但係上網都見有人話條藥方唔係咁啱自己，食食下都會唔舒服。不過，大部份人都係冇問題，仲話真係坐完月之後冇病冇痛，身體強壯咗。

其實我都 15/16 架，問過歐陽生同埋媽咪意見，由於佢哋都忽略咗呢個 topic，所以根本比唔到意見。點知喺我做資料搜集嘅同時，見到有網友會去余仁生嘅中醫診所睇產後調理，了解過後我都揀咗去余仁生。因為認為一條藥方未必啱晒咁多個產婦服用，既然價錢差不多，倒不如真真正正去睇下中醫，起碼條藥方係為自己度身訂造吖。

余仁生中醫診所有三間分店，分別喺旺角，中環及銅鑼灣。一旦揀咗地點之後就唔可以再轉地點覆診。

睇症嘅安排其實亦有啲怪怪地... $2,850 共有 25 劑藥及兩次診症。

第一次見醫生必須喺生產前而又滿咗 36W 去睇，而第二次就生完後同醫師溝通後嘅某一日。

第一次見醫生一般都唔會有藥拎走，因為主要都係了解下之前一路陀 BB 嘅情況。生咗後 5 日內（因為生完後 5 日內唔補得喎）打比醫師同佢講下生完後你有乜反應出現，例如係開刀定順產，出汗多唔多，惡露多唔多等等。之後會按照你身體情況先開大約 5 劑藥比產婦清惡露。由於清惡露嘅藥材都係大同小異，透過電話了解我覺得都 make sense 嘅。飲完清惡露嘅藥之後就再打比醫師，又會再了解下到時嘅情況，每 5-10 日咁拎一次藥，拎夠 25 劑為止，所以要辛苦歐陽生幫我去拎啦。至於第二次診症就係呢個時候同醫師傾下，睇下邊日 ok 就邊日去見醫生，即係話避免唔到坐月時點都要出一次九龍。到時 25 劑藥全部都已經分開一包包，只要每日煲一包嚟飲就 OK，有需要就配隻雞或者配舊肉吊味....

其實我都唔清楚 $2,850 呢個價錢貴唔貴，不過我見產後廿八方嘅普通版都要賣二千幾蚊，金裝版仲要去到三千幾（廿八劑藥），咁我雖然只得廿五劑，但有中醫一路 mon 住我身體情況，而且係幾劑幾劑咁補身，點都應該安全啲啩。